نووسینی: #محەمەد هەریری#
پێشەکی
کەس بە قەد #فەرهاد پیرباڵ# سەری لە من و لە خەڵک و خۆشی نە شێواندوە! پەنجا وتار و پۆستم لەسەری کردوە نیوەی بەرگرییە لێی، نیوەکەی تریش ڕەخنەیە لێی!
زۆرجار بڕیارم داوە بە باش و خراپ قسەی لەسەر نەکەم، بەڵام ناچارم دەکات بە ڕەفتار و کارو قسەکانی بێمەوە گۆ! لەوەتی لێیان داوە لە هەولێر شەش بیرۆکەی دژ و لەگەڵم لەلا دروست بووە و نەمنوسیوە!
بۆ نموونە پێمباشە داوای یەک ملیۆن دۆلار دەکات وەک قەرەبوو!
بەڵام پاش لێدانەکەی ڤیدیۆی جنێوەکانی بە نەوزاد هادیم دیت. بەڕاستی سەرەڕای ستەملێکراویشی، زۆر جوێنی قێزەون دەدا، کە نابێت لەو تەمەنە بیدات!
کورد بەبێ هێز پێی بڵێیت ژنت ب.....م شێت و هار دەبێت، ئەخر تۆ ئەو جوێنە بە پارێزگار بدەیت و خاوەن ئەو هێز و دەسەڵاتەش بێت هەر چاکە بە زیندوویی لێی دەرچوویت! من ناڵێم ئەوەی پارێزگار کردی ڕاستە، بەس باسی سروشتی پیاوی کورد دەکەم.
فەرهاد جاروبار لەوپەڕی مرۆڤ دۆستی دەردەکەوێت، جاروباریش وەک فاشسترین مرۆڤ! ئەو سوکایەتییەی ئەو کردی بە عەرەبێکی عەگال بەسەری تەمەندار بەڕاستی لە مرۆڤێک ناوەشێتەوە کە ئەلف وبێی مافی مرۆڤ بزانێت!
لەگەڵ ئەوەم فەرهاد بنووسێ و لێکۆڵینەوە بکات، بەڵام دژی ئەوەم بەبێ ئامادەیی قسە بۆ خەڵک ومیدیا بکات، یان گۆرانی بڵێت بەو دەنگە سەرخۆشەیەوە!
لەگەڵ ئەوەم کاتێ ڕەخنە دەگرێت لە داروبەردی سیاسیەکان دەگرێت، جوێنیان پێدەدات، ، بەڵام لەگەڵ ئەوە نیم جوێن بە سەرکردەکانی ئەوبەر بدات، خۆی بکاتە سەگی بەر قاپی ماڵی بارزانی و باقی سەرکردەکانی بەری خۆی! خۆ ئەوانەی جوێنیان پێدەدا لەوبەر هەرچی بن، خراپتر نابن لەوانەی بەرەکەی خۆی!
لەگەڵ ئەوەی نیم بەدوای ئەوانە ناگەڕێت کە خەمخۆرینە، تا دوو وشەیان لێ فێربێت، کەچی دەچێ لەگەڵ بێ بەهاترین وپیسترین جاسووسی حزبی وجوێندەری ئینتەرنێت لە ئەمسالی قوندۆ و سەرکاو ئەستێرە پەیوەندی دەکات وستایشیان دەکات! پشتگیری کردن لەو دیاردەیەی جوێندان وستایشکردنی هێماکانی کارێکی زۆر تێکدەرانەیە، و لە کەسێک ناوەشێتەوە خۆی پێ ڕۆشنبیر وخاوەنی حەفتا کتێب بێ وەک زوو زوو پیرباڵ وادەڵێ!
پێمخۆش بوو کە دەچووە ناو خۆپیشاندانەکانی دژی گەندەڵی وشەڕی براکوژی، بەڵام پێمناخۆشە لەبەردەم مەحکەمە بۆ جەماوەرێکی بێ زەوقی ترسنۆکی گاڵتەجار، بەو جۆرە خۆی ڕووت کاتەوە و خۆی بکاتە جێگای پێکەنین و قەشمەری خەڵکانێکی قەشمەری ناجیدی بێ خەم!
پێمخۆشە کاتێ باسی قورئانەکەی دایکی دەکات وەک دینداریەکی ئاسایی شەعبی یان گەلێری، بەڵام تا سەرئێسقان لێی پەست بووم، کاتێ وەک منداڵێکی تازە فەقێ خۆی دەهاوێشتە پەنا وباوەشی دەجالێکی وەک مەلا عەلی کەڵەکێ!
فەرهاد زۆر شتیتری هەیە پێمخۆشە، بەڵام زۆرشتیتریشی هەیە زۆرم پێناخۆشە کە دەیکات! لەو پێخۆش بوونە وپێناخۆشبوونە سەرم سوڕماوە، ڕۆژێ لەگەڵیمە و ڕۆژی لە دژیمە.!
پێمباشبوو کە ئەو دۆسێیە ناوبنێم بە فەرهادپیرباڵ بەهلولەکەی دەسەڵاتی کوردی! مەبەستم لە وشەی بەهلول سوکایەتی وگاڵتە نییە، بەڵکو لێکچواندنێکە لە نێوان ئەرکی بەهلولی کۆن و ئەرکی فەرهاد کە وەک بەهلولەکەی دەسەڵاتی کوردی ناساندوومە!
وەک لە وتارەکەمدا هاتووە: لەگەڵ ئەوەشدا دەڵێن کاری بەهلول لەو دەوڵەتە، هەر بە پێکەنین هێنانی هاروونە ڕەشید نەبوو، بەڵکو سوک کردنی هەژموونی ئیستبداد بوو لەسەر شانی خەڵک... فەرهاد هەردوو سیفاتی بەهلولی تێدایە، لە ڕواڵەت لەگەڵ دەسەڵاتە و تۆقیوە لێیان، لە ناخیشدا لایەنگری خەڵکە، بەڵام نەدەتوانێ ونەدەزانێ چۆن هاوسەنگی بکات لەنێوان ئەو دووانە!
ڕەنگە ئەوە یەکەم کتێبێک یان نامیلکەیەک بێ لەسەر فەرهاد پیرباڵ نووسرابێت بە تایبەتی. ئەو وتارانە کۆی ئەو وتارانەیە کە من لەسەر فەرهاد پیرباڵ و دیاردەی پیرباڵیزمم نووسیوە. ئێستاش ڕایەکی جێگیرم لەسەر پیرباڵ نییە، چونکە مرۆڤ لە گەمیەکی ناو دەریا بێت، هەڵچوون وداچوونی بەپێی هەڵچوون وداچوونی شەپۆڵەکانی دەریاکەیە.
فەرهادیش قەت کەسێکی جێگیر نەبووە لە بیرو کردەوە و ڕەفتاری، کەسێکە کۆنتڕۆڵکردنی سەختە هەتا لەلایەن ئەوانەی فەرهاد بە ڕوحیش لێیان دەترسێ، کەسێکە زۆر قورسە پابەند بێت بە فەرمان و ئاڕاستەکردن، کەسێکە سنووری ئازادی سڕیوەتەوە، بۆیە سەرئێشەکانی بێ سنوورن!
محەمەد هەریری
27/2/2019