نەبونی کراسی ئاگرە
نەبوونی واتە نەداری و هەژاری و دەست کورتی و ناگوزوری، کۆمەڵی مرۆڤایەتی ڕێژەیەکی یەکجار زۆری له و کەمدەرامەت و بێ بەروبوم و بەرهەمانە تێدایە کەناتوانن بەتەواوەتی قوتی ڕۆژانەی خۆیان لە ئاو و خۆراک و پۆشاک و نوان دابین بکەن، کورد زۆر ڕۆژگاری تاڵی وسوێری و گرانی و ڕؤژی ڕەشی بەڕێکردووە، چەرمەسەری و بەش مەینەتی و کارەساتی زۆر ڕووی تێکردووە، هەموو ئەمانە وایکردووە کە دەوروبەرەکەی بەگڕ و دۆزەخ و ئاگر بێتە بەرچاو و هێدی هێدیش لە داکەوتەی ژیانیدا درکی کردووە کە دەسوتێت بۆیە بۆ هەموو جۆرە نەدارییەکی(ماددی و واتایی) بە ئیدیۆمەوە وتوویەتی(نەبونی کراسی ئاگرە) واتە نەبوونی لە زۆربەی ڕووەکانی ژیانەوە مرۆڤ دەسوتێنێت.[1]