شەبێ قەدرێ ل مە ڕەوشەن کە تو ڕووحی وەرە خوەش
مە ژ نوو خوەش کە ل سەر چەهڤێن شەهیدێن خوە بمەش
ما ل من کی نەزەرەک لوتفێ ژ دل غەمزەیەیان
بڕەشینی جەگەرێ ڕیش ژ قەوسێن خوە ب وەش
سەحەرێ جوملە شەهیدێن تە ب ڕم ئاڤێهتی
ئێژمارینە یەکا یەک مە حەمی شەش سەد و شەش
لێ شەهیدێن تە ب ئەژمار ب خەنجەر کوشتین
هێ نەچووی خوون ژ برینان سەد و هەفتاد و دو لەش
جەنگێ هندی دکرن فێرس و ڕمبازێ عەرەب
تۆخ و عالا د فەڕەنگینە کەماندارێ حەبەش
تو بنێ ڕۆم و عەجەم کوشتنە زەنگی د کەمین
هانە هەر تیپ پەیاپەی ژ تەرەف ڕوو خوەش و خوەش
دا مە شەهزادە ب دەستێ خوە موبارەک قەدەحەک
نە غوبارەک ژ خوماری و نە توندی و نە غەش
دو قەدەح مەی ب نشانی ددەرت ڕەنگ ب ڕەنگ
نێرگزا نازکە ڕەعنا و گولا تازەیە گەش
غالبا ئەهلێ زەمانی ما مەلا ئادەمیین؟!
ڤە نە مایین ژ کەرێ مەی ڕەش و گایێ تەیێ بەش
عارفێن ئەهلێ بەسارەت ژ نەسەق مەردومێ چەشم
سورمە پووشن د بەیازێ وە قەبایا خوەیە ڕەش
حەیف نینە قەدەما تە کو ل سەر هەفت تەبەق
وەرە جارەک تو ل سەر چەهڤێ مەلایێ خوە بمەش
#مەلای جزیری# [1]