داستانۊ شېخی سەنعانی
بەشۍ دوەمە
ئاواتو شېخی سەنعانی:
هەردەم مەواتەن، یارانی هامدەم
کەی بۊ، باڵای دۊس بوینوون بە چەم
تا یاوان وەپای عالی درەختێ
دیشان دیارەن، قەڵاچەی سەختێ
جە دوور مەدرەوشان چوون شەماڵەی نوور
شەوق مەدۊ جە دوور چوون شەمعی کافوور
موریدان واتەن ئەی شېخی سالار
قەڵاچەی عەزیم جە دوور دا دیار
هۊرېزە بشین وەپای قەڵاوە
ئەو قەڵای عەزیم دوور جە بەڵاوە
سەنعان ئېد ئەژنی هۊرېزا وەپا
چەنی موریدان ڕوو نیا بە ڕا
تا یاوا وەپای قەڵاچەی دولبەر
وېش وست نە ڕووی خاک، خاکش کەرد بەسەر
وات ئېنە یاگەی دین و دنیامەن
نەزەرگای شەریف ماجەمین جامەن
ئېدەن ئەو مەکان دییەنم نەخاو
ئەسرینم پەرېش کوڵ بەستەن بەتاو
هەم ئېدەن پەرېش، گڕگڕانمەن
مەکانی ماوای دیدە و گیانمەن
هەر ئېدەن جە شەوق دیدارش مەستم
خۊشا بە حاڵم، یاوا بە دەستم
بە تاقی ئېدەن، کەعبەی مورادم
مەنزڵگای شەریف، سەروی ئازادم
پەی ئېد جە زەمزەم هۊرگېڵام بەتاو
پەی ئېڎەن چند شەو نەکەردەنم خاو
دایېم خۊراکم قنیاتی خەمەن
پەی ئېڎەن دایېم، کارم ماتەمەن.
[1]