Êrişên artêşa Tirk a dagirker ên li ser navçeya Zirganê didomin. Ev êriş ji bo valakirina navçeyê pêk tên, lê şênî bi israr in ku tevî şert û mercên dijwar jî jiyana xwe li ser xaka xwe bidomînin.
Ji dema êrişên dagirkeriya Tirk li ser bajarên #Serêkaniyê# û #Girê Spî# yên 9’ê Cotmeha 2019’an ve, dewleta Tirk a dagirker û çeteyên wê rojane Zirganê topbaran dikin. Armanc ji van êrişan valakirina navçeyê û guhartina demografiya wê ye.
Topbaran herî zêde li ser van avahî û deveran pêk tên; şaredariya gel, navenda Hêzên Ewlekariya Hundirîn, navenda meclisa navçeyê, navendên tenduristiyê yên wekî Nexweşxaneya Zirganê û Tora Pêwendiyan. Her wiha dikan û malên welatiyan jî dikin hedef.
Tevî hovîtiya dewleta Tirk û çeteyên wê, şêniyên Zirganê bi israr in ku li ser axa xwe bimînin.
Welatiyê bi navê Mihemed Sedûn êrişên dagirkeriyê yên ku rojane navçeyê dikin hedef û yên bi hewldana koçberkirina şêniyan şermezar kirin û wiha got: Eger temenê wê jiyana min be jî ez ji mal û axa xwe dernakevim. Mirin ji dagirkirina xaka min, çêtir e.
Welatiyê bi navê Adil El Xidir ê ku xaniyê wî ji ber topbarana dewleta Tirk wêran bûye wiha got: Tevî vê yekê jî ez dest ji axa xwe bernadim.

'RÛSYA Û AMERÎKA SÛCÊN DEWLETA TIRK A DAGIRKER DIBÎNIN, LÊ BÊ DENG IN'
El Xidir bêdengiya navneteweyî şermezar kir û wiha pê de çû: Rûsya û Amerîka sûcên dewleta Tirk a dagirker dibînin, lê li hember vê yekê bê deng in.
Welatiyê bi navê Ilyas Şiwêx jî wiha got: Topbarana domdar a dewleta Tirk a dagirker malên welatiyan dike hedef, lê em dev ji axa xwe bernedin.
Girêdayî mijarê, şaredariya gel xebatên xizmetguzariyan berdewam dike, da ku xebatên welatiyan bi rê ve bibin û pêdiviyên wan dabîn bikin. Ji ber di 5’ê Cotmehê de avahiya şaredariyê hate topbarankirin û ji xizmetê derket. Li ser vê yekê berpirsê nivîsgeha pîşeyî ya Şaredariya Zirganê Ebdulezîz Hesen wiha got: Şaredariya Gel a navçeya Zirganê hate hedefgirtin û ji xizmetê derket. Ji bo berdewamkirina kar û xizmetkirina welatiyan, em neçar man ku biçin cihekî din.
Hesen wiha lê zêde kir: Hinek ji projeyên ku şaredarî li ser dixebite; qîrkirina, sererastkirina rêyan, xîzkirin, xebata xizmetkirina gundan bi ava bîran.
Hesen wiha pê de çû: Ya herî girîng ji van projeyan, projeya guhertina jenetorên ava li gundên Um Mehrmele, Rebîat Xerbî û Enabiye ye. Her wiha projeyên qîrkirina rêyên gundên zirar dîtine.
Hesen her wiha got: Topbarana domdar a li ser navçeyê karê me asteng dike. Projeya sererastkirina rêya gundê Besîs heye, lê ji ber hefedgirtina rasterast a li ser gund pêk tê, em nikarin projeyê temam bikin.
Hesen wiha dawî li gotina xwe anî: Tevî topbarana domdar û hedefgirtina rasterast a welatî û karmendên saziyan, lê ji bo xizmeta gelê xwe ev sê sal in em li Zirganê kar dikin.
Li aliyekî din jî endamê meclisa navçeya Zirganê Ezîz Temo bal kişand ser topbarana rojane ya li ser navçeyê.
Temo destnîşan kir ku topbarana artêşa Tirk a dagirker welatî û navendan xebatê yên navçeyê dike hedef, weke firin, stasyonên sotemeniyê, şaredaiya gel û meclisa navçeyê. Du stasyonên sotemeniyê ji ber hedefgirtina rasterast, ji xizmetê derketin.
Temo axaftina xwe wiha domand: Şêniyên Zirganê bi ax û malên xwe ve girêdayî ne. Armanca dewleta Tirk a dagirker ji topbarana domdar a li ser navçeyê, valakirina navçeyê ji niştecihên wê yên resen û dagirkirina wê ye.
Temo tekez kir ku meclisa navçeya Zirganê li gorî derfetên berdest, pêdiviyên pêwîst ji xelkê re dabîn dike, wek av, kehrebe û nan û wiha lê zêde kir: Heya ji dest me tê, em hewl didin firina navçeyê nesekine.
Zirgan girêdayî bajarê Serêkaniyê yê kantona Hesekê ye û 30 km dûrî wê ye. Her wiha 20 km dûrî navçeya Til Temirê û 70 km dûrî navçeya Dirbêsiyê ye. 72 gund jî girêdayî wê ne.[1]
ANHA