داستانۊ حەیدەری و سنۊبەرۍ
بەشۍ شەسهەمە
دمای ئانەی حەیدەر بەگ، قەزەنفەرش کوشت، ڕووەش کەردە سنۊبەرۍ و واتش: گیانی شیرینم ئیتر تەمام، ئیتر وەسېن شین و زاری، وەس هەرسی مجەرە سەرگۊنات، هەتا زووەن با بلمۍ. سنۊبەرە بە حەیدەریش وات: دەربازە و حەساری فرە مەحکەمەن، بەرشیەیمان زەحمەتەن.
سنۊبەر واتش: ئەی دین و دنیام
جە ڕووی تەنگدا، یاوای بە فریام
هەرچی مەواچی، مڼەت بە گیانم
ئازیز گیان ئەم جار، قەدرت مەزانم
بەڵام چوون مەبۊ، ئەی یاری خەمخوار
فرە مەحکەمەن، دەروازە و حەسار
ئیلا کە ئەم شەو عەیش و نیشاتەن
جۊق جۊق مەردومان، نەپای بیساتەن
ها وەختەن، لېمان، خەڵک ئاشکار بۊ
دەردی قەزەنفەر، لېمان دووچار بۊ
حەیدەر بەگ واتش: ئەی ئارامی گیان
ئینە چە فېکرەن، بە خاتر، یاوان
هۊرېزە چەنیم خورشیدی خاوەر
تەوفیقت بواز، جە ئاغەی قەمەر
چەنی غوڵامت، ئەی ماهی تابان
وە هەرکۊ مەشوو چەنیم بەر ڕەوان
سنۊبەر ناچار هۊرېزا وە پا
وات بە حەیدەر بەگ، پەنام بە ئەڵڵا
هەر بەو گوزەردا، ئامابۍ بە وار
بەرئاما نە تۊی، قەسری زەڕنیگار
حەیدەر بەگ چەنی یاری سۊسەن خاڵ
یاوان، بە یانەی پیری کۊهەنساڵ
حەیدەر وات، بە زاڵ، ئەی یاری شیرین
زوو باوەر پەرېم، ئەسپ و سەلا و زین
هیممەت، مەوازووت، باوەرە پەرېم
مەبۊ ڕاهی بووم پەی وەڵاتی وېم
دەردەم دەر سەعات، ئەسپ بەر ئاوەرد
بە تاو و تەعجیل، حەیدەر زینش کەرد
[1]