داستانۊ جەنگو مېیانو (ئاسمانی و زەمینی)
نویستەی: میرزا ئۆلقاڎری پاوەی
بەشۍ پەنجا و چوارەمە

میرزا ئۆلقاڎری پاوەی جە تۊمارکەردەی گوزەرو ڕۊحی پاکو محەمەدی (ص) بەردەوامەن، تا یاوایش بە حەزرەتو نووحی:
ئاخر، جە لای (نووح)، عەلەیی سەلام
جە، دمای چندی، تا، یاوا، بە (سام)
جە گردین، یەکسەر، تا جیل، کەرد، گوزەر
نەکەرد، مدارا، تا، وەلای (ئازەر)
جە (ئازەر)، ویەرد، چوون دوڕدانەی فیل
تا، شیی، وە جەبهەی، (ئیبراهیم خەلیل)
بەرشیی، جە سینەی، خەزېنەی (خەلیل)
کەفت، ئەو پیشانی، پاکی (ئیسماعیل)
جە لای (ئیسماعیل)، دیسان کەرد، گوزەر
فڕ، قدووم بەرد، وە جەبهەی (قیزەر)
ئەو، جە هەمیەسەع بن حەمل، ویەرد
جە (قیزەر)، تەشریف، وە لای بەینەت بەرد
(عەدنان)، وە موعید، تا وە لای، (نەزار)
جە هیچ مەنزڵێ، نەکەردش قەرار
موزەڕ وە ئەلیاس، موورک، دیی بە چەم
مەنزڵان، تەی کەرد، پەی جەبهەی خاتەم
کەعب، هەم لوەی، کیلاب، بۍ خیلاف
قوسەیی یاوا، بە عەبدولمەناف
جە مەناف ویەرد چوون بەرقی ئەنجەم
مەنزڵ، بەرد، وە تۊی، پیشانی هاشم
هەم، جە لای هاشم، غەرەز، موحیبەت
تا، یاوا، جەبین، عەبدولموتەلیب
ئاخر مەنزڵش، بە ئەمری ئەڵڵاﮪ
بەرد، وە جامی پاک، جەبهەی عەبدوڵڵاﮪ
بەڵام، عەبدوڵڵا، نووری دیڎەش، بۍ
فەرزەندی عەزیز. بەر گوزیدەش، بۍ
عەبدولموتەلیب، تەمام خۆش عەیش، بۍ
بوزورگ، ئەوەڵی، قەومی، قوڕەیش، بۍ
سەرداری سوپای، مەککەی شەریف، بۍ
ئەسڵی مەند، پاک، حەقق، پێدادە، بۍ
دینی حەنەفی، خەلیلەڵڵا، بۍ
ئایین و مەزەب، زەبیحەڵڵا بۍ
بابۊی دە کەس، چوون ئەبوتالېب، بۍ
عەبدوڵڵا و عەباس، حەمزە، غالېب، بۍ
بەڵام، عەبدوڵڵا، نووری دیڎەش، بۍ
ئەرشەدی ئەولاڎ، بەرگوزیدەش، بۍ
بە حوسن و جەمال، بوڵند، ئاواز، بۍ
جە ئەهلی عەرەب، خەیلێ، مومتاز، بۍ
نووری موحەمەد، شای خەیرولبەشەر
جە ڕووی پیشانیش، مەدرەخشا، چوون خوەر
هەرکەسێ، مەدیش، دیداری پاکش
پېش حەرام مەبیی، خورد و خوراکش
[1]