داستانۊ جەنگو مېیانو ئاسمانی و زەمینی
نویستەی: میرزا ئۆلقاڎری پاوەی
بەشۍ پەنجا و حۆتەمە

وەهەب، کوڕو عەبدولمەنافی جە شکارگاو وېشەنە، وەختێ دیش چن سەڎ سوارێ چواردەور و عەبدوڵڵایشان دان، بە پەلە ئاما، عەینو وەختینە، دیش چڼ سەڎ سوارێ جەنگییۍ و پۊشتۍ، پەی ڕزگارکەردەی عەبدوڵڵای وەستېرە وار، سوپاو یەهوودیشا تارومار کەرد و عەبدوڵڵاشا ڕزگارکەرد، ئیتر بە پەلە هۊرئېزا و پەی لاو (عەبدولموتەلیبی) گېڵاوە، پەی ئانەی هەواڵەکەش پەنە بڎۊ. وەهەب واتش من کناچێوەم هەنە پېسەنە گوڵو باخێ ڕەنگینی، بە عەبدوڵڵایش مەبەخشوو. چونکم ئاڎ زانۍ عەبدوڵڵا دمای وېش کۍ جیامازۊ:
دەر دەم، هۊرئېزا، فەوری تەشریف بەرد
گفتوگوی وەهەب، پەی (موتەلیب) بەرد
واتش: گوڵێ هەن، جە گوڵزاری من
نە باغچەی، عیسمەت، کەس نەداری من
پاکی، بېعەیبەن، نۊبەر نەمامەن
شۊخی شیرینەن، (ئامین)ش نامەن
حوسنش، چوون خورشید، نە پشتی پەردەن
نە پەردەی عیزەت، دایېم، پەروەردەن
پەرێ، هامجفتی، پەی هامخوایەی، شەو
(ئامینە)م بەخشا، بە (عەبدوڵڵا)ی، ئەو
دایەی (ئامینە)، فەوری تەشریف بەرد
عەبدولموتەلیب، خاترنیشان، کەرد
چگۊنەگی حاڵ، فەرموودەی وەهەب
عەرزکەرد، وە خزمەت، ئەو عالی نەسەب
واتش: با غەیرێ، چی سەرزەمینە
شاڎ، نەبۊ، بە دین، دیڎەی (ئامینە)
جفتش، ئەگەر، شاە، ئەگەر گەڎا بۊ
خاس ئېدەن، با ئەو، پەی عەبدوڵڵا بۊ
عەبدولموتەلیب، شای بوڵند کەوکەب
وە حوسنی، عیسمەت، ئامینەی وەهەب
وېش، موتەلیع بیی، جە، سەرەتا، قەدەم
زاهیر بیی، چوون، سەرد، سەرچەشمەی زەمزەم
قبووڵ، بەدەڵ، وات: با موبارەک بۊ
مەبۊ، کاری خەیر، جە تەدارەک، بۊ
[1]