قەباڵەکۍ هۆرامانی
بەشۍ دوەمە
دلۍ پارچە پۊسە قەباڵەکۍ کە (کاولی) وەڵاکەردەنۆ، ساڵەو (1919)ی زاینی، نیشانەمڎۊ هەکە مېژوو نویستەیش مەگېڵۊوە پەی (11-12) وەڵۍ زاینی، ئانەیچ وەراوەرەن چەنی دەمو فەرمانڕەوایی پاشێوە ئەشکانی،کە نامېش(ئەشکی چوارەم) بیەن، یان (فەرهادی چوارەم)، کە زانیاریەکۍ میانو (2-20)و (و.ز)ینە فەرمانداریش کەردەن.
بە هەرحاڵ دمای سەرنجدای جە مېژوو هەر یۊ چا قەباڵا هۆرامانییە و گېڵایۆ پەی سەردەمانو فەرمانڕەواکا، پاسە بەرمەگنۊ کە یەرۍ دەمۍ جە فەرمانداری ئەشکانینە نویسیێنۍ.
ئا دوە قەباڵەشا کە بە زوانی گریکی نویسیێنۍ، پېسە وەڵتەر ڕۊشنماکەردۆ، پەی سەردەمو فەرمانداری پاشاو گۆرەو ئەشکانی (ئەشکی نۊهەم)، کە میهردادی دوەمیچشا پەنە واتەن، مەگېڵاوە. ناواخنەکەش و جۊرو نویستەکەو دلېشان بېگۊمان ئانەما پەنەماچا هەکە چا سەردەمەنە زوانی گریکی چا ناوچانە بەکارئامان، مەڵامەتو بەکارئاردەی زوانی گریکی چا دەمەنە پەی پلەو زانستی میرزا (بنویس)ی مەگېڵۊوە کە ڕەنگە ئا میرزا بنویسە تەنیا ئا زوانەشە زانابۊو یان پا جۊرە ڕانویسە زاناناش بنویسۊ.
قەباڵۍ یەرەمەیچشا کەبە ئەلف بای ئارامی نویسیێنە، پېسە واتماما مەگېڵۊوە پەی سەردەمو فەرمانداری پاشێوە ئەشکانی و ئاڎییچ ئەشکی چوارەما، وشکنەر جە جۊرو نویستەی یەرۍ قەباڵۍ چانېشانە و جە سەردەمو پاشاکاو ئەشکانینە و جە فەترێ فرە کۊڵەنە، پەیش هەن کە ویر چانەیە کەرۊوە (چونکم زوانی گریکی بە زۊر سەپیان ملو خەڵک و کوردستانیرە، نەتاوانش بنجە بەسۊو ڕیشە چەقنۊرە، هەر کە دەسەڵاتشان سەرشیەن و فەرمانڕەوایی ئەشکانیەکا یاگېشا گېرتېنێ(چەنی دماکۆتەیی ئەشکانیەکا، جە بوارو ڕۊشنویرینە) پېسە زوانی میری بېگانەی، ماوێ فرە کەمەنە کاڵبیەنۆو بېجگە چن شۊنەوارێ کەمی کە دماگیرۍ چن نامێ جوگرافیۍ کەسیۍ دیارېنۍ، یان چن واچێ تاک و تەرا کە چیلاو چۆلاوە بەکارئامێنۍ، قەوارېش نەمەنۍ.[1]