داستانۊ جەنگو مېیانو ئاسمانی و زەمینی
نویستەی: میرزا ئۆلقاڎر و پاوەی
بەشۍ حەفتا و حۆتەمە

عەبدولموتەلیب، وەختێ ئاماوە، محمدش نەڎۍ، ئارامش چەنە بڕیا، واتش بە ئامینۍ کۊن محەمەد؟، ئاڎیچە ماچۊ: لوە چوۋەر پەی دلۍ هۊڎەکەی، چاگە وینیش، وەختێ لوا چوۋەر، کابرێوە کەتەی سامڎار ئاما ڕوەشۆ، پەنەش ماچۊ:
عەبدولموتەلیب، ڕوو ئاوەرد وە پەس
جە خەوف ئەو شەخس، نەکېشا نەفەس
لەرزش شیی نە دڵ، وە بۍ چەند و چوون
پەلەپەل، بەرشیی، ڕوو کەرد وە بیروون
مایېل بیی کەرد، قەزا، بی مانع
پەی قەومی قوڕەیش، بەیانی واقع
خەوفش شیی نە دڵ، تەمام کەوت نە دەنگ
هەفت شەو، بۍ زوان، وېنەی لاڵی لەنگ
جەودما، بە ئەمر، حەیی، لا یەنام
شەوێ، هەم زووتەر، وەر جە نمای شام
فرشتانی عەرش، چەو سەر زەمینە
محەمەد)شان بەرد، وە لای (ئامینە))
جوبرەئیل، ئەسباب، گەهوارەش کەرد جەم
تەختەی عوود، تاشا، چەنی چۊی قەڵەم
کەردش پەی محەمەد، بېشکەی موبارەک
خاتر بیی جە غەیب، تەمام تەدارەک
میکائیل، دەسپېچ، جە نوور درووس کەرد
ئیسرافیل یاوا، سەر بېشکەش ئاوەرد
حاملانی عەرش، جە هەر قوماشێ
هەر یەک وە تەرحی نەقش نەققاشێ
ئاوەردەن، بە وار، دەسدەس جە باڵا
فاخیرەی بەهەشت، ئەلوانی ئاڵا
پېچاشان، وە تۊی، تای زەڕبافەوە
وە پارچە پەڕەند، سیمی سافەوە.[1]