داستانۊ جەنگو مېیانو ئاسمانی و زەمینی
نویستەی: میرزا ئۆلقاڎرو پاوەی
بەشۍ نەوەڎ و ششەمە

ئەچی بەشەنە، میرزا ئۆلقاڎرو پاوەی، باس جە سەروەختو ئېستەیۆ محەمەدی کەرۊن، دمای ئانەی پەناشان بەردە پەی لاو ڕاهیبەکا، دماجار باباش چەنی یەرۍ نەفەرا، ڕاو سارایش گرتەوەر، سایەو دارێنە، محەمەدشان ئېستۆ.
ڕەزای من ئېدەن، حەرفم نەکەن ڕەڎ
بکۊشان پەرێ، قەتلی محەمەڎ
پیر جە بتخانە، بەرئاما، وە بەر
وات بە حەلیمە: تۊ هیچ خەوف مەکەر
فەرزەندت خەیلێ شانس عەزیمەن
حەبیبی حەزرەت، دانای قەدیمەن
بشۊ بپەرسە، جە نۊ ئەحواڵش
شاڎ مەبی وەدییەن، دیڎەی جەماڵش
حەلیمە، جەو پیر، یەئس حاسڵ کەرد
هانا، وە عەبدولموتەلیبش بەرد
واتش: محەمەد، جە فڵانە گوزەر
گوم بېیەن، ئیسە، نەداروو خەبەر
عەبدولموتەلیب، دېویا، دەردش
سەرزەمین، تەم بەست، جە ئاهی سەردش
ناڵا، وە زگار، پېچیا، جە دەرد
دەرلا تەشریفش، وە کۊی سەفا بەرد
قەبیلەی قوڕەیش، جەم کەرد، وە سەفدا
هەریەک، ڕاهیی کەرد، وە یەک تەرەفدا
نە مەککەی شەریف، ئەترافش تەمام
گېڵا هەر جە سوبح، تاکە نمای شام
هیچ کەس نەیاوا، جە ئەو نیشانێ
دیارش نەبۍ، جە هیچ مەکانێ
عەبدولموتەلیب، وېش موسەلەح کەرد
تەشریف وە تەواف، بەیتولحەرەم بەرد
موناجاتش کەرد، هەرتا، کە تاوا
دوعاش، وە هەدەف، ئیجابەت یاوا
هاتفێ ئاما، وە گۊشش، دەر لاد
وات: پەی محەمەد، خاتر بکەر شاد
بزان محەمەد، خودایێ دارۊ
جە کوورەی ئاگر، نیگاش مەدارۊ
عەبدولموتەلیب، واتش: ئەی هاتف
محەمەد، جە کۊن، ها جە کام تەرەف
وات: ها جە سارای وادی تەهامە
نە پەنای درەخت، ئاڵای پەڕخامە
نیشتەن پەرێ وېش، بە شادمانی
ساغ و سەڵامەت، پەی تۊ مزگانی
عەبدولموتەلیب، جە کەعبەی ئەنوەر
سیلاحش پۊشا، ڕاگەش، گرت نە وەر
مەسعوود سەقەفی، وەرق بن نەوفەل
عەمرۆ، بی چەنیش، هەرسێ بۍ بەدەل
دیشان، محەمەد، مەحموودی موختار
ها، نەپای درەخت، سەوزی مەرغوزار
دیش، تەنها، نیشتەن، ئەدەب چوون جاران
مەشغووڵەن، چەنی ئەوراقی داران
عەمرو پەرسا لېش، کېنی وە تەنها
واتش: محەمەد، ئیبن عەبدوڵڵا
عەمرو، حەزرەتش وە لای بابوش بەرد
عەبدولموتەلیب، ساکن بیی جە دەرد
دیڎەش، بە جەماڵ، خواجەی کائینات
ڕەوشەن کەرد بە نوور،، شای ئەعلا سیفات
شوکرانەی هەقق کەرد، بە شاڎی و تەرەب
تا بەردش وە لای، ئامینەی وەهەب
ئامینە چوون دیش، ساتێ شیی، جە هۊش
جە دمای ساتێ، باز ئاما، بە هۊش
عەبدولموتەلیب چن ئوشتر، چن زەڕ
دا بە، یەتیمان، عاریانی بەڕ
دیسان، حەلیمە، جە نۊ، غەنی کەرد
جە نۊ، حەزرەتش، هەم بە ئەو سپەرد.[1]