داستانۊ جەنگو مېیانو ئاسمانی و زەمینی
نویستەی: میرزا ئۆلقاڎرو پاوەی
بەشۍ نەوەڎ و هەشتەمە

ئەچی بەشەنە، عومرو محەمەدی یاوان بە شش ساڵی، بەڵام ئی ساڵۍ پەی محەمەدی، هەم بابایش فرە گولەنە، چوونکم ئەچی ساڵېنە، ئامینۍ(ئەڎاو محەمەدی)، جە دنیا بەرشییە.
سا حەزرەت عومرش، چوون یاوا بە شەش
دنیا، جە نوورش، بی بە مونەققەش
چوون فەڕی قدوم، ئەعلای ڕەفیعە
بەردەن، وە مەنزڵ، دارلنافیعە
یەک مانگ، جەو مەکان گوزەران کەردەن
چەنی ئەقاریب، شەو بە ڕۊ بەردەن
ناگاه، جە بازیی، کەچبازی چەپگەرد
ئامینە شەربەت، جامی ئەجەل وەرد
ڕۊحش وە ڕەوزەی ڕیزوان تەشریف بەرد
هەر نەوجا، نەعشش، مەدفوونشان کەرد
حەزرەت دوود، جە فەرق نوورینش خېزا
ئەسرین، جە دیڎەی نەسرینش ڕېزا
دوعای مەغفیرەت، پەی والیدەی پاک
کەردش تەقا، پەی فەردی تەنیای تاک
سیوای جە حەزرەت، ئومولموئمینین
کۊ بی وە باڵاش،خەمین، پەی خەمین
دەرلا، پەی مەککە، موراجەعەت کەرد
حەزرەت، هەم، جە نۊ، چەنی وېش ئاوەرد
عەبدولموتەلیب، حەزرەت دیی بە چەم
گرتش نە باوەش، چوون پەروانە و شەم
پەرێ ئامینە کېشا، ئاهی سەرد
نە پەردەی دەروون، جەرگش جۊش ئاوەرد
جەو دما، پەنا، بە قاپی حەقق بەرد
وېش وە تەربیەت، حەزرەت مەشغووڵ کەرد
جە گاهو بۍگاه، جە وەقت و بۍ وەقت
بیی بە موستەحفیز، ئەو شای بوڵند بەخت
مەوات: محەمەد فەریاد ڕەس مەبۊ
جە گرڎکەس زیاتەر، باڵا دەس مەبۊ
عومری شەریفش، یاوا بە حەفت ساڵ
سیحری ساحیران، یەکسەر کەرد بەتاڵ
چن جە ڕەهبانان، کیتاب ئاوەردەن
عەبدولموتەلیب، با خەبەر کەردەن
واتن: محەمەد نوور لېش مەوارۊ
سیفاتی حەزرەت، ئیبراهیم دارۊ.[1]