باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و یەرەمە
باس جە وەختو مەردەی عەبدولموتەلیبی کەرۊن، باباو محەمەدی وەسیەت پەی نەوەکاش کەرۊن و ماچۊ: واڎەی کوچی دماییمەن، من تەرسم جە مەردەی نېیەن، ئانەن ڕاو گردیمانە، بەڵام تەنیا خەمم(محەمەد)ەن، کېتان مەتاوۊ دمای من هاگاڎارش بۊ و نازش دۊ پەنە؟
ناگاه دەردی سەخت، بیی بە دووچارش
جە ئېشی زامان، بڕیا، قەرارش
میزاجی تەبعش، گېڵا، بە تاڵیی
ئەوقاتی حاڵش، بیی بە بەڎحاڵیی
زانا، واڎەی کۊچ، ئاخر کەردەنش
تەشریف، ئەو هەوار، عەدەم بەردەنش
عەبدولموتەلیب، کېشا، ئاهی سەرد
فەرزەندانی وېش، یەکسەر، تەڵەب کەرد
حازر بین، جە لاش دڵ پەڕ جە وەسواس
نیشتەن، نە دەورش، زکور و ئوناس
واتش: من واڎەی، ها مەرگم یاوا
ئەجەل میهمانەن، پەی جەنگ و داوا
پەی مەردەی هەرگیز، دەغدەغەم نېیەن
ئەی ڕاگە، عالەم گرد پېدا، شییەن
مەر پەی محەمەد، غوسسەم بۊ ئارۊ
بۍ کەس؛ نە پدەر، نە مادەر دارۊ
ئەویچ خۊ مەعلووم، لېتان عەیانەن
خاترم پەی ئەو، هەر پەرېشانەن
کېتان مەتاوین، تەعەهود، کەرین
تەشریفی حەزرەت، لای وېتان بەرین
بەعد، فەوتی من، نیگەهدارش بۊ
چوون، خواجە غوڵام، خزمەتکارش بۊ
چەودەم ئەبولەهەب سوجدەی پدەر بەرد
پەی خزمەتکاریی، حەزرەت، عەهدش کەرد
خەیلێ حەوڵشدا، هەر تاکە، تاوا
ئیلتیماس ئەو، بە نزوول نەیاوا
زبێر، حارس، بە ئەمری پدەر
تەعەهود کەردەن، پەرێ ئەو سەروەر.[1]