بېسارانی
ئېم شەو دڵ جە دەرد، ئېم شەو دڵ جە دەرد
تا سوب سپی بی، هەر ناڵا جە دەرد
پەیوەست مەکېشاش هەناسانی سەرد
هەر سەنگ و ئاهەن، پەیش مەبی وە گەرد
واتم هەی دڵە، وەسەن وەس ناڵە
خەڵکان جە ناڵەی تۊشان شی زاڵە
واتش بېمروەت جە مەیل سەردەنی
چەنی نەناڵۇ، مەر بېدەردەنی؟
جەی وەرتەر قیبلەم، هەر شام، هەر سەحەر
مەنماناش باڵای نەمامی نەوبەر
ئیسە لېڵاوی ئەو نە دیەنمەن
جەو پەی ئاهی سەرد، زاری و شینمەن
ئیسە پەی دۇری قیبلەم مەناڵۇ
گەردی پا و پاڵاش وە مژە ماڵۇ
یە خەیلێ وەختەن لېم نادېیارەن
نە شەو خاوم هەن، نە ڕۊم قەرارەن
کەسێ کە دۊستش نە پېوارش بۊ
چەنی بە شەو خاو، ڕۊ قەرارش بۊ؟
چۇن بېسارانی هەر کەس بېدڵ بۊ
چۇن باخچەی بېئاو، دایېم بېگوڵ بۊ
[1]