باخچێوە بېگەرد
ئاماڎەکەرڎەی: ئەسعەد ڕەشید
بەشەی سەڎ و وېس و پەنجەمە
میرزا ئۆلقاڎرو پاوەی چی بەشەنە باس جە ژیوای محەمەڎی کەرۊن کە چەنی ڕوحەلئەمین بییەن بە موعەلیمش، ئاماڎەش کەرۊن پەی وەرگېرتەی پېخامو ئیلاهی. دیارەن تەمەنو چل ساڵینە پېخام وەستەنەرە پەی محەمەڎی، بەڵام بەپاو ئی بەشەو میرزا ئۆلقاڎری چن ساڵ چاوەڵی خوڎای گۆرە ئا زاتە موبارەکەشە ئاماڎەکەرڎەن، دەروونش ڕۆشنتەر کەردەنۆ، ئاگاڎارش بییەن، پەی ئانەی بتاوۊن ئا بارە قورسەیە هوربگېرۊن کە نە کەشەکې، نە زەمین، نە هیچ چېوێ نەتاواشان بلانە چېرو ئا باریە.
هەر بە عیبادەت، شای فریشتە خۊ
ڕۊ مەکەرد، وە شەو، شەو مەکەرد وە ڕۊ
حوجرەی دەروونش، وە حوکمی شاهی
مەنقووش بیی، بە نەقش زاتی ئیلاهی
ڕۊحەلئەمین، بیی بە موعەلیمش
لەفزی قورئان، کەرد بە تەکەلومش
جە خاودا، عیلمەلیەقین واتەن پېش
ڕەمزی سەماویی ئاشنا کەرڎەن لېش
سینەی بې کینە، ساف و مەحفووز کەرد
شارەزای ئەوزاع، لەوحەلمەحفووز کەرد
یاوا، وە حەڕا، بورجی ڕیسالەت
سوبح جە کۊی بەتحا، شەمسی نبوەت
باڵاش بی بە جای حیلمی ستایېش
وە خاتەم، تەڵعەت، دریا، ئارایېش
جە لوتفی بې چوون، یەزدانی بې باک
فەرقش، قایز بی، بە تاجی لەولاک
دەروونی پاکش، چوون ئاینەی جام
مەنمانا، دنیا، جە قاف تا بە قاف
وەحشی و تیوور و خاک و هەرد و بەرد
یەکسەر، گرد، چەنیش گفتوگۊ مەکەرد
شیرین، حەیاو حیلم، شیرین داد و دەنگ
شیرین خوڵق و خۊ، شیرین شېوە زەنگ
مەولای ڕوداری خاسش فەرماوان
چوون، بە ئیرسییەت، بە حەزرەت یاوان
ئەگەر موعجیزەش نەویا، چېو تەری
جەماڵش وەس بې، پەی پېغەمبەری
ئیپتیدای دنیا، تا وە ڕووی مەحشەر
جوملەی موسەنیف، واسیفان، یەکسەر
گرد وە تەسنیفات، تا وە ڕووی مەردەن
کەس وەسفی حەزرەت، تەمام نەکەرڎەن
غەیر، جە خوڎاوەند، وەسفی ئەو زانان
جە کەلامی وېش، مەدحی ئەو وانان
وەسفش، جە سوحف کەرڎەن، پەی ئادەم
پەی شیت و ئیدریس، دایېم دەمادەم
پەی مووسای کەلیم، دایېم جە تەورات
چن کەرڎەن، سەنای، خواجەی کائینات
پەی نووحی نەبی، دیسان هەم پەی هوود
وەسفش، جە زەبوور، کەرڎەن، پەی داود
چن جار، جە ئینجیل، ئەوسافی خاتەم
خوڎا، کەرڎەن، پەی عیسا بنی مریەم
سی جوزئی قورئان کەرڎەن خەڵاتش
یەکسەر ئیشارەن، جە موعجیزاتش
ئەغڵەب، ڕمووزات پای پەشت بەردەن
خوڎا، حیکایەت، پەی حەزرەت کەرڎەن.[1]