باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چواردەهەمە
ئا شەوە حەزرەت، چەنی چن یاوەرێش جە نزیکو شارو مەککەی مەنزڵشان گېرت، نماشان کەردە، حەزرەت دەسشکەرد قورئان وانای، جە وەشی دەنگی و سەڎا و ئاوازی وەش، حۆت نەفەرۍ جە جڼیەکا هاگاڎارۍ بېنۍ، جڼیەکۍ حەیرانۍ بیۍ، بە دەستورو ئینسانی وېشا فاڕا، ئامێ خزمەتو حەزرەتی.
جڼی نەسیبین تومەز هەفت نەفەر
گۊشدان بە ئاواز سەڎای پېغەممەر
جنییان هەر هەفت وېشان کەرد بە مەوت
هەر تاکە حەزرەت فاریغ بی جە سەوت
وېشان زاهیر کەرد بە وېنەی بەشەر
تا شین وە خزمەت پاکی پېغەممەر
یەکیەک بە خوڎا ئیمان ئاوەردەن
باوەڕ بە حەزرەت ڕیسالەت کەردەن
شای خەتمی پەنا فەرمان دا پېشان
وەقتێ شین وە تەن لای قەوم و خوېشان
قەوما سیللەن بە عەین دەعوەت کەن
بادا زیندەگی بۍمشەققەت کەن
جەو دما فەوریی هەر ئەو هەفت نەفەر
مازوون بین ئەو شەو جە لای پېغەممەر
شین وە نەسیبین وە ماوای وېشان
ئیزهار کەردشان گرد قەوم و خوېشان
غەرەز هەرچی جڼ ئیستیماعش کەرد
بە خوڎا و ڕەسوول ئیمانش ئاوەرد
جە دمای سی ماه جە نەسیین بۍ
هەرچی ئەجڼە ئەو سەر زەمین بۍ
گرد شین وە پابۊس شای خەیرەلئەنام
جەو دما حەزرەت عەلەیهی سەلام
تەشریف وە شەعب جەیحوون بەردەبۍ
وېرانان بە نوور ئاوا کەردەبۍ.
[1]