باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ویس و یەکەمە
بوراق حازرەن، فەرماشا کەرد جە حەزرەتی کە پای موبارەکش بنیۊسەر، حەزرەت تەشریفش دلېش بەرد، بوراق بە وېنەی بەرق تەی بی.
یەکەم مدرگانە، دوۍ کووپۍ پەڕېشا وستېنە خزمەتو حەزرەتی، یۊشان شیر، ئەوشان شەراب، حەزرەت دەسی موبارەکش یاونا بەکووپە شۊتەکەی، ئاردش، بسمللاهیش کەردو نۊششکەرد.
بوراق جەو دەمدا مەکەردش خرۊش
تا جوبرەئیل گرت ڕیکابش وە دۊش
میکائیل عەنان مەحکەم گرت وە کەفف
جەم بیی نە دەورش مەلایەک سەفسەف
جوبرەئیل واتش: یا خەیرولبەشەر
فەرمە و سواربە بە ئەمری داوەر
سالاری مەحشەر شای لەولاک خیتاب
پای موبارەکش نیا وە ڕیکاب
سواربیی وە زین بەرق ئاسای بوراق
وەعەزمی گەردش گەردوونی هەفت تاق
بە ئەمری قادر حەیی ڕەببانی
ڕاهیی بیی چەنی گرۊی ڕۊحانی
هەر چوار موقەڕەب چەنی پېغەممەر
مەواتەن بەخبەخ ئەڵڵاهو ئەکبەر
جە ناگاه دوو زەرف چوون دوڕی خوشاب
یەکێ پەڕ شیر و یەکێ پەڕ شەراب
یاونان بە سەمع شای خەیرولبەشەر
جەی زرووفانە یەکێ قبووڵ کەر
حەزرەت دەرسات دەس پەی زەرفی شیر بەرد
بسم الله وات، شیر تەناول کەرد
جوبرەئیل عەرز کەرد یا خەیرولئەنام
ئەرتۊ شەرابت بنۊشا ئەو جام
زومرەی ئوممەتت بادەخوار مەبی
دمای تۊ یەکسەر گوناهکار مەبی.[1]