باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و ویس و پەنجەمە

جوبرەئیل دەسو حەزرەتیش گېرت، ڕوەو ئاسمان جمێرە، ئیتر یاوێ تەبەقۆ یەکەمی، فەوج فەوج فریشتان ئامان وە خزمەتشان.
خېزا جە مەسجید وە بۍ مدارا
دەستی حەزرەت گېرت، بەردش وە سارا
دیش نەردەبان ئالای شەرەفناک
دووپاش جە زەمین، فەرقش جە ئەفلاک
یەک لاش زمروود، شیرینی دوڵبەر
یەک لاش هەم مەرجان یاقووتی ئەحمەر
پایش یەکایەک جە دوری مەکنوون
سازان وە یەک دەم پادشای بېچوون
فەوج فەوج فریشتان لەتیف ئاڵا
مەیان وە پایېن مشان وە باڵا
حەزرەت تەشریفش چەنی جوبرەئیل
هەم بەو نەردەبان وېیەرد بە تەعجیل
بە تەوفیقی زات، حەیی بۍ بە دڵ
یاوا بە ئەیوان گەردوونی ئەوەڵ
قەولێ واچیان: جوبرەئیل وە باڵ
حەزرەتش هۊرگرت وە بۍ قیل و قاڵ
بۍ غوسسە و خەیاڵ وە بۍوەسواسە
بەرد وە ئاسمان وە یەک هەناسە
جوبرەئیل دەرسات خواجە بېدار کەرد
دەنگی دەققلباب جە کەیوان وېیەرد
دەردەم قاپیەوان پەرسا: تۊ کېنۍ
مەگەر جە مەخلووق ڕووی سەرزەمینی
جەوابدا: کە من ڕوحەلئەمینم
مامووری مورسەل ئەمری زەمینم
دیسان وات: ئانە کېن چەنی تۊ
وات: محەمەدەن شای فریشتە خۊ
واتش: مەگەر حەقق ئەو تەڵەب کەردەن
وات: بەڵ ئیحزار پای پەشت بەردەن
واتش: مەرحەبا وەش ئامای سەڎ جار
سەڵەوات دا بە ڕووی ڕەسوولی موختار
قاپی ئاسمان دەرسات کەردەوە
سوجدەی نووری پاک حەزرەت بەردەوە
تەشریف بەرد وە بان ئاسمانی ساف
چەرخی چەپی واز بەرزی بۍ تەناف.[1]