باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و سی و نۊهەمە

قوڕەیشیەکۍ پەرساشا حەزرەتی: قافڵێ جە ئېمە ڕوەو شام لوێنۍ، گەر ڕاسماچی نامونیشانشان دە پېمان، چن نەفەرەن، ڕەنگی جلشان چېشەن، بارو حاڵشان چەنینەن؟
حەزرەت چەنیش دیېبېنۍ، ئەپاسە پەیش بەیانکەردۍ.
وەختێ کاروان گېڵاوە، کاروانچیەکۍ ئانەی حەزرەتی فەرماوابۍ، سەلەمناشا.
ڕوئەسای قوڕەیش قەبیلەی ئەشرار
دیسان جە حەزرەت کەردەن ئیستیفسار
واتەن: وشتران شیرین تەدارەک
قافڵەی مەخسووس مەککەی موبارەک
جە کۊت دیی بە چەم چېش ئاما پېشان
یا کەی مەیاوان وە یاگەی وېشان
جوابدا حەزرەت: یاوام بە پېشان
جە خاکی نەعیم و بەردم لېشان
پەرساشان لیباس ئەوان چە ڕەنگەن
لیباسی شاڎیی یا ڕەختی جەنگەن
شای خەتمی پەنا نیشانەی لیباس
یەکیەک بەیان کەرد وە کەیف و ئیخلاس
فەرما یەک شوتر بوزی شوخ و شەنگ
جە نەوای قەتار وېنەی پېش ئاهەنگ
مامان وە ڕاوە وە شەوق و شاڎیی
بېپەروا جە خەم ئەی دنیای باڎیی
سوبح چەنی تلووع خورشیدی ئەنوەر
مەیاوان بەجا بە ئەمری داوەر
حەزرەت چوون بولبول جە نەقشی زەمیر
پەی ئەهلی کوففار یەکیەک کەرد تەقدیر
ئەو شەو خوشەوبۍ تاکە شەفەق زەرد
قوڕەیش بە جارێ جەم ئاوەریش کەرد
مدران مونتەزەر پەی تلووعی خور
تاکە جە ئوفق بەربەیۊ وە بەر
شایەد قافیلە نەیاوا وەرۆ
تەکزیبی حەزرەت بکەران جە نۆ
جە ناگاە یەکێ ئەهلی بەڎنەزەر
وات: هەم ئافتاب بەرئاما وەبەر
یەکێ تر واتش: قافیلەیچ یاوا
یەکسەر داخل بیی وە زەید و ماوا
ڕوئەسای قوڕەیش هەڵمەت بەردشان
تەحقیقی ئیخبار حەزرەت کەردشان
کاروانی یەکسەر سۆگەند وەردشان
فەرموودەی حەزرەت ئیقرار کەردشان.[1]