باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و شەسس و یەرەمە
نەفەرێ جە قوڕەیشیەکا تەگبیرش کەرد پەیشان، واتش: محەمەدی حەپس کەرمۍ، نازمۍ دنیای ڕوشنە وینۊ، ڕوێ جارێ کڵاوڕوچنەرە نانش پەی وزمېرە، بەڵام قبووڵشان نەکەرد، واتشان بەنی هاشم ماوەراش وە بەر. نەفەرێ تەریشا واتش: خاستەر ئانەن محەمەدی دەربەدەر کەرمۍ، جە شارو مەککەی دوورش وزمێ.
جە ناگاە هیشام بن عەمروی لەعین
ئاما بە زوبان بە سەڎ قار و قین
واتش: من ئارۊ فیکرێوەم کەردەن
مەحبووسش بکەین تا وە ڕووی مەردەن
قاپی یانەی ئەو هورچنین وە هەم
هەنی ئاسمان نەوینۊ وە چەم
وە سی ڕوژ جارێ نانێ وە ناچار
جە سوراخ بان پېش بوزین بە وار
کەس نەپەرسۊ لېش خوېش و بېگانە
تا هیلاک ببۊ جە حەبسخانە
شېخ نەجدی وات: تۊ دنیات دییەن
یە تەدبیری خاس موناسیب نېیەن
بەنی هاشمی مەزانان خەبەر
دەر ساعەت وە زۊر ماوەراش وە بەر
مەبان وە دوشمن هەزار ساڵەتان
مەشۊ بە ئەفلاک ئاهو ناڵەتان
ئەبوخەیری وات: تەدبیرش ئېدەن
محەمەد هوشش لای ماوا و زېدەن
با یەک دەفعە ئەو بکەین دەربەدەر
هەنی وە مەککە نەکەرۊ گوزەر
کەڵکەڵەی وەتەن، دەردی نەدامەت
هەر داخ بۊ پەرێش تا ڕووی قیامەت.[1]