نەک هەر من
بەشۊ پەنجەمۍ

میرزا ئۆلقاڎر، ئاخر جار پەنا مەبەرۊن بارەگاو (پیر خڎرو شاهۊی) ، دامانش گېرۊن، داواو هیممەتیش چەنەکەرۊن، چەمەڕای هیممەت بڵندی پیرەن، پەنەش ماچۊ: ئەی پیر، پەنا بەرە پەی خزمەتو زاتو هەقی، پەی ئەولادانت دەخیلەن ڕجا کەرە، چونکم ڕجاو تۊ قبووڵەنە. چانەی گرنگتەر میرزا جە بەیتە دمایینەکانە تاریخو نویستەی شېعرەکۍ و قومیاکەیما پەی منویسۊن، کە وەراوەرەن چەنی هەزارو یەرەسەڎ و ویس و چوار ساڵۍ دمای هیجرەتو حەزرەی (1324ک) .
سا یا پیر خڎر شاهی شاهۊ کۊ
مەندەن و‌ە هیمەت بېپایان تۊ
ئەرشەد ئەولاد تۊ گرفتارەن
دووساخ زەنجیر بەند سالارەن
وەکېڵ و مامۊش دیل دەس بەستە
زەلیل و زگار، وە خار و خەستە
وە سەوگەند سەخت شېخ و مەڵڵا گشت
کەفتەن نەتۊڕدام بەڎکاران زشت
ئیسە گرفتار بەند زەنجیرەن
چەمەڕای هیمەت بڵند پیرەن
وە چنگ جەلاد دین دشمەن ماتەن
ئینتزار وە لوتف پای بارەگاتەن
چوون ڕەعدی پەڕجۊش هەور ڕەحمەتێ
نەڕووی مەرحەمەت یا پیر هیمەتێ
پەنا بەر وە لای دەهەندەی داوەر
پەی ئەولادانت دەخیل ڕجا کەر
ئینشاالله یەقین وە بۍ چوون و چەند
ڕجات قبوڵەن جەلای خوڎاوەند
ئەرسەد پاڕەوی تۊشان نەکەردەن
ئسوڵ تۊشان وە ڕا نەوەردەن
بەڵام ڕەنجیدە و بەلاشان واتەن
ڕەحم دنیایی پابەند پاتەن
چوون، کاکە، عەزیز، مەحمود، جافر
مەعسومن یا پیر، ڕەحمێ لېشان کەر
بۍ بابۊ نەبان بەڵ جە سایەی تۊ
نەبان وە یەتیم ئەڵکەی جوانڕۊ
یەک ئەم جار ئامان پیر پاک نەزەر
وەکېڵ و مامۊش ناوەران زەرەر
وە ئیزن مەعبود نەجات دەرپېشان
هەم بیانەوە وە ماوای وېشان
جە چنگ ئەجەڵ بەربشان وەبەر
هەنی عەبد تۊم تا یەومەلمەحشەر
هەردوو وە دڵشاد بەو نەجاتەوە
بەو تووڕەی توغرای شاخەلاتەوە
وە بەچە و عەیال شادمان چەنی هەم
یەکێ پەروانە و یەکێ وېنەی شەم
وەکېڵ وەکېڵ بۊ چوون ساڵان پېش
بکەرۊ دیسان حوکمراِنی وېش
عەبدول غەفور بەگ وە نۊسوار بۊ
دایېم هەر خەریک شاڎیی و شکار بۊ
سەڎای زەمزەمەی شاڎیشان بەرزبۊ
دایېم بەزمشان وە هەزار تەرز بۊ
یا شا عەدوشان خار خەدەنگ بۊ
جەرگش قیمەی تېغ مەودای چل چەنگ بۊ
تاریخ تەفسیل واقعە یاران
مەبۊ بمانۊ پەی یادگاران
(قادر) زندەگیش هەر جەو ئاوازەن
قەباڵەی عومرش نوشتەی تازەن
جە دمای هیجرەت شای بوراق سوار
هەزار و سێسەد چەنی بیست و چوار
دەوران دنیای دوون ۋیەردە بۍ
چەپگەرد وە مەخلوق بازیش کەردە بۍ
باقی وەسەلام هەرکەس بڎۊ گۊش
دۊعای خێر کەن پەی وەکېڵ و مامۊش.[1]