$سەفقەی سەرۆک کۆمار$
#هێڤیدار ئەحمەد#
#15-10-2018#
کاتێ بیستم دکتۆر فوئاد حسێن، کاندیدی پارتییە بۆ پۆستی سەرۆککۆمار، یەکسەر تەلەفۆنم بۆکرد و گوتم دکتور ئەوە ڕاستە؟ بەپێکەنینەوە وتی بەڵێ ڕاستە و چەند ڕۆژی دیکە بە فەرمی ڕادەگەیێندرێت...
تەلەفۆنم داخست، گوتم دەبێ پارتی چۆن لەگەڵ یەکێتی ڕێکبکەوێت، چونکە تا سەر ئێسقان حەزیان لەو پۆستەیە.
دوو ڕۆژ دوای ئەوە بەرپرسێکی پارتیم بینی، گوتم ئەگەر پڕۆسەی هەڵبژاردنی سەرۆککۆمار بکەوێتە نێو پەڕڵەمانی ئێراق لە یەکێتی نابەینەوە، چونکە یەکێتی ئەوەندە وابەستەیە بە ئێراق و شیعە و ئێران، هەرگیز یەکێتی بە هێزێکی دیکە ناگۆڕنەوە، بەڵام بەرپرسەکەی پارتی ڕایەکی دیکەی هەبوو.
دوایی #بەرهەم ساڵح#، کە کەس هێندەی من نازانێت چەند شەیدای ئەو پۆستە بوو، باوەڕبکەن ئامادەبوو هەموو شتێک بکات بۆ بەدەستهێنانی ئەو پۆستە، نەک تەنیا حیزبەکەی و یەکێتی و پارتی و .... مامەڵەی پێبکات، بگرە ئامادە بوو کوردستانیشی لەسەر دابنێ، بەس بۆ ئەوەی بگات بەو پۆستە.
$لە بەغدا چی ڕوویدا؟$
لە #02-10-2018# و پێش هەڵبژاردنی سەرۆککۆمار لە بەغدا چی ڕوویدا و چ ڕێککەوتن کراو و چۆن یەکێتی لێی پەشیمان بووەوە، چۆن فێڵیان لە پارتی کرد و چۆن یەکێتی لەنێو خۆیدا ڕۆڵیان دابەشکرد و هێرۆ ئیبراهیم ڕۆڵی چی بوو، ئەوەی لە هەمووی گرنگتر ڕۆڵی ئەمریکا و ئێران لەم مژارە گەرمەی نێوان پارتی و یەکێتی چی بوو؟
لێرەدا وەڵامی یەک بە یەکی هەموو ئەم پرسیارانە بە زانیاری سەد لە سەد درووست دەدەمەوە. پارتی و یەکێتی و ئێران، ئەگەر بە درووستتر بڵێین، بەڕێز #نێچیرڤان بارزانی#، سەرۆکی شاندی پارتی بۆ گفتوگۆ لەسەر ئەو پۆستە و باڤڵ تاڵەبانی، سەرۆکی شاندی یەکێتی و قاسم سولەیمانی، فەرمانداری گشتیی سوپای قودسی ئێران کە کەس لە بەغدا بەبێ ئەو ئاو ناخواتەوە، لە کۆبوونەوەدا بوون، برێت مەکگۆرک لە دوورەوە ئاگای لە کۆبوونەوەکە بوو کە چۆن ڕێککەوتن بکەن و لەسەر چی ڕێکبکەون.
باڤڵ تاڵەبانی خەمی براکەی بوو (قوباد) کە بەو کورسییە کەمە دەسەڵاتی هەرێمی کوردستان بگرێتە دەست. لە کۆبوونەوەکە دەڵێت یەکێتی ڕازییە واز لە بەرهەم ساڵح بهێنێت و ڕێگەنەدات خۆی کاندید بکات بۆ پۆستی سەرۆککۆماری ئێراق، دکتور فوئاد حسێن کاندیدی پارتی و یەکێتی بێت، بەرانبەر ئەوەی حکومەتی هەرێمی کوردستان دوو ساڵ بە دوو ساڵ بێ لەگەڵ پارتی، بە مەرجێک پارتی ڕازی بێ لەو دوو ساڵەی یەکێتی دەسەڵاتی حکومەتی هەرێمی کوردستان دەگرێتەدەست، #قوباد تاڵەبانی# ببێتە سەرۆکوەزیران.
نێچیرڤان بارزانی بەو پێشنیازەی یەکێتی بۆ کوڕی #مام جەلال# ڕازی بوو. هێرۆ ئیبراهیمیش بە تەلەفۆن لەگەڵ سەرۆک بارزانی و نێچیرڤان بارزانی قسەی کردووە و گوتوویەتی بەهیچ شێوەیەک لەگەڵ ئەوە نیم بەرهەم ساڵح ببێ بە سەرۆککۆمار.
باڤڵ تاڵەبانی دوای ڕێککەوتنەکە یەکسەر پیرۆزبایی لە دکتور فوئاد حسێن دەکات و پێی دەڵێت: پیرۆزە و دەمەوێ بزانین وتاری تۆ چی دەبێت؟ ئایا هەر هەمان ڕۆژ سەرۆک وەزیرانی نوێ (عادل عەبدولمەهدی) ڕادەسپێری. وەک ئەوەی هەموو کارێک کۆتایی هاتبێت و د. فوئاد حسێن دەبێتە سەرۆککۆمار.
دوای ئەوە بە ماوەیەکی کەم برێت مەکگۆرکیش پیرۆزبایی لە دکتۆر فوئاد دەکات و تەنانەت پێیدەڵێت کەی وەزیری دەرەوەی ئەمریکا تەلەفۆنت بۆ بکات؟
دکتۆر فوئاد ئامادەکاری دەکات بۆ ئەوەی بچێتە نێو هۆڵی پەڕڵەمان، کەچی لە پشت ئەو هەموو ڕێککەوتن و گفتوگۆیە، یەکێتی ئامادەکاری دەکات بۆ کاندیدکردنی بەرهەم ساڵح و لەگەڵ لایەنە شیعییەکان و عەرەبە سوننەکان قسە دەکەن بۆ ئەوەی دەنگ بە کاندیدی ئەوان بدەن!
بەرهەم ساڵح و شاندی یەکێتی لەگەڵ شیعەکان و بەشێک لە سوننەکان کاریان لەسەر ئەوە کردبوو کە کاندیدی پارتی مەترسیدارە لەسەر یەکپارچەیی خاکی ئێراق و وایان تێگەیاندبوو، ئەگەر ببێ بە سەرۆککۆمار، لە یەکەم وتاری خۆیدا لەکوبوونەوەی ساڵانە لە بەردەم نەتەوە یەکگرتووەکان داوای جیابوونەوەی کوردستان دەکات لە ئێراق!
جا ئەم دەنگۆیە گەیشتبووە تەواوی کەناڵەکانی ڕاگەیاندنی ئێراقی و کاتێک گفتوگۆیدان لەگەڵ دکتور فوئاد حسێن دەکرد، لێیان دەپرسی چۆن گەرەنتی ئەوە دەدەی کە چوویت بۆ نەتەوە یەکگرتووەکان داوای جیابوونەوەی کوردستان ناکەی؟
لە #01-10-2018# نووری مالیکی و فالح فەیاز هاتنە لای شاندی پارتی و بە دکتور فوئاد حسێنیان گوت گومانێک لای ئێمە درووست بووە کە بچییە نەتەوە یەکگرتووەکان داوای جیابوونەوە دەکەی تەنانەت مالیکی داوای لە فوئاد حسێن کردووە دەبێ دۆکیۆمێنتێک ئیمزا بکەی کە شتی وا ناکەی. تەنانەت گوتبووی سبەینێ ئەو دۆکیۆمێنتە دێنمە لات و ئیمزای بکە.
پێش ئەوەی مالیکی سەردانی شاندی پارتی بکات، بەرهەم ساڵح و شاندی یەکێتی چووبوونە لای مالیکی و گوتبوویان ئاگاتان لێ بێت فوئاد حسێن شتێکی وەها دەکات. ئێوە چۆن پشتگیری دەکەن ببێتە سەرۆککۆمار؟
با بگەڕێینەوە سەر ئەو ساتانەی هەموو شتێک یەکلایی بووتەوە و کاتی هەڵبژاردنی سەرۆککۆمارە لەنێو پەڕڵەمان. دکتۆر فوئاد حسێن لە دارولزیافە دێتە خوارێ، کۆسرەت ڕەسوڵ عەلی لەگەڵ نێچیرڤان بارزانی لە کۆبوونەوەدایە. داوای لە پارتی کردبوو پۆستی سەرۆککۆمار دوو ساڵ بە دوو ساڵ بێ. پارتیش پێیگوتبوو، ئێرە کوردستان نییە، دەبێ لەگەڵ ڕێکارە دەستوورییەکانی ئێرە بگونجێ، ئەویش گوتبووی کەواتە بەرهەم ساڵح کاندیدی ئێمەیە.
فوئاد حسێن دەچێتە پەڕڵەمان و ڕێگەنادەن بچێتە نێو هۆڵی پەڕڵەمان، کەچی بەرهەم ساڵح لەنێو هۆڵی پەڕڵەماندا بوو، داوای دەنگی دەکرد، یەکێتی دوو جۆر نامەی دەنارد بۆ ئەندامەکانی پەڕڵەمان، بۆ شیعەکان نووسیبووی فوئاد حسێن ئینفیساڵییە چۆن دەنگی پێدەدەن؟ ئاگاتان لێبێ، ببێ بە سەرۆککۆمار ئێراق پارچەپارچە دەکات. بۆ سوننەکانیش نووسیبوویان فوئاد حسێن کەسێکی شیعەیە و زۆر مەترسیدارە، چۆن دەبێ سەرۆککۆمار و سەرۆکوەزیران شیعە بن.
ئەمریکییەکان پێش ئەوەی هەڵبژاردن بکرێ بۆ پۆستی سەرۆککۆمار، دەستیان لە بەرهەم ساڵح شووشتبوو، چونکە زانیبوویان بەرهەم ساڵح 100% بەیعەتی بە ئێران داوە و لەگەڵ ئێران ڕێککەوتنی کردووە. تەنانەت بە یەکێتییان گوتبوو نابێ بەهیچ شێوەیەک بەرهەم ساڵح کاندید بکرێت.
بەڵام کاتێ بەرهەم ساڵح خۆی کاندیدکرد، مەکگۆرک بە تەلەفۆن لەگەڵ باڤڵ تاڵەبانی قسە دەکات و دەڵێت ئەمە چییە و چی ڕوودەدات؟ ئەویش دەڵێت: ئەمە مەکتەبی سیاسی یەکێتی کردوویەتی و لە دەسەڵاتی ئێمەدا نییە.
دابەشکردنی ڕۆڵ بووە. تەنانەت باڤڵ تاڵەبانی بە مەکگۆرکی گوتووە: لەگەڵ مەکتەبی سیاسی یەکێتی قسە بکە، بەڵکوو ڕازییان بکەی!.
ئەوەی درووست ڕوویدا، ئەنجوومەنی باڵای ئاساییشی نیشتمانی ئێران کە لەلایەن (عەلی شەمخانی) یەوە سەرۆکایەتی دەکرێ، بڕیاری دابوو کە بەهیچ شێوەیەک نابێ و ناکرێ دکتۆر فوئاد حسێن بکرێ بە سەرۆککۆماری ئێراق، دەبێ بەرهەم ساڵح سەرۆککۆمار بێ و لەو بارەیەوە نابێ هیچ گفتوگۆیەک بکرێت.
$یەکێتی و پۆستی سەرۆککۆمار$
ئیمتیاز و بودجە و پارەی پۆستی سەرۆککۆمار لەنێو یەکێتیدا بەسەر چەند پشکێکدا بەشکراوە، 80% ی بۆ ماڵی مام جەلالە، 20%ی بۆ لاهوور و باڤڵ و کۆسرەت ڕەسوڵ عەلی و بەرهەم ساڵحە. لەو بیست لەسەدە کەمتر لە 5% ی بۆ بەرهەم ساڵحە. ئەوەی پێشبینیدەکرێ و هەر ئێستا دەرکەوتووە، ئەو پۆستە بەڵایەکی گەورە لەنێو ماڵی مام جەلال و ئیبراهیم ئەحمەد و تەواوی یەکێتی دەخولقێنێت. بەرهەم ساڵح دەسەڵاتی سنووردار دەبێ لە بەغدا و هەوڵدەدات لە کوردستان لەنێو یەکێتی لەبەر ئەوەی سەرۆککۆمارە پێگەی بەهێز بکات و لە پێکهێنانی حکومەتی کوردستاندا پشکی باڵەکەی هەبێت، بەڵام هەریەک لە قوباد تاڵەبانی و دایکی و شاناز ئیبراهیم ئەحمەد و #مەلا بەختیار# دەبنە ڕێگری گەورە لە بەردەم گەورەبوونی بەرهەم ساڵح.
شاندی پارتی لەوێ لەگەڵ هیچ لایەنێکی ئێراقی ڕێککەوتنی نەکرد، ئەوان دەیانویست کاندیدێکی کوردستانی هەبێ. ئەوەی لە بەغدا ڕوویدا پارتی پتەوترکرد، بەڵام ئەمە درێژەی دەستکەوتەکانی یەکێتییە لەدوای ڕووداوەکانی 16ی ئوکتۆبەر کە 16ی ئەم مانگە ساڵێکی بەسەردا تێدەپەڕێ و دوور نابینیم یەکێتی پاداشتی دیکەش وەربگرێ!
بەرهەم ساڵح دوای ئەوەی بووە بە سەرۆککۆماری ئێراق، بە دەوروبەری خۆی گوتووە، هەوڵدەدەم لەگەڵ سەرۆک بارزانی ئەو کێشەیە چارەسەر بکەم. بەڵام ئەوەی بیستوومە و ئاگادارم سەرۆک بارزانی بەهەموو لایەنێکی ڕاگەیاندووە، بەهیچ شێوەیەک ئامادە نییە پێشوازی لەو بکات وەک سەرۆککۆماری ئێراق. ڕاستە لە سیاسەتدا هیچ شتێک مەحاڵ نییە و دۆست و دوژمن تاسەر نییە، بەڵام ئەوەی من دەیزانم بەرهەم ساڵح لە #هەولێر# (شخص غیر مرحب به) دەبێت. [1]