نوخشه و شێعرێ
نویستەی: #ڕەئوف مەحموودپوور#
شان بە شانوو هەرزەکاریم باڵا کەروو. دەگا لامۆ برمانگایێ بۍ عارەنەو شاریچ هەڵای خەڵفەو بېیەیش نەڕامێنە. ئەچېگەنە سەرەڕەتێ وەزۆ جەستە، سام قەوارەش وېشرە ماچۊ: سەرگەردانی. چوو دووریچۆ بۍ حڼەریی وەشتەن مۆخوو قەڵەمېوە ئەهریمەنی. تۆفان نیشتەن سفرەی بوغزن.
شان بە شانوو هەرزەکاریم، هەڵای عەشقم گولانەییم ماچۊ پۊرە. خۊ وېت زانیی زاتش بەرزا و باڵاش چەمۍ ئاسمانەکا شی کەرۊوە! لای چەپیچم درەختېوە خەڵفە ڕامۆ، حەوت پەراسوېش زیاتەرێنێ جە ئاڎەمی و حەوا کوا لۆلکېش دانا؟!
ئیتر وەختشا، دەگا پەی وېش هۆربازنۆوە و شاریچ ئەڵڵا بیە بە توون! ئانە نېیا هەرزەکاریم هەڵای تەژنەو هەناسێوەن پەڕ بە شنەو دەمبەیانێ ئەرخەوانیی!
کەیفوو وېم و تۆیچ ئازادە و نەسیم بۊسار! کام ئاسمانا دەگاش شڕە و شارش هەوێڵ جە تەژنەیی؟! ئاوی پەی وېش کنیۆ سەفەر، وەڵڵا تاقەت ئاڼەتەرا و کەمتیارێچ پەڕوو ڕاکێ! ئیتر شێعره و دەسماڵێوە هانه و پیری و چەمبرکانه و تفه و دۆسیی، کام باخەنە ماچا بەهەشت ئەر تۊ نەبی؟!
سەر مڎەوە. چنی بوه و ۋل هەناری یان بریقه و سەرگۆناو تۆ! هەزار شارۍ و دەگێوەنە تاڵەو عەمریم کەروو وەنەن پەی گوزەروو کەلیمێوە پۆ چەماتۆ. تامڵتبۊ تاکو سەفەرێ چنی ئاوێ و گوزەرگایێ ڕۆجیارینی، دەمبەیان هەر پرشنگێوەش گنۆ فیلمێ تاکو کۊساروو سەنگەرێوە مەبارەکی.
هەرئانەنە کە وېت زانی! ئەچېگەولا سەدجارێتەر هۆربازیاوە ئەهریمەنێ، لنگە پاڵێ جە بوختانا و کوتەسیپاڵێ جە ناهەقی وزا سەرڕاو کەلیمێوەم، تازە بۍ خۆن، ئاوی کنیاو و پەڕوو کاسێ هەر کەلیمێ بنجە پێکا، هەرسەو تۆیچۆ وەشەویسی باڵا کەرۊ پەی وەڵاتی و نوخشەو شێعرێ وەنەت پیرۊز.[1]