یەکێتی پاسکیل سواری کوردستان بە هاوکاری لقی یەکێتییەکە لە شاری #هەولێر# و لەسەر شەقامی شێخ توراس، قۆناغی کۆتایی پاڵەوانێتی پاسکیل سواری کچانی یانەکانی کوردستانی بەڕێوە برد.
لەو پاڵەوانێتییەدا و لەسەر ئاستی تازەپێگەیشتووانی کچان کە ماوەکەی 25 کم بوو، کچانی پێشمەرگە توانیان لەسەر ئاستی تیم و تاک نازناوەکانیان بەدەست بهێنن و جامی یەکەمیان هێنایەوە شاری #سلێمانی# و یانەی پێشمەرگە.
سەبارەت بە ئەنجامەکانیان، سیروان سامی ئەحمەد ڕاهێنەری تیمی پاسکیل سواری یانەی پێشمەرگە و ڕاهێنەری هەڵبژاردەی ئێراق بە پێشمەرگە سپۆرتی ڕاگەیاند کە خۆشبەختانە کچانی پێشمەرگەی شاری هەڵمەت و قوربانی توانیان دووبارە نازناوەکان بچننەوە و جامەکان بگەڕێنەوە شاری سلێمانی، ناوبراو ئاماژەی بەوەشکرد کە لەسەر ئاستی تیم و تاک پلەکانی یەکەمیان لەدەست نەداوە و کچانیان پاڵەوان بوون.
هەروەک ئاماژەی پێدا کە ئەم تیمە لەسەر ئاستی وڵاتانی ئاسیا و جیهان توانیویانە بەشداری بکەن و ڕکابەربن و چەندان میدالیایان بەدەست هێناوە، سیروان وتی بەهۆی ئاست بەرزیان هەردوو کیژە یاریزان (زەهرا و سۆزی) لەپاڵەوانێتی ئاسیا ڕکابەر بوون و هەرچی لەپاڵەوانێتی پاسکیل سواری وڵاتی ئیتاڵیایە دووبارە سۆزی وەک یاریزانێکی ئاست بەرز بەشداری کردووە.
لە درێژەی وتەکانی بۆ پێشمەرگە سپۆرت ئەو ڕاهێنەرە پڕ دەست کەوت و خاوەن ئەنجامە ئاماژەی بەوەکرد کە لە تازەترین ئەنجامی دەرەکیان کیژە یاریزانانی تیمەکەمان (لەنیا و لاڤە) لەپاڵەوانێتی عەرەبی کە لە وڵاتی سعودیە ئەنجام درا پلەکانی دووەم و چوارەمیان بۆ هەڵبژاردەی ئێراق بەدەست هێناوە.
دواجار ڕاهێنەری تیمەکەی یانەی پێشمەرگە داواکار بوو کە پاڵپشتی تەواو لە کچە یاریزانانیان بکرێت تا دووبارە لەپاڵەوانێتییەکانی ساڵانی داهاتوودا و لەسەر ئاستی ئێراق و وڵاتانی دەرەوەش ئەنجامەکان بەدەست بهێننەوە.[1]