کورد دلۍ چەرخەکا تاریخینە
بەشۍ: هەشتا و پەنجەمە
نویستەی: #هاوڕێ باخەوان#
ساڵەو (1507ز): قزڵباشەکۍ ئەچی سەدەنە ئەحمەڎ بەگ بوداغ بەگو میرو ئەرجیلیشان شەهیڎ کەردەن. هەر ئەچی ساڵېنە شا ئیسماعیلی سەفەوی دیاربەکرش داگیر کەردەن.
تاریخو (23-08-1514ز) : ئەچی تاریخەنە جەنگو چاڵدێرانی قۊمیان، مېیانو دۆڵەتو عوسمانی و دۆڵەتو سەفەوینە، عوسمانییەکۍ بە یاردی کوردەکا سەرکۆتۍ ملو سەفەوییەکارەو کوردەسان کریا دۋۍ بەشېوە.
ساڵەو (1515ز): ئەچی ساڵېنە چڼیین قۊمیێ ڕوەشان دێنە:
فەرمانڕەوایی سلێمانی دلۍ ناوچەو (قوڵپ)ینە ۋڕان.
ۋڕای دەسەڵاتو ئازیزانی دلۍ ناوچەو جزیرەینە.
فەرمانڕەوایی خێزان ئەچی سەدەنە ۋڕان.
بە فەرمانو سوڵتان سەلیمی یەکەمی دمای جەنگو چاڵدێرانی دلۍ ناوچە کوردنشینەکانە هەژدە میرنشینۍ بنیاڎ نریێنۍ. فەرمانڕەواو شیروانی دلۍ ناوچەو بەدلیسی مەرزیانەرە. فەرمانڕەواو حەسەنکێفی جە وەرکۆتو دیاربەکری ۋڕان.
تاریخو (09-08-1515 ز): مېیانو میرنشینە کوردەکانە و سوڵتان سەلیمی تورکی، پێماڼامێ مۊر کریان، ئا پێمانە بە یاردی مەلا ئیدریس بەدلیسی بېیەن، دمای پاڼزە ساڵا تورکەکۍ چا پێماڼامەیە پەشیمانۍ بیېنێ.[1]