سی و ششەمین ساڵیادو تاوانو کیمیایی وارانو هەڵەبجەی جە ئەوروپا بریا ڕاوە.
نویستەی: #جیهاد هەورامی#
بە سەرپەرشتی ڕېکوزیاو زاگرۆزی و بە ئاماڎە بییەو ژمارێ جە چالاکوانو کورداو نیشتەجا گڵاسگۆی، مەڕاسیمێ بۊنەو سی و ششەمین ساڵیادو تاوانو کیمیایی وارانو هەڵەبجەی بریا ڕاوە.
مەڕاسیمەکە ساڵانە جە کویینزپارکەنە و پاڵو درەختو هەڵەبجەی کە سیمبولو پەنج هەزار شەهیدێ تاوانو (16-03-1988ز)ین ئەنجام دریۆ.
جە مەڕاسیمەکەنە جیا جە کیمیایی وارانو هەڵەبجەی تاوانەکێ تەری دەرهەق بە گەلەکەیما بە نیشانداو چن تابلۆ و نویستەی نمایش کریێ.
سەرپەرشتیاراو مەڕاسیمەکەی ئاماژەشا پانەیە دا کە هەوڵ مدەیمێ جە ڕاو پڕۆژێوە تایبەت نامۍ هەڵەبجەی سەرو شەقامێ تایبەتەنە جە گڵاسگۆی نامۍ بنریۆ و هەر پاسە یاداشتێوە دریۆ پەرلەمانی سکۆتلەندای کە تاوانو کیمیایی وارانو هەڵەبجەی بە جینۆساید بشناسۆ.[1]