هیوا عەبدولکەریم عەزیز ناسراو هیوا فریادڕەس (1978 #هەولێر#) نووسەرو ڕۆژنامەنووس و چالاکوانی مەدەنی، لە هەڵبژاردنی پەرلەمانی کوردستان لە 2009 سەرۆکی لیستی گەنجانی سەربەخۆ بووەو نەیتوانیوە دەنگی پێویست بهێنێ بۆ چوونە پەرلەمان. سەرنووسەری چەند ڕۆژنامەو گۆڤار و سەرۆک و بەڕێوەبەری چەند ڕێکخراو بووە لەنێوان 1997 تا 2014، زیاتر لە (11) کتێبی چاپکراوی هەیە لە بواری لێکۆڵینەوەو ئەدەب و ڕۆژنامەگەری و چەند پێشانگای دۆکیۆمێنتاری کردووەتەوە. چەندین جار لەسەر نووسین و چالاکیە مەدەنیەکانی ڕووبەرووی گرتن و زیندانی کردن بووەتەوە لەلایەن دەزگاکانی ئاساییش لە هەولێرو چەند جاریش هەرەشەی کوشتنی لێ کراوە لەسەر کارەکانی.
لە بواری ڕۆژنامەگەریدا:
- سەرنووسەری مانگنامەی گریانی کوردستان 1998
- ئەندامی دەستەی نووسەرانی ڕۆژنامەی میدیا 2000/2001
- بەرێوەبەری نووسین لە هەفتەنامەی جەماوەر 2004
- بەرپرسی لاپەڕەی کۆمەڵایەتی لە هەفتەنامەی جەماوەر 2005
- سەرنووسەری گۆڤاری هەڵبوون لە 2007/2008
- سەرنووسەری ڕۆژنامەی ماڵان
لە بواری ڕێکخراوەییدا:
- سەرۆکی کۆمەڵەی لاوانی هەتاوی بەیان (نهێنی) 1997
- سەرۆکی ڕێکخراوی بزاڤی ژیان بۆ داکۆکیکردن لە گەنجان 2003 تا 2011
- سەرۆکی پەرلەمانی سەرشەقام لە 2005
لە بواری پێشانگادا:
- کردنەوەی پێشانگای دۆکیۆمێنتاری (نمایشی هەڵفڕینی ڕۆحەکان) بۆ خستنەرووی ڕووداوەکانی کوژران و سووتانی گەنجان و ژنان لە هەولێر، 2006 لە زانکۆی سەلاحەدین و لەناو بازاڕی هەولێر و لە 2008 لە هۆڵی ئاڵا و هۆلچی سەعد عەبدوڵڵا لە 2008.
- کردنەوەی پێشانگای (ئاوابوونی خۆشەویستی) لە 2007 لەبەردەم پەیمانگای هونەرە جوانەکانی هەولێرو لە 2008 لەناو زانکۆی سەلاحەدین.
لە بواری نووسینی کتێب و لێکۆڵینەوەدا:
- ژاوە، شیعر 1997
- تورکمان: کوردی تورکزمان 2001
- بانگ، شیعر 2001
- خەباتێکی تر، ئەزموون و شیکاری 2009
- لەنێوان خۆشەویستی و ئاشوبدا، یاسایی و کۆمەڵایەتی 2010
- کتێبی مەرگ، تەحقیقکاری 2010
- ژن لە ڕۆژنامەگەری کوردیدا، لێکۆڵینەوەی ئەکادیمی 2012
- ولا!تی بێ ساحێب، باس و خواسی سیاسی 2013
- گۆزەی گەوهەر، لێکۆڵینەوەی ئەدەبی، 2013
- ژن و ئایین، وتووێژ، 2014
- ئەمەیە ژیانی ژن، لێکۆڵینەوەی ئاماری 2014
گرتن و زیندانیکردنەکانی:
- بە تۆمەتی وەستانەوە بەدژی قەدەغەکردنی ئاگری نەورۆز، شەوێک زیندانی کراوە لە هەولێر 1997
- بەهۆی دەرکردنی مانگامەی گریانی کوردستان لە 1998 لەلایەن ئاسایشی هەولێر دەستگیرکراوەو چەند ڕۆژ لە زیندانی ئینفرادی و بە گشتی هەشت ڕۆز زیندانی کراوەو مانگنامەکەی لێ قەدەغەکراوە.
- بەهۆی نووسین و بڵاوکردنەوەی کتێبی (تورکمان کوردی تورکزمان) لە 2002 لەلایەن ئاسایشی گشتی لە هەولێر دەستگیرکراوەو نزیکەی دوو مانگ زیندانی کراوە بەبێ ئەوەی ڕێگای بدرێت پارێزەرەکەی یان کەس و کارەکەی چاویان پێی بکەوێت.
- بەهۆی مان گرتن لە دژی کوشتنی ژنان لە زانکۆی سەلاحەدین، لەلایەن ئاسایشەوە دەستگیرکراوە.
- بەهۆی سەرپەرشتی کردنی خۆپیشاندانی پەرلەمانی سەرشەقام دژی گەندەلی لە 2005 لەلایەن ئاسایشی گشتی لە هەولێر دەستگیرکراوەو ئازار دراوە.
- لە 2011 لەلایەن بەرێوەبەری ئاسایشی ڕزگاری لە هەولێر تۆمەتبارکراوە بە هەرەشەکردن و ماوەی پێنج مانگ زیندانی کراوە.