تەها ئەحمەد شەریف، ناسراو بە (تەها کەریمی) ، ساڵی 1975 لە گوندی #بۆیەن#ی سەربە شاری #بانە#ی خۆرهەڵاتی کوردستان، لە بنەماڵەیەکی (وەرزێر) لەدایک بووە. دایکی ناوی (عادڵە فەتاحی) یە کە بە (عەیلێ) ناسراوە.
سەرەتا، خراوەتە بەر خوێندنی ئایینی، دواتر لەگەڵ دایەگەورە و باوەگەورەی و مامی (د. ڕەئووف کەریمی) دا، بۆ شاری بانە چووە، هەر لەوێ، خوێندنی سەرەتایی و ناوەندی و دواناوەندیی تەواوکردووە. هەر لە سەرەتاوە خولیای خوێندنەوەی هەبووە، بە هاوکاریی باوک و دایکی و بە ڕێنوێنیی مامی، جگە لە خوێندنی قوتابخانە، دەستی بە خوێندنەوەی بەرهەمە ئەدەبی و فیکری و مێژووییەکان کردووە و فێری زمانی کوردیش بووە، هەروەها حەزی بە دیوانی شاعیران: هێمن، هەژار، قانع، خەیام. کردووە.
ساڵی 1989، لە کردنەوەی (ئەنجوومەنی ئەدەبیی بانە) دا، کە لەو کاتە یەکەم ئەنجوومەنی ئەدەبیی بانە بووە، بەشدار بووە. هەر لە شاری بانە، پەیوەندی و دۆستایەتیی لەگەڵ نووسەران و چالاکانی وەک #عەتا نەهایی# و #کەریم دافعی# بەستووە.
ئەم تێکەڵبوونەوەیەی بە جیهانی ئەدەبی و ئاڵۆزی ژیانی کۆمەڵایەتی، وای لە تەها کردووە دەست بە نووسین بکا و یەکەمجار بە چیرۆکی (سەمای فریشتەی ڕاستی) دەستی پێ کردووە وەک یەکەم بەرهەمی لە (گۆڤاری سروە- ساڵی 1996) دا بڵاو بووەتەوە.
ساڵی 1994، لە (بەشی پەرستاری- تەکنیسیەنی نەشتەرگەری) ی (زانکۆی پزیشکیی گەیلان) ی شاری (ڕەشت) وەرگیراوە و دوای دوو ساڵ تەواوی کردووە.
ساڵی 1997، بەشداری لە خولێکی ڕاهێنانی یەک ساڵەی (ئەنجوومەنی سینەمای جەوان) دا لە شاری #کرماشان# کردووە. بەمەش لە خولیاکانی نزیک بووەتەوە و هەر لە ساڵی 1997دا، یەکەم سیناریۆی بە ناوی (گەلاوێژ) ەوە نووسیوە کە لە (فیستیڤاڵی فیلمی ڕوستا- ئێران) دا، خەڵاتی سێیەمی سیناریۆی وەرگرتووە.
ساڵی 1998، دووەم سیناریۆی بەناوی (دووبارە هەر سبەینێ) نووسیوە کە لە فیستیڤاڵی سینەمای گەنجان لە تاران وەرگیراوە و چاپ و بڵاوکراوەتەوە. ئەمانە سەرەتایەک بوون بۆ درووستکردنی یەکەم کوورتەفیلمی بەناوی (من و تۆ) وە کە پێش چوونە زانکۆ بەرهەم هاتووه.
ساڵی 1999 و بۆ ماوەی شەش مانگ لە نەخۆشخانەی شاری بانە کاری کردووە، کاتێک هەلی کارەکەی بۆ نوێ نەکراوەتەوە، دووبارە هەوڵی خوێندنی داوە و ساڵانی 2000- 2004، زانکۆی هونەریی تاران- کۆلێژی سینەما و شانۆ، بە فیلمی #کوێستانی سپی#، بە پلەی بیست لە بیست بڕوانامە (بەکالۆریۆس) ی بەدەست هێناوە، لە ماوەی خوێندکاریی زانکۆدا، چوار کوورتەفیلمی (وڵاتی گوڵەبەڕۆژەکان، سەمای مروارییەکان، سنووری ژین، زریان) ی بەرهەم هێناوە.
تەها لە هەوڵی جیدیدا بووە بۆ دامەزراندنی ناوەندێکی سینەمایی و بۆ ئەو مەبەستەش ساڵی 2006، بەرەو هەرێمی کوردستان هاتووە و بە هاوکاریی ڕێکخراوی (منداڵپارێزی کوردستان) ، بەشی (سینەماتیک) ی لە (سەنتەری گەنجان) ی شاری #سلێمانی# دامەزراندووە، دواتریش لە ڕۆژنامەی (کوردستانی نوێ) دا، هەر بەم ناوەوە ستوونێکی بڵاو کردووەتەوە.
ساڵی 2008، لەگەڵ خاتوو (ئەوین شەریفی) دا خێزانی پێک هێناوە و لە شاری سلێمانی نیشتەجێ بووە. ماوەی نێوان ساڵانی 2006 - 2013، کۆمەڵێک کاری هونەریی (درامی و دیکۆمێنت) ی بە ئەنجام گەیاندووە، کە هەموویان بە شێوازێکی جیاواز ڕاستییەکانی ژیان و مێژووی کۆمەڵایەتیی خەڵکی کوردستان و ناوچەکەیان نیشان داوە... هەندێکیان لە ئاستی کوردستان و دەرەوەدا، چەند خەڵاتێکیان بەدەست هێناوە، هەروەها زۆربەی کارەکانی، لە فیستیڤاڵ و چالاکییە هونەری و کەلتوورییەکاندا، جێی تایبەت و شایستەیان بەدەست هێناوە.
لە دوا ئێوارەی کارکردنی لە فیلمی دیکۆمێنتی (دەستنووسەکانمان) دا، بەرەو ماڵ گەڕاوەتەوە و دەمژمێر 8ی ئێوارەی ڕۆژی چوارشەمە (29ی ئایاری 2013) لە ڕووداوێکی هاتوچۆدا، لەسەر شەقامی ئیبراهیم پاشای شاری سلێمانی، ماڵئاوایی لە ژیان و هونەری سینەما کردووە.
تەرمەکەی دوای ئەم مەرگەساتە، بە بەشداریی دۆست و خۆشەویستانی تەها و خەمخۆرانی هونەر، لە شاری سلێمانییەوە بەرەو زێدی خۆی بەڕێ کراوە و لە یەک کاتدا بنەماڵەکەی لە شاری (بانە) و دۆستانیشی لە شاری (سلێمانی) ، پرسەیان بۆ گێڕاوە.
سەرچاوە: پەڕتووکی (#تەها کەریمی.. ئەفسانەی سپیدارێک#) ..ئامادەکردنی: بوار نوورەدین.. لەبڵاوکراوەکانی بەڕێوەبەرایەتی هونەری سینەمای سلێمانی-2013
ئادان [1]