گوندێکە، کەوتووەتە شارەدێی مەیدان، شارۆچکەی #خانەقین#، ئیدارەی #گەرمیان#، پارێزگای #سلێمانی#.[1]

ڕۆژنیوز، بەرهەم و بۆتان
بەهۆی نەخۆشییەوە، #هەنجیر#ی #سەرتەک# پێش ئەوەی پێبگات دەوەرێت و دەترشێت، ئەمەش خاوەن باخەکانی سەرتەکی نیگەران کردووە لە بەری ڕەنجی ئەمساڵیان و زیانگەیاندن بە ناوبانگی هەنجیرەکەیان.
هەنجیری سەرتەک ناوبانگی زۆری هەیە لە باشوری کوردستان و دەوترێت لە هەنجیری ناوچەکانی دیکە زۆر بەتامترە، بەڵام ئەمساڵ هەنجیرەکە پێش ئەوەی پێبگات، بە دارەکەوە دەترشێت و دەوەرێت.
نەبەز هۆرێنی، خاوەن باخ لە گوندی سەرتەک، سەبارەت بە جۆری نەخۆشییەکە و هۆکارەکانی دروستبوونی بە ڕۆژنیوزی وت:گۆڕانکاریی کەشوهەوا و پیسبوونی ژینگە هۆکارێکە، هۆکاری تریشی هەیە، کە تاوەکو ئێستا نە ئێمە ئەو هۆکارە دەزانین، نە فەرمانگە کشتوکاڵییەکانیش توانیویانە بیدۆزنەوە.
هۆرێنی، ئەوەشی خستەڕوو:ئەم نەخۆشییە هەر لە هەنجیرەکانی نەداوە، بەڵکو هەناریشی داوە، هەنارەکانیش ڕەش دەبنەوە و دەترشێن و دەوەرن.
مریەم ڕەحیم، دەیان ساڵە سەرقاڵی باخدارییە لە گوندی سەرتەک، وەک خۆی دەڵێت، هیچ ساڵێک بەرهەمی باخە هەنجیرەکانی هێندەی ئەمساڵ زۆر نەبووە، بەڵام نیگەرانە لە خراپ بوونی بەرهەمەکەی و بۆ ڕۆژنیوز وتی:ئەگەر ئەم نەخۆشییە نەبوایە، ئەمساڵ باخەکەم نزیکەی دوو تۆن بەرهەمی هەنجیری دەبوو.
مریەم ڕەحیم، وتیشی:ئەم نەخۆشییە ساڵانی پێشوویش هەبووە، بەڵام وەک ئەمساڵ نەبووە، چارەسەریشی نییە، حکومەتیش هیچ پرۆژەیەکی نەبووە بۆ خاوەن باخەکان.
بەوتەی خاوەن باخەکان، لە زۆربەی ناوچەکانی دیکەی باشوری کوردستانەوە کڕیار بۆ دەستکەوتنی هەنجیر ڕوودەکەنە سەرتەک، بەڵام وەک خاوەن باخێک دەڵێت، کە خراپی بەرهەمی ئەمساڵی هەنجیرەکەیان، کاری لەسەر ناوبانگیشی کردووە.
فاروق عەلی، خاوەن باخێکی ترە لە گوندی سەرتەک، بۆ ڕۆژنیوز قسەیکرد و وتی:هەنجیری سەرتەک لە هەرێمی کوردستاندا بەناوبانگترین هەنجیرە، لە سلێمانی، کەرکووک، بەعقوبە و هەولێر و زۆربەی ناوچەکانی تریشەوە، خەڵک دێن بۆ ئێرە بۆ هەنجیر کڕین، بەڵام ئەم نەخۆشییە کاریگەری خراپی لەسەر ناوبانگی هەنجیرەکەش دروستکرد.
گوندی سەرتەک دەکەوێتە بناری شاخی بەمۆ، لە سەرتەک نزیکەی 80 باخ هەن، لەزۆربەی باخەکانیشدا هەنجیر چێندراوە، بەوتەی جوتیارانیش بەرهەمی ساڵانەی هەنجیری ئەو گوندە خۆی دەدات لە 60 تۆن.[1]
07-09-2017

بەهۆی هەڵوەرینی بەرهەمی #هەنجیر#، لە #سەرتەک# بەشی زۆری جووتیاران ڕەنج بەخەسار بوون و داوا دەکەن چارەسەری کێشەی هەڵوەرینی بەرهەمەکانیان بکرێت.
کشتوکاڵی #گەرمیان# ڕایدەگەیێنێت لە ڕۆژانی داهاتوو لیژنەیەک بۆ بەدواداچوونی ئەو کێشەیە دەست بەکار دەبن، هەنجیری سەرتەک ناوبانگی زۆری هەیە لە کوردستان و دەگوترێت لە هەنجیری ناوچەکانی دیکە زۆر بەتامترە.
مام حەمید و خانمی هاوژینی تەمەنێکە خەریکی باخدارین. پێکەوە سەرقاڵی چنینەوەی بەری ڕەنجیانن، بەرێک کە پێیانوایە بایی ماندووبوونیان نییە.
حەمید حەسەن باخەوان بە ڕووداوی گوت'' دەڵێین دەرمانی بکەن دەیکەم، دەڵێن بنی دارەکان بکەوە دەیکەم، بەڵام هەربەری دەوەرێ، جاران بەرهەمی دەچوو بۆ نیو تۆن بەڵام ئێستا نیەتی.
خانم مەحموود هاوژینی حەمید حەسەن دەڵێت''جاران ئەم باخەی من 5 کەسم دەهێنا بۆ چنینی بەرەکەی ئەوەندە زۆر بوو، بەڵام ئێستا دانە دانەی دەگەیەت لێی دەکەینەوە بەرهەمی من و پیاوەکەم ئەمڕۆ تەنیا دوو سەبەتەی بچووک بوو.
پێدەچێ گەرمای ئەمساڵ گەرمی بازاڕی هەنجیری نەهێشتبێتەوە. زۆربەی جووتیارانی سەرتەک گلەیی لە هەڵوەرینی بەرهەم و وشکبوونی هەنجیرەکان دەکەن.
نامیق حوسێن، باخەوانێکی دیکە کە ئەویش بەرهەمی هەنجیرەکەی بەزۆری فەوتاوە دەڵێت'' وام دانابوو ئەمساڵ یەک تۆن هەنجیر گەڵبگرم، بەڵام بڕوا ناکەم 100 کیلۆشی هەبێت، سەرم سوڕماوە نازانم چیەتی دکتۆرێک نیە بڵێ ئەمدەردە چیە.
هەنجیری سەرتەک یەکێک لە بەنێوبانگترین هەنجیرەکانی کوردستانە کە کڕیارە تایبەتەکانی بەرەو باخەکانی سەرتەک ڕادەکێشێت.
سیروان فایەق، کە هاتووەتە ئەو ناوچەیە بۆ کڕینی هەنجیر بە ڕووداوی گوت: هەنجیری سەرتەک خاوەنی تام و بەرامەی خۆیەتی، لە زۆربەی هەنجیرەکانی کوردستان بەتایبەت هەڵەبجە و ئاکرێ خۆشترە، بەڵام بەداخەوە ئێستا تووشی نەخۆشی بووە.
کشتوکاڵی گەرمیان لە ڕۆژانی داهاتودا لیژنەیەکی بەدواداچوون بۆ دۆزینەوەی نەخۆشی دارهەنجیرەکانی سەرتک پێکدەهێنن.
نەبەز جەهانگیر، بەڕێوەبەری کشتوکاڵی گەرمیان بە ڕووداوی ڕاگەیاند: باخەوانەکان کەم پەینی کێمیایی بەکار دەهێنن بۆ ئەوەی ئەو دارە هاوسەنگی خۆی ڕابگرێت، ئێمە بۆ دۆزینەوەی کێشەکەش لە چەندرۆژی داهاتودا لەگەڵ کشتوکاڵی مەیدان قسەدەکەین بۆ پێکهێنانی لیژنەیەک بۆ دۆزینەوەی نەخۆشی سەرەکی دارەکان.
لە سەرتەک 80 باخ هەن. زۆربەیان دارە هەنجیریان تێدا چاندراوە و ساڵانە نزیکەی 60 تۆن بەرهەمی هەنجیریان هەیە.[1]
03-09-2017