" 13هەمین ساڵیادی کوشتاری کۆمۆنیستەکان بەدەستی سەرکردایەتی یەکێتی"
13ساڵ بەر لە ئێستا،دوای ئەوەی کە بەرەی فراوانی ناڕازی ئازادیخوازان و پێشکەوتنخوازی دەرەوەو ناوەوەی کوردستان ڕێگای دادگایان بۆ قەدەغەکردنی هەڵسوڕانی ئاشکرای حزبی کۆمۆنیستی کرێکاریی عێراق لەبەردەم یەکێتی نیشتیمانیدا داخست،سەرکردایەتی ئەو حزبە بە ڕابەری(نەوشیروان مستەفا) ڕێگای ناڕەوای گێچەڵی سەربازیان هەڵبژارد.
دوای گەمارۆدانی سەربازی بارەگاکانی حزب و دەستگیرکرنی دەیان کەس لە هەڵسوڕاوان و دۆستانی حزب و بڕینی ئاووکارەباو تەلەفۆنی بارەگاکان و ماڵەکانی دراوسێی، بارەگاکانی حیزب، ڕێک لەوکاتەدا کە وەفدی ڕابەری حزب لە گفتوگۆدا بوون لەگەڵ جێگری سکرتێری گشتی یەکێتیدا، هێزەکانی یەکێتی لە بۆسەیەکی لە پێشدا ئامادەکراودا لەگەڕەکی عەقاری، دەستڕێژی گوللەیان لە سەیارەیاکی حزب کردو هاوکاتیش هێرشیان بۆ سەر بارەگای کۆمیتەی ڕابەری ڕێکخراوی کوردستانی حزب دەستپێکرد. بەم شێوەیە پەڵەیەکی ڕەشی تریان خستە سەر مێژووی لێوان لێو لە تاوانیان و بەڕۆژی ڕووناک و بە بەرچاوی خەڵکەوە پێنچ هاوڕێی ئێمەیان تیرۆرکرد.
بەڵام تاوانەکەیان هەر لێرەدا کۆتایی نەهات. سەرکردایەتی یەکێتی بە ڕابەری (نەوشیروان مستەفا) دوور لە کەمترین پرەنسیپی ئینسانی و لەترسی نارەزایەتی جەماوەر، هەر ئەو شەوە لاشەی بێگیانی هاوڕێیانمان دەکەن بەژێر گڵەوەو ئێمەو کاسوکاری هاوڕێیانمان لە دوا نیگاو ماڵئاوایی هاوڕێکانمان و جگەرگۆشەکانیان بێبەش دەکەن!
ئامانجی یەکێتی لەم کردەوە ڕەزیلانەیە بەسادەیی لە شکاتنامەکەی لیوا(نەزەر عەلی ئەکبەر) لە حیزبی کۆمۆنیستی کرێکاری لە دادگای سلێمانی ئاشکراکراوە. لەو شکاتنامەیەدا ئەوە هاتوە کە حزبی کۆمۆنیستی کرێکاری داوای سەربەخۆیی کوردستان و یەکسانیی ژن و پیاوو گۆڕینی یاسای باری کەسێتی عێراقی دەکات، بۆیە دەبێت هەڵسوڕانی ئەو حزبە قەدەغە بکرێت! سەرەڕای ئەوەی کە تەنیا چەند خولەکێک پێش کردنەوەی ئاگری چەکەکانیان،(نەوشیروان مستەفا) بە زمانی خۆی بە وەفدی حزبی وتبوو: (ئێمە فشاری حکومەتی بەعس و جمهوری ئیسلامی ئێرانمان لەسەرە کە نابێت ئێوە هەبن، ئێمەش شەڕی ئەو دوانەمان پێناکرێت). دوای تەنها دوو ڕۆژ لە هێرشەکە، جمهوری ئیسلامی سوپاسی تاڵەبانی کرد.
ئەمڕۆ 13ساڵ بەسەر ئەو کارەساتەدا تێدەپەڕێت و زیاتر لە دوو ساڵیش بەسەر تۆمارکردنی سکاڵای یاسایی ئێمەدا لە دادگای سلێمانی بۆ بە دادگایی کێشانی خوڵقێنەرانی تاوانی 14-07-2000دا گوزەر دەکات و تا ئێستا بەرەوپێشەوەچوونێکی ئەوتۆ لەم دۆسیەدا بەدەر ناکەوێت. ماوەیەکی دوورو درێژ دادگا بێدەنگەی لە سکاڵاکەی ئێمە کرد بەبەهانەی ئەوەی بەڵگەی پێویست لە بەر دەستدا نیە. پاشان بۆمان ئاشکرابوو، کە نەوشیروان مستەفاو هاوەڵەکانی لە سەرکردایەتی ئەوکاتی یەکێتی، هەموو ئەو بەڵگەنامانەی کە کوژرانی ئەو هاورێیانە بسەلمێنێت فەوتاندوەو تەنانەت لە فەرمانگەی(دادوەری پزیشکی)ش تۆمارنەکراون، کە ئەمەش تاوانێکی گەورەی ترە! بۆیە ناچار بووین دووبارە بە ئامادەبوونی نوێنەری دادوەری پزیشکی و ئاسایش و دادگا بەڵگەنامەی پێویست و یاسایی کە سەلمێنەری ئەوەیە ئەو هاورێیانە بە فیشەک کوژراون بخەینەوە بەر دەستی دادگا. ئێستا ئیتردادگا لەبەردەم ئەزمونێکی مێژوویدایە کە سەربەخۆیی و شەرعیەتی خۆی بسەلمێنێ.
دۆسیەی ئاوات و ئامانج و ئارەزوویەک کە هاوڕێیانی ئێمە لە پێناویدا بوونە قوربانی ودەسەڵاتی هاندا
ئەوتاوانە ئەنجام بدات، لە هەموو کاتێک کراوە ترە. نەبەردی ی17شوباتی دوو ساڵ بەر لە ئێستای جەماوەرو قووربانیەکانی پێمان دەڵێت ئەو دۆسیەیە لە هەموو کاتێک کراوە ترە. ناڕەزایەتی قووڵی کرێکاران و دەستەنگانی کۆمەڵگەو ژنانی ستەمدیدەو لاوانی دڵ پڕ لەهیوای کوردستان پێمان دەڵێت لە هەموو کاتێک کراوە ترە. هەربۆیە پێداگری لەسەر بەدادگایی گەیاندنی بکوژانی 14/7 ڕاوەستانە لە سەرنگەری خەبات بۆئازادی و یەکسانی و خۆشگوزەرانی.
ئیمە بەتووندی ئومیدمان بە هاتنەمەیدانی ئەو لەشکرە گەورەیە لە جەماوەری ناڕازی کوردستان هەیە کە پارێزگاری لە ڕۆڵەکانی خۆی بە ئەرکی خۆی دەزانێت و بە هەق خەو بە ژیانێکی شایستەی ئینسانیەوە دەبینێت.
گومانێک لەوەدا نیە،ئەگەر هەموومان بتوانین بکوژانی 14/7 بدەینە دادگایەکی عادیلانە،جگە لەوەی کە دۆسیەی زیاتر لە22 ساڵی پڕ لەتاوانی دەسەڵاتدارانی ئێستای کوردستان دەکەوێتە سەر پشت، هاوکات ڕێگە نادرێت کە مشتێک دەستەوتاقمی تاوانباری مێژوو ڕەش چارەنووسی ئێستاو ئایندەی منداڵەکانمان دیاری بکەن.
لە یادی 13 ساڵەی کوشتاری هاوڕێیانماندا بەدەستی سەرکردایەتی ئەوکاتەی یەکێتی، بانگەوازی خەڵکی کوردستان دەکەین کە بۆئەوەی لە ژیانێکی ئارام و ئاسودە بەهرەمەندبن، دەبێت، سیستەمی سیاسی و دەسەڵات لە کوردستان لە بکوژانی هەزاران ژن، لە بڕیاردەران و سەبەبکارانی شەڕی ناوخۆو کوشتاری هەزاران کەس، لە بکوژانی سەدان هەڵسوراوی سیاسی و ئازادیخواز پاک بکرێتەوە.
ناکرێت کەسانێک کە تا ئانیشکیان بەخوێنی ژنان و هەڵسوڕوانی سیاسی و نەیارانی یەکتری سوورە و دەبێت چاوەڕێی دادگاو زیندان بن، کەچی دەسەلاتدارو حوکمڕانی خەڵک بن. خەڵکی کوردستان شایستەی ئەوەن لە لایەن نوێنەرانی ڕاستەقینەو خەباتکاری خۆیانەوە دەسەڵاتدارێتی خۆیان بەڕێوەبەرن.
مەکتەبی سیاسی
حیزبی کۆمۆنیستی کرێکاریی کوردستان
11ی تەموزی 2013