یادداشتێکی بەپەلەی ئەنجومەنی باڵای کاروباری خانمان سەبارەت بە ڕەوشی دژواری ئاوارەکانی شنگال
بەڕێز/
• سکرتێری گشتی نەتەوە یەکگرتووەکان
• ئەندامانی ئەنجومەنی ئاسایشی نێودەوڵەتی
• لێژنەی بارودۆخی ژنان لە ڕێکخراوی نەتەوە یەکگرتووەکان CSW
• دەستەی ژنان لە ڕێکخراوی نەتەوە یەکگرتووەکان UN-Women
• ئاژانسەکانی UNAMI- UNDP- UNICEF- UNHCR- UNESCO- IOM – WFP
• گشت کونسوڵگەری و نوێنەرایەتییە نێودەوڵەتییەکان
• لێژنەی سیداو
• رێکخراوی نێودەوڵەتی بۆ چاودێری مافەکانی مرۆڤ (HRW)
• رێکخراوی ئەمنستی ئینتەرناشیوناڵ
• ئەنجومەنی کۆمکاری عەرەبی
• رێکخراوی کۆنگرەی ئیسلامی
• ئەنجومەنی هاریکاری کەنداوی عەرەبی
• یەکێتی نێودەوڵەتی ڕێکخراوەکانی خاچی سوور و مانگی سوور
• کۆمیتەی خاچی سووری نێودەوڵەتی
• رای گشتی جیهانی....
ماوەی چەند مانگێکە بەهۆی شەڕی تایفەگەری و مەزهەبییەوە، سەدان هەزار خێزانی عێراقی ڕووبەڕووی سەختترین بارودۆخی ژیان دەبنەوە لەلایەن گرووپە چەکدارە توندڕەوەکانەوە، ڕۆژانە هاووڵاتیانی سیڤیل دەکەونە ژێر مەترسی کوشتن و سوکایەتی پێکردن و دەستدرێژی سەخت.
دواترین ئەو زنجیرە تاوانانەش ڕووداوەکانی ئەم چەند ڕۆژەی دوایی بوو، کە بەرامبەر خەڵکی سیڤیلی یەزیدی لە ناوچەی شنگال ئەنجامدرا، ئەم بارودۆخەش بووە هۆی ئەوەی بەسەدان خێزان ماڵ و حاڵی خۆیان بەجێبهێڵن و زۆربەیان ڕوو لە ناوچە ئارامەکانی هەرێمی کوردستان بکەن و ماڵ و حاڵیان بکەوێتە دەست گرووپە چەکدارەکانی داعش، سەرەڕای وێرانکردنی کەلەپووری مێژوویی ڕەسەنی ئەو پێکهاتەیەی، کە خەڵکی ڕەسەنی ناوچەکەن و شێواندنی پەرستگە و پیرۆزییەکان، ژمارەیەکی زۆر بەدڕندانەترین شێوە بکوژرێن و ئافرەتانیش لە تەمەنی نۆ ساڵییەوە وەک کۆیلە برفێندرێن و لە بازاڕەکان بفرۆشرێن یان بە بەرچاوی خەڵکەوە دەستدرێژی بکرێتە سەریان لەگەڵ چەندین تاوانکاریی تر کە دوورن لە بەهاکانی مرۆڤایەتییەوە.
ئەوەی ئێستا بەرامبەر بە پێکهاتەی یەزیدی دەکرێت کە خەڵکی ڕەسەنی ناوچەکەن، جینۆسایدێکی ڕاستەقینەیە بۆ نەهێشتنی ئەو پێکهاتەیەو گشت کلتوور و پیرۆزییەکانیان.
بەهۆی ئەم بارودۆخە دژوارەوە بەدەیان منداڵ و بەساڵاچوو بەهۆی ئاوارەبوونیان بۆ سەر چیای شنگال، بەهۆی برسیەتی و تینوویەتی گیانیان لەدەستداو بە سەدانی تریش بەهۆی ئەم ڕەوشە دژوارەوە ڕووبەڕووی مردن و نەخۆشی و مەترسی دەبنەوە، ڕۆژانە ژمارەی ئاوارەکان بۆ هەرێمی کوردستان لە هەڵکشاندان و ژنان و منداڵان لە بارودۆخێکی ئەوتۆدادەژین کە کاریگەری مەترسیداری لەسەر دواڕۆژی نەوەیەکی تەواو کردووە.
هەروەها ئاسەواری کۆمەڵایەتی سەخت لەسەر کۆمەڵگەی کوردستان بەجێدەهێڵێت.
داواتان لێدەکەین وەک ئەرکێکی مرۆیی بەپەلە ئەم هەنگاوانە جێبەجێ بکرێت:
1- کۆمەڵگەی نێودەوڵەتی هاوکاری گەلی کوردستان بکەن لە ڕووبەڕووبوونەوەی تیرۆر.
2- فشار بخرێتە سەر حکومەتی عێراق کە بە پەلە بگەیەندرێتە سەر چیای شنگال بۆ ڕزگارکردنی ئەو خەڵکە لە مردن لە بەر بێ ئاوی و بێ خۆراکی.
3- داوا لە وڵاتانی کۆمەڵگەی نێودەوڵەتی دەکەین کە هاوکاری مرۆیی بەپەلە و زیاتر بۆ ئەو ئاوارانە دابین بکەن کە لە ڕەوشێکی زۆر دژواردا، لە ناوچەکانی تری کوردستان، ژیان بەسەردەبەن.
4- رێکخراوی نەتەوە یەکگرتووەکان لەگەڵ وڵاتانی ئەندامی ئەنجومەنی ئاسایشی نێودەوڵەتی هاوکاربن، بۆ چارەسەرکردنی ئەو بارودۆخە ناهەموارەی ئەو ناوچانە.
دامەزراوەکانی حکومەتی هەرێمی کوردستان لەوانەش ئەنجومەنی باڵای کاروباری خانمان، هەماهەنگیان لەگەڵ ئاژانسەکانی نەتەوە یەکگرتووەکان و ڕێکخراوە نێودەوڵەتییەکان هەیە، هەروەها لەسەر ئاستی ڕێکخراوە کوردستانییەکان کاری فریاگوزاری بەپەلە بەڕێوەدەچێت، بەڵام ئەرک و پێداویستییەکان زۆر لەسەروو ئەم توانایەوەیە.. سەرەڕای هەلومەرجی سەختی دارایی هەرێمی کوردستانیش بەهۆی بڕینی بودجەوە لەلایەن حکومەتی عێراقی، خەڵکی کوردستان و حکومەتی هەرێم بەگشت دامەزراوە فەرمییەکانەوە هاوکاری ئەو خێزانە ئاوارانە دەکەن، بەڵام گرفتەکە زۆر لەوە گەورەترە و لە توانای حکومەت و خەڵکی مرۆڤدۆستی کوردستان و هیچ حکومەتێکی تری دنیا دانیە کە بەتەنها ڕووبەرووی ئەو ڕەوشە ببێتەوە، هەروەها ڕووبەرووبوونەوەی تیرۆر ئەرکێکی نێودەوڵەتییەو پێویستی بە هەماهەنگییەکی نێودەوڵەتی هەیە.
ئەنجومەنی باڵای کاروباری خانمان
05-08-2014