عەدنان کوڕی عەبدوڵڵا عەباس نعێمیە، لەتەمەنی 23 ساڵیدا و لە 17-06-2014 لەگەڵ فەرماندە سەربازییەکەی لەهێزەکانی پێشمەرگەی کوردستان بەناوی نەقیب فاروق، بەهەڵە دەکەونە بازگەیەکی تیرۆریستانی #داعش#ەوه و دوای چەند هەفتەیەک، لەرێی گرتەیەکی ڤیدیۆییەوە شەهیدکردنەکەیان بەسەربڕین بڵاودەکەنەوە، ئەوەش یەکەم هەنگاوی دڕندانەی لەوشێوەیەی ڕێکخراوەکە بوو بەرانبەر پێشمەرگە لەوکاتەدا.
شەهید عەدنان و فەرماندەکەی، لەناوچەکانی سەعدیە و #جەلەولا# بەهەڵە کەوتنە ناو داعش، ئەوەش دوای هەفتەیەک بوو لەداگیرکردنی موسڵ و سەعدیە تاوەکو چەند ناوچەیەکی #کەرکووک# لەلایەن ئه و ڕێکخراوەوە، هێشتا لەگەڵ هێزەکانی پێشمەرگەدا نەکەوتبوونە ڕوبەڕوبوونەوەی بەرفراوان.
عەدنان عەبدوڵڵا ناسراو بە (سەید عەدنان)، لەسەیدەکانی عەشیرەتی نعێمی-ین لەپێکهاتەی عەرەب، لە 03-10-1991 لەشاری #کفری# لەدایکبووە و لە 06-01-2009 پەیوەندی کردووە بەهێزەکانی پێشمەرگەی کوردستان، لەلیوای سێی پیادەی #گەرمیان# فەوجی یەک سریەی دوو بووە.
رێکخراوی داعش، لەمانگی حەوتی ساڵی 2014دا، گرتەیەکی ڤیدیۆیی بڵاودەکەنەوە و تێیدا شەهیدکردنی عەدنان و فەرماندەکەی نیشاندەدەن.