پاش 24 سال لە دەسەڵاتی بۆرژوا- ناسیۆنالیستی کوردو ڕاپێچکردنی کۆمەڵگای کوردستان بۆ ناو دەیان گێژاوو کارەسات‌و نەهامەتی‌و کێشکردنی بەناو چەندین سیناریۆی تەڵخ و قەیران و بنبەستی یەک لەدوای یەک، سەرجەم جومگەکانی ئەم دەسەڵاتە نوقمی قەیران‌و ڕوبەرووی ناکامی‌و بنبەست بوونەتەوە. سەرەتاییترین بنەماو پێوانەکانی ئەو دیموکراسیە پەرلەمانیەی کە جێگای شانازییان بوو خرایە ژێرپێوە. سەرۆکی پەرلەمان وەدەرنرا و ئەو بەناو بەرزترین دامەزراوە یاساییەی کوردستان لەکارخرا. کورسی سەرۆکایەتی هەرێم تەنانەت بەدوور لە پێوانە و یاسا پەسەندکراوەکانی خۆیان ڕاشکاوانە لەلایەن بنەمالەوە قۆرخکرا. دەرپەڕاندنی وەزیرەکانی کابینەی حکومەتە بنکەفراوانەکەیان دواپەردەی بەگالتەجاڕکردنی سەرجەم ئەو یاساو ڕێسا دیموکراسیە پووچەبوو کە کرابووە ماسکێک بۆ دەسەڵاتی میلیشیایی حزبە ناسیۆنالیستەکان. ئیستا ئیتر ئەم دەسەڵاتە میلیشیاییە نەک هەر هیچ وەڵامێکی بۆ قەیرانە کەڵەکەبووەکان‌و ئەو کێشانە نیە کە یەخەی جەماوەری خەلکی کوردستانی گرتوە، تەنانەت هیچ ئاسۆیەک بۆ دەربازکردنی دەسەڵاتەکەی خۆشیان لەم بنبەستە شک نابەن.
دوای ئەو ڕوداوانە ئییر گومانێک نەمایەوە کە بانگەشەی سیستەمی پەرلەمانی و دەستاودەستکردنی دەسەڵات لەرێگای پەرلەمان ‌و بەدامەزراوەییکردنی دەسەڵات و ئۆرگانەکانی حکومەت بێجگە لە بڵاوکردنەوەی خۆشباوەڕی و پەلەقاژەیەکی فریوکارانە بۆ ڕتووشکردن‌و جوانکردنی سیمای ناشیرینی دەسەڵاتی میلیشیایی ئەحزابی بۆرژوا ناسیۆنالیستی کوردی شتێکی دیکە نەبوو.. ئێستا بزوتنەوەی گۆڕان و هەردوو حیزبی ئیسلامی سیاسی کە دەهۆل کوتانیان بۆ چاکسازی کردبووە ڕیگای بەشداربوونیان لە دەسەڵات و سامانی بەتاڵانبراوی کۆمەلگادا، باجی خۆشباوەڕکردنی جەماوەر بە دەسەڵاتی میلیشیایی بەشێوەیەکی گشتی‌و کڕینی شەرعیەت بۆ دەسەڵاتی پارتی‌و بنەماڵەیی بارزانی دەدەن. بەڵام لەلایەکی دیکەوە شکست و بنبەستی حکومەت‌و پەرلەمان و بێئاسۆیی حیزبە بۆرژواییەکانی پێکهێنەری حکومەت لە پەیداکردنی ڕێگاچارەیەک بۆدەربازبوون، کێشەو ناکۆکیەکانی نێوانیانی قوڵترکردۆتەوە‌و لەگەڵ ناکۆکی و بێ ئاسۆیی خۆشیاندا کۆمەڵگایان بە خۆیانەوە بەرەو سەرگەردانی‌و بێ ئاسۆیی و بێ ئومێدی پاڵ پێوەناوەو بونەتە مەترسی بۆسەر ژیان و گوزەرانی خەڵکو تاریککردنی ئایندەی سیاسی و کۆمەڵایەتیان. ئەمانە بێجگە لەوەی قوتی ژیانی خەڵک‌وگوزەران‌و خزمەتگوزاری‌و ئایندەی خەڵکیان بە ململانێ‌و ڕێکەوتنەکانی نێوان خۆیانەوە گرێداوەتەوە، هاوکات و بۆ هەمان مەبەست چارەنوسی سیاسی کوردستانییان لە چوارچێوەی فیدراڵیزمێکی قەومی کۆنەپەرستانەو شکستخواردوودا، بەستۆتەوە بە دەسەڵاتی کۆنەپەرستانەی قەومی-ئیسلامی عێراقی نقوم بوو لە شەڕی تائیفی و ململانێی قەومیدا. بەم جۆرە کوردستانیان کێشکردوە بۆناو گێژاوی سیاسی و ململانێ ناوچەییەکان و بەرژەوەندی دەوڵەتە ئیقلیمی و ئیمپریالیستیەکان‌، کە ئاسۆیەکی نادیارو تاریک دەخاتەبەردەم ئەم کۆمەلگایە.
حیزبی کۆمۆنیستی کرێکاریی کوردستان لە چەند ساڵی ڕابردوودا هەمیشە پێداگری لەسەر ئەوە کردوە کە گرفتی ئێستای کوردستان، گرفتاربوونێتی بە گێژاوێکی سیاسی گەورەوەو دوو هۆکاری سەرەکی لە پشتی ئەم گیژاوەوە ڕاوەستاون: یەکەم ؛دەسەڵاتی میلیشیایی داسەپاوی حزبە ناسیۆنالیستەکان بەسەر ژیانی سیاسی و کۆمەڵایەتی خەڵکدا، دووەم؛ لکاندنی فیدراڵیانەی کوردستان بە دەسەڵاتی قەومی-ئیسلامیەوە لە ناوەند. بەبێ دەرهێنانی کوردستان لەم گیژاوەو وەلانانی ئەو دوو هۆکارە، هەر جۆرە پروپاگەندەیەکی چاکسازی‌و گۆڕانکاری پووچە و هیچ باشبوونێکی جدی لە ژیانی مادی و مەعنەوی خەڵکی کوردستاندا ئیمکانی نیە.
حزبی کۆمۆنیستی کرێکاریی کوردستان لە ڕوانگەی بەرژەوەندیەکانی کرێکاران و جەماوەری ستەمدیدەو ئازادیخوازی کوردستانەوە، لە جەرگەی ئەم بنبەست و لێشاوی قەیرانەی کە کۆمەڵگای نوقمی پشێوی و بێدەرەتانی کردووە، جارێکی دیکە پێداگری لەسەر ئەوە دەکاتەوە کە ڕێگاچارەی دەستبەجێ و کارساز پێکهێنانی دەوڵەتێکی سەربەخۆی ئازادو سیکولارو غەیرە قەومیە لە کوردستان. بەبێ کۆتاییهێنان بەم گرفتە سەرەکیەی کۆمەڵگای کوردستان، ئەڵقەی بێمافیەکانی خەڵک لەبابەتی بێمووچەیی، نەبوونی خزمەتگوزاری، پێشێلکاری و سەرکوتی سیاسی، پڕوپاگەندەکانی ئەم حیزبانە بۆ خۆدزینەوە لەژێرباری بەرپرسیارێتی بەرامبەر بە خەڵک و فڕێدانی خەتاکان بۆسەر یەکتری و بۆسەر حکومەتی ناوەندی وەکو ئەڵقەیەکی بۆکۆتایی دوبارە دەبێتەوە.
سەرچاوەو هۆکاری نەبوونی مووچەو خزمەتگوزاریەکان‌و سەرجەم بێمافیەکانی دیکەی خەڵک، گەندەڵی و تاڵانوبڕۆی داهاتی کوردستان، دەسەڵاتی میلیشیایی بۆرژوازی کوردو بەستنەوەی فیدرالیانەی بەزۆری چارەنوسی سیاسی کوردستانە بە دەسەڵاتی قەومی-ئیسلامی کۆنەپەرستانەی عێراقەوە. بۆیە خەباتکردن بۆ بەدەستهێنانی ئەو مافانە بەدابڕاوی لە خەبات بۆ کۆتاییهێنان بە بارودۆخی سیاسی ئێستا و دامەزراندنی دەوڵەتێکی سەربەخۆ ئاکامێکی ئەوتۆی نابێ.
حزبی کۆمۆنیستی کرێکاری بانگەوازی خەڵکی کوردستان دەکات کە لەپاڵ خەبات بۆ وەرگرتنەوەی مافە سەرەتاییەکانیان هەر لەم دەسەڵاتە میلیشیاییە و توندکردنەوەی نارەزایەتیەکان و ڕێکخراوکردن‌و فراوانکردن و سەراسەری کردنەوەیان، پێویستە هاوکات خواستی پێکهێنانی دەوڵەتێکی سەربەخۆ و بەرێخستنی خۆپیشاندان‌و چالاکی سیاسی جەماوەری دەیان هەزار کەسی لە ناوخۆ و دەرەوەی کوردستان بکەنە ئەڵقەی تەواوکاری ناڕەزایەتیەکانی ئێستایان. پێویستە دەنگێکی دیکەو هێزێکی دیکە بێتە ناو کایەو هاوکێشە سیاسیەکانی کوردستان و ناوچەکەوە، ئەویش هێزی جەماوەری خەڵکی کوردستانە لە ڕیزێکی سەربەخۆ لە بۆرژوا-ناسیۆنالیستی کورد بۆ خواستی پێکهێنانی دەوڵەتی سەربەخۆ.
دەوڵەتێک کە یەکەم بڕیارەکانی بریتی بێت لە:
１- داماڵینی حیزبەکان لە هێزی چەکدارو قەدەغەبوونی هەجۆرە چالاکیەکی چەکداری حیزبەکان. لەجێگەیدا دروستکردنی هێزی چەکداری جەماوەری لەژێر فەرمانی حکومەتی هەڵبژێردراوی خەڵکدا.
２- بەرقەرارکردنی ئازادیی سیاسی، ئازادی بیروڕا، دەربڕین، ڕێکخراوبوون، خۆپیشاندان و مانگرتن.
３- یەکسانیی ژن و پیاو لە بوارەکانی یاساو ژیانی کۆمەڵایەتی و ئابوری و سیاسی کۆمەڵگادا.
４- جیاکردنەوەی دین لە دەوڵەت‌و لە پەروەردەو فێرکردن. قەدەغەکردنی هەموو هێما ئاینیەکان لە شوێنە گشتیەکاندا.
５- دیاریکردنی لانی کەمی مووچە بەجۆرێک کە ژیانێکی هاوچەرخ و سەربەرز بۆ هاوڵاتیان دابین بکات.
６- دابینکردنی خانووی گونجاو بۆ سەرجەم ئەو هاوڵاتیانەی کە بێخانوون بەجۆرێک کە 20% مووچەی کرێکار و کارمەند زیاتر نەبێ.
７- دابینکردنی هەلی کار و کاری گونجاو بۆ بێکاران بەتایبەتی گەنجان یان دانی بیمەی بێکاری تێروتەسەل و گونجاو لەگەڵ ئاستی ژیانێکی هاوچەرخ و شایستەدا.
８- دەستبەسەراگرتنی موڵکی سەرجەم ئەوانەی کە بەدزی و تاڵانکردنی داهاتی گشتی سامانیان بۆ خۆیان پێکەوە ناوەو دانی گەندەڵکاران بە دادگا. ئەو داهاتەی بەو جۆرە بەدەستهاتووە، دەگەڕێتەوە بۆ خەزێنەی دەوڵەت و بەکارهێنانی بۆ دابینکردنی مووچەو بیمەی بیکاری‌و خزمەتگوزاریە شارستانی‌و تەندروستی‌و کۆمەلایەتیەکان و بۆ باشکردنی ژیانی هاوڵاتیانی کوردستان.
９- کۆنترۆڵکردنی کەرتی نەوت و داهاتی نەوت لەلایەن دەوڵەت و دابینکردنی شەفافیەتی دارایی و داهات و پەیڕەوکردن لە سیاسەتی بودجە بەجۆرێک کە لەخزمەتی هاوڵاتیانی کوردستاندا بێت. دابینکردنی کۆنترۆڵی جەماوەری بەسەر سەرچاوەکانی داهات لە کوردستان.
حیزبی کۆمۆنیستی کرێکاریی کوردستان
30-10-2015