دواڕۆژ، شوان خورشید
بەپێی ئامارێکی پۆلیسی کەرکووک بێت لە ساڵی 2015دا 642 هاوڵاتی و پۆلیس و هێزە ئەمنییەکان و حشدی شەعبی بونەتە قوربانی، بەڵام ئاماری قوربانییەکانی هیزەکانی پێشمەرگە بڵاونەکراونەتەوە.
پۆلیسی کەرکووک لەو ئامارەدا ئەوەی ئاشکرای کرددووە کە لەماوەی ساڵی ڕابردودا چوار ئۆتۆمبێلی بۆمبڕێژکراوو ماتۆڕسکیلێک و 51 بۆمبی چێندراوو 80 موشەک و کاتوێشا لە کات و شوێنی جیاوازی شارەکەدا تەقیونەتەوەو 30 بۆمبیش لە لایەن پۆلیس و هیزە ئەمنییەکانەوە پوچەڵ کراونەتەوە.
هەر بەپێی ئامارەکەی بەهۆی تەقینەوەو توندو تیژی و پێکادانەکانەوە، 31 هاوڵاتی و 24 پۆلیس و شەش کارمەندی ئاسایش و 39 چەکداری حەشدی شەعبی گیانیان لەدەست داوە، جگە لەبرینداربونی 92 هاوڵاتی و 85 پۆلیس و 14 کارمەندی ئاسایش و 220 چەکداری حەشدی شەعبی.
ئامارەکەی پۆلیسی کەرکووک ئاماژەی بە چەند حاڵەتێکی تر کردووە لەوانە 49 حالەتی کوشتن بە شێوازی جوراوجۆر تۆمار کراون لەگەڵ ڕفاندنی 55 کەس و دۆزینەوەی 82 تەرمی نەناسراو لە شوینە جیاوازەکانی شارەکەدا.