لە ساڵی 1997وە دەنوسێت و لە شاری #ڕانیە# دادەنیشێت، لە ژیانی ئەدەبی خۆیدا چوار کتێبی چاپکراوی هەیە، خاوەنی دە خەڵاتی ئەدەبییە، شیعرەکانی، وەک خوناوی بەیانیان هەمیشە تەڕ و تازەن.
لە فیستیڤاڵەکانی گەلاوێژ لە #سلێمانی# و فیستیڤاڵی فانی لە ڕانیە، فیستیڤاڵی پەڕەموچ لە #کەرکووک#، پلەی یەکەمی بەدەستهێناوە، جگە لە بەدەستهێنانی چەند خەڵاتێک لە پەی دووەم دا، هەروەها خاوەنی ستایلی تایبەت بەخۆیەتی لە نوسین داو بەردەوام گۆڕانکاری لە فۆڕمی نوسینەکاندا دەکات، ئەو وردە لە چنین و قوڵە لە واتاو خێرایە لە دەربڕین. دەتوانێت لە ڕستەیەکدا دەلالەتی قەسیدەیەکی درێژ بدات بە دەستەوە، ئەمە بەقسەی ئەو خوێنەرە جدیانەی سەرنج لە دەقەکانی دەدەن. هەوادارێکی کەمی هەیە، بەڵام هەوادارەکانی کەسانی خاوەن ڕۆشنبیرین لەنوسینداو زۆر جار دەڵێت: (من ڕاوی جەماوەر ناکەم، بەڵکو نوخبەیەکی ئەدەبی پەسندم بکات بەسمە). ئەو شاعیرە تا ئێستا چەندێک لە شیعرەکانی وەرگێڕدراونەتە سەر زمانی عەرەبی و ئینگلیزی و فارسی، ئەندامی یەکێتی نووسەرانی کوردستانە، ماوەتەوە بوترێت، لە ئێستادا خوێندکاری بەشی عەرەبی ئێوارانە لە کۆلیژی پەروەردەی بنەڕەت، لە زانکۆی ڕاپەڕین.
- لە ڕۆژی 25/3/1980 لە شاری ڕانیە لە دایکبووە.
- ناوی تەواوی: سدیق عەلی عەبدوڵڵا.
- باوک و باپیری و باپیرە گەورەی تا حەوت پشت مەلا بوون، بۆیە بەر لەوەی بچێتە قوتابخانەی سەرەتایی، لەلای باوکی وانەی قورئانی خوێندوەو چەند مانگێکیش نێردراوە بۆ حوجرە، ئەو لە تەمەنی منداڵیدا چەند بەهرەیەکی هەبوە، بەڵام بەهۆی سەختی ژیان و نەبونی هاوکاری، تەواوی بەهرەکانی پوکاونەتەوە، لە چالاکی قوتابخانەدا، بە کاری وێنەکێشان و نواندن و گۆرانی، بەشدار بووە، پاشان لە قۆناغی ناوەندی چەند چیرۆکێکی نووسیوەو مامۆستایانی قوتابخانەکە هانیان داوە بەردەوام بێت، بەڵام وەک خۆی دەڵێت دۆخی ئەو وابوو، پێویستی بە ژانرێک بوو بتوانێت بە لوغز، ئەوەی لە خەیاڵیدایە بیڵێت.
- لە ساڵی 1986 لە قوتابخانەی ئاکۆی سەرەتایی، دەستی کردوە بە خوێندن، تەواوی ساڵەکانی خوێندنی سەرەتایی، یەکەم بووە، بەهۆی پیشەی مەلایەتی باوکیەوە، لە چەندین قوتابخانەی جیاجیا خوێندویەتی، چونکە باوکی بۆ مەلایەتی لە شوێنێک جێگیر نەبوە.
- لە ساڵی 2001، خوێندنی ئامادەیی تەواو کردوە.
- لە ساڵی 2002 بۆ خوێندنی دبلۆم لە بواری ڕۆژنامەگەری چۆتە شاری سلێمانی، پاشان چەند ساڵێک لە سلێمانی ماوەتەوەو کاری ڕۆژنامەنوسی کردووە.
- لە ساڵی 2006 دا گەڕاوەتەوە شاری ڕانیە و ژیانی هاوسەرگیری پێکهێناوە.
- لە ژیانی منداڵی و هەرزەکاریدا بە شاگردی و ساردەمەنی فرۆشتن و میوە فرۆشتن و حەمباڵی، توانیویەتی کەمێک بارگرانی خێزانەکەی کەم بکاتەوە، بۆیە وەک خۆی دەگێرێتەوە کاتێک تەمەنی پازە ساڵ بووە، بۆتە شاگرد لای وەستایەکی دۆندرمەو مانگانەی کارەکەی ڕێک داوەتە پێداویستی ماڵەوەو بەشی قژ چاک کردنێکی بۆخۆی هەڵنەگرتوە، لە سەرەتای تەمەنی گەنجێتیدا باری سەختی گوزەران و خەونی خنکاوو شەڕی ناوخۆ و چەند هۆکارێکی دیکە، بەهرەی شیعری لای ئەو دێننە جۆش و چەند دەقێکی شیعری دەنووسێتن پاشان بە شەرمەوە پیشانی شاعیرە بە ئەزمونەکانی شاری ڕانیەی دەدات و ئەوانیش مژدەی ئەوەی دەدەنێ، کە توانا شیعریەکانی باڵان.
- لە ساڵی 1999 یەکەم کۆمەڵە شیعری خۆی چاپکردووە و دەنگدانەوەیەکی باشی هەبووە و بوەتە هۆی ناسینی چەندین شاعیری ناودار لەسەر ئاستی هەرێمی کوردستان.
- لە ساڵی 2002 بەملاوە، بەشداری فێستیڤاڵ و پێشبڕکی شیعریەکان کردووە و و چەندین خەڵاتی بەدەستهێناوە.
- لە ساڵی 2005 خەڵاتی یەکەمی فیستیڤاڵی پەڕەموچی لە شاری کەرکووک بەدەستهێناوە.
- لە ساڵی 2006 خەڵاتی یەکەمی فانی لە شاری ڕانیە بەدەستهێناوە..
- لە ساڵی 2008 خەڵاتی یەکەمی فیستیڤاڵی گەلاوێژی لە سلێمانی بەدەستهێناوە.
- لە ساڵی 2004 بوەتە ئەندامی دەستەی نووسەرانی ڕۆژنامەی ئاڵای ئازادی و لە چەندین ڕۆژنامەو گۆڤارو وێبسایتی دیکەدا، نووسین و بەرهەمەکانی بڵاو دەکاتەوە.
- تا ئێستا چەند شیعرێکی وەرگێڕدراونەتە سەر زمانەکانی عەرەبی، فارسی، ئینگلیزی، ئەڵمانی و سویدی.
خاوەنی چەند بەرهەمێکی چاپکراوە، لەوانە:
- چەندە غەریبین بەدوای نەوارەکانی نون دا، ساڵی 1999.
- شەش، ساڵی 2001.
- من و پەنجەرە ئێوە خۆش، ساڵی 2004.
- کەوتنە خوارەوە لە تۆ، ساڵی 2012.
- برادەر، ساڵی 2020.