ڕێکخراوی ڕوانگەی سوریی بۆ مافەکانی مرۆڤ ئاشکرایکرد، تائێستا لەشەڕی ناوخۆیی سوریادا 465 هەزار کەس کوژران و ونبوون بەگوێرەی ئەو داتایانەی لای ڕێکخراوەکە هەیە.
شەڕو ئاڵۆزییەکانی سوریا شەش ساڵ پێش ئێستا بەخۆپیشاندان دژی ڕژێمی بەشار ئەسەد دەستیپێکرد و دواتر گۆڕا بۆ شەڕێکی ناوخۆیی سەخت و ڕێکخراوی داعش توانی ناوچەیەکی بەرفراوان لەخاکی ئەو وڵاتە بخاتە ژێر دەستی خۆیەوەو ئەو وڵاتەی توشی گەورەترین قەیرانی کۆچبەران کرد لەجەنگی جیهانی دووەمەوە.
ڕوانگەی سوریی کەرێکخراوێکی چاودێرییکاری ڕەوشی مافی مرۆڤە لەسوریاو بنکەی سەرەکیی لە شاری لەندەنە ئەمڕۆ ئاشکرایکرد، ئەوان لەسەرەتای دەستپێکردنی شەڕی سوریاوە مردنی زیاتر لە 321 هەزار هاوڵاتیان دۆکیومێنت کردوە 145 هەزار کەسی دیکەش باس لەوە دەکرێت ونبووبن.
ڕوانگە ئاماژە بەوەشدەکات، لەنێو کوژراوەکاندا زیاتر لە 96 هەزار کەسی مەدەنی هەن، هێزەکانی حکومەت و هاوپەیمانەکانی زیاتر لە 83 هەزارو 500 هاوڵاتیان کوشتووە، لەنێویاندا زیاتر لە 27 هەزارو 500 بەهۆی بۆردومانی ئاسمانی و 14 هەزارو 600 کەسی دیکەش لەزیندان لەژێر ئەشکەنجەدا کوژراون.
هەروەها باسیلەوەشکردووە، بۆردومانەکانی گروپە ئۆپۆزسیۆنەکانی حکومەتی سوریاش کە لەژێر ناوی سوپای ئازاد یەکیان گرتووەو دژی ڕژێمەکەی بەشار ئەسەد شەڕ دەکەن، 7 هەزار کەسی مەدەنیان کوشتووە.
هەرچی لەبارەی داعشەوەیە زانیارییەکانی ڕوانگەی سوریی ئاماژە بەوە دەکەن چەکدارانی ئەو ڕێکخراوە توندڕەوە زیاتر لە 3 هەزارو 700 کەسی مەدەنیان کوشتووەو هەروەها تورکیاش کە پاڵپشتی سوپای ئازاد دەکات لەباکوری سوریا، 500 هاوڵاتی مەدەنی کوشتووە.
حکومەتی سوریا و ڕوسیای هاوپەیمانی ڕەتی دەکەنەوە کەسانی مەدەنیان کردبێتە ئامانج یاخود لەزیندانەکاندا ئەشکەنجە بەکاربهێنێت و لەدەرەوەی یاسا کەس کوژرابێت. هەروەها زۆرینەی گروپە ئۆپۆزسیۆنەکان و تورکیاش بەئامانجگرتنی کەسانی مەدەنی لەشەڕی سوریادا ڕەت دەکەنەوە.
13-03-2017