لە شارەدێی #حاجیاوا#، ژنێک، کە بە میوانیی چووبووە ماڵی دایکی هاوسەرەکەی، لەلایەن هاوسەرەکەیەوە کوژرا.
پێش نیوەڕۆی ئەمڕۆ، لە گەڕەکی دابان-ی شارەدێی حاجیاوای سەر بە شارۆچکەی #ڕانیە#-ی ناوەندی ئیدارەی ڕاپەڕین ژنێک کوژرا.
لەبارەی ڕووداوەکەوە، شۆڕش ئیسماعیل، وتەبێژی پۆلیسی ڕاپەڕین بە ڕۆژنیوزی ڕاگەیاند:بە وتەی هاوسەری ژنەکە، لەکاتی خاوێنکردنەوەی چەکی جۆری کڵاشینکۆف، فیشەک لەدەستی دەرچووە و بەر سەری هاوسەرەکەی کەتووە و بەوهۆیەوە گیانی لەدەستداوە.
وتەبێژی پۆلیسی ڕاپەڕین، ڕاشیگەیاند:ئەم خێزانە دایک و باوکی (4) منداڵن وە دانیشتووی شاری هەولێر-ن، بە سەردان هاتبوون بۆ ماڵی دایکی پیاوەکە لە حاجیاوا.
شۆڕش ئیسماعیل، وتیشی:دوای ئەوەی هێزەکانمان گەیشتوونەتە شوێنی ڕوداوەکە، پیاوەکە خۆی ڕادەستی پۆلیس کردووە.
سەبارەت بە ناسنامەی کوژراوەکە، ناوبراو، وتی:تەمەنی 30 ساڵە و ناوی (ق. ڕ. ج)ە.
شۆڕش ئیسماعیل، وتیشی:دۆسیەی لێکۆڵینەوە بۆ ڕووداوەکە کراوەتە و لێکۆڵینەوە بەردەوامە.
جێگای ئاماژەیە، ڕووداوەکانی کوشتن و خۆکوشتن و خۆسوتاندن لە دەڤەری ڕاپەڕین بە ڕێژەیەکی زۆر زیادی کردووە و لە ڕۆژی 28ی مانگی ڕابردوو دووژنی گەنج، یەکێکیان لە شارەدێی سەروچاوە و ئەوی دیکەشیان لە شارەدێی چوارقوڕنە خۆیان سوتاند و هەر ئەو ڕۆژە یەکێکیان گیانی لەدەستدا و ئەوی دیکەشیان ڕۆژی دواتر گیانی لەدەستدا.
هەروەها، ڕۆژی 5ی ئەم مانگەش، ژنێکی گەنجی تەمەن 18 ساڵ لە شارەدێی حاجیاوا لە ماڵەکەی خۆیاندا بە سێ فیشەک کوژرا.[1]
#09-12-2017#