ئەڤ سالە، بازارێ کرِین و فرۆتنا پارچەیێن ئەردی ل #دهۆک# ب رێژەیا نێزیکی 30% بلندبوویە، کەسێن ڤی کاری دکەن گرانبوونا ئەردی بۆ نووچەیێن خۆش یێن ئابۆری ڤەدگەرینن.
پارچەیێن ئەردان ل دەڤەرێن ئێتیت، زرکا‌، حەوشکێ، مسێریکێ، دەوروبەرێن تەناهی، بازارەکا گەرم هەیە کو پارچە ئەردێن باش نێزیکی 15 هزار دولاران لێ زێدەبووینە.
جەلال جمال، خۆدانێ نڤێسینگەها (نیداء) ل تەناهی بۆ دواڕۆژ گۆت خرابترین پارچەیا ئەردی یا 200م. ل مسێریکێ (25 وەرەقە) لێ زێدەبووینە، ل حەوشکێ ژی (80 وەرەقە).
ناڤبۆری خوەیاکر پتریا ئه و کەسێن دوو مەهێن دەربازبووی پارچەیێن ئەردان ل نڤێسینگەها مە کرین ژن بوون، چنکو ژ بەر نەمانا پارەی وان زێرێن خوە دفرۆتن و چەند پارە بۆ خەرجیێن خوە دهەلگرتن، پارێ زێدە ژی دکر پارچەکا ئەردی پێدکرین.
ل پارێزگەها دهۆک ژ سالا 2003-ێ تا 2014-ێ، کرین و فرۆتنا پارچەیێن ئەردی، ئێک ژ باشترین کاران بوو، لێ بڕینا بودجەیا هەرێما کوردستانێ ژ ئالیێ ئیراقێ و شەڕێ داعش، بۆ ئەگەرێ گرتنا گەلەک نڤێسینگەهێن کرین و فرۆتنا ئەردوخانییان.
رەشید موسا، شارەزا د بازرێ پارچەیێن ئەردی دا ل دهۆک بۆ دواڕۆژ گۆت مەترسی هەیە جارەکادی بهایێ پارچەیێن ئەردی پشتی بهارێ بهێتە خوارێ، یان ل ڤی ئاستی راوەستیت، چنکو بهایێ ئەردی ب رەنگەکێ گەلەک بلەز ل 2 مەهێن بوری بلندبوویە، چنکو دەنگۆباسێن ئابووری یێن خۆش هەبوون.
لدۆر هەمان مژار، کاوە عەزیز، ئابۆری ناس بۆ دواڕۆژ ئینازمان نێزیکبوونا حکومەتا هەرێما کوردستانێ و ئیراقێ، مزیگنیا هنارتنا مووچەیێن 2 وەزارەتێن هەرێما کوردستانێ ژئالیێ بەغدا، دەستپێکرنا گەشتێن بالەفڕگەهێن هەرێما کوردستانێ، ئەگەرێن سەرەکینە کو لڤین کەڤتییە بازارێ ئەردی.
ناڤبۆری دازانین ئه و مووچەیێ بەغدا دهنێریت تێرا بازارکرنێ ب ئەردان ناکەت، لێ دێ جورئەت بۆ وەلاتیان چێبیت پارێ خوە یێ هەلگرتی بێخیتە بازارێ کرین و فرۆتنا ئەردان.
بەری نوکە، رەجەب گیزی، رێڤەبەرێ گشتیێ کاروبارێن شەهیدان ئەنفالکریان بۆ دواڕۆژ گۆتبووزێدەتر ژ 500 پارچەیێن ئەردان ل سنوورێ پارێزگەها دهۆک لسەر کەسوکارێن شەهیدان هاتینە دابەشکرن.
هەرێم جەمیل، ل نڤێسینگەها دیار دوێ باوەرێدابوو، دابەشکرنا پارچەیێن ئەردێن شەهیدان ل سنووری پارێزگەها ئێک ژ ئەگەران بوو کو بازارێ کرین و فرۆتنا ئەردی ل دهۆک بلڤیت.
زێدەربای رازیبوونا سەرۆکێ وەزیرێن ئیراقێ لسەر هنارتنا مووچەیێن وەزارەتێن پەروەردێ و ساخلەمیێ یێن هەرێما کوردستانێ، لێ تا نوکە ئه و مووچە نەهاتینە دابەشکرن و دهێتە پێشبینیکرن ب دابەشکرنا وان مووچەیان بهایێ پارچەیێن ئەردی ل دهۆک بلندتر ببیت.[1]
#17-03-2018#