نووسینی: محەمەد فەتحوڵڵا گولەن
وەرگێڕانی: دەستەی وەرگێڕانی #دەزگای چاپ و پەخشی کانی عیرفان#
لە ڕۆژگارێکی وادا دەژین کە پێویستە لە باسکردنی بابەتە ئیمانی و ئیسلامییەکاندا زیاتر گرنگی بە بۆچی بدەین وەک لە چۆن. ئەمەش بە ئەندازەی ئەو حەقیقەتانەی کە دەمانەوێت بە کەسانی دیکەی بگەیەنین، ڕاست و واقیعییە. هیچ ژیرییەکی ساغ و ویژدانێکی ڕوون کە توانای پێکهێنان(ترکیب)ی هەبێت -نەک تەنها پۆڵێنکردن(تصنیف)- ناتوانێت نکووڵی لەم ڕاستییە بکات. چونکە لەم سەدەمەدا زانست و فەلسەفە، هێزی پێشکەوتن و دۆزینەوە نوێیەکانی شارستانێتییان خستووەتە شوێنی خۆیان و، هێرشێکی ترسناکی بە تامی دۆزەخ دەکەنە سەر ئەو ئیمانە توبائاسایەی کە دەبێت ڕەگەکەی لە مێشکدا و، لق و پەل و میوە و بەروبوومەکانی لە دڵدا بن.