لۆدڤیگ فتگنشتاین
وەرگێرانی: دکتۆر حەمید عەزیز
2015
لە جیهانبینی لودڤیک ڤتگنشتایندا، چۆن فەلسەفە ڕۆڵی دیکەی پێ سپێردراوە و ئەرکی نوێی خراوەتە ئەستۆ، لقەکانیشی لەلایەن خۆیانە پریشکی ئەو ئاگرەیان بەرکەوتووە، ئەو لقانە هەر لە لۆجیکەوە تاوەکوو تیۆری زانین لە ڕووخسار و ناوەڕۆکدا تەپ و تۆزی بۆماوەی ڕابردوویان لێ تەکێنراوە و مشتوماڵا کراونەتەوە و کاڵایەکی دیکەیا بەبەردا بڕاوە. کە باسی تیۆری زانین لای ئەو فەیلەسوفە دەکرێ، وێنەی جیهان و وێنەی لۆجیکی و پەیوەندی هەردووکیان بە هەردوو بابەتی هزر (بیر) و زمانەوە لە مێشکدا وێنا و لەبەرچاودا بەرجەستە دەبێت. کەواتە مەبەست لە هەردوو وێنەی جیهان و لۆجیک چییە و چ پەیوەندییەکیان پێکەوە و بە هەردوو بابەتەکەی دیکەوە هەیە؟!
هیچ گومان لەوەدا نییە کە پەیوەندییەکی توندوتۆڵ لەنێوان هزر و زمان و لۆجیک و جیهانی دەوروبەردا هەیە، بەپێی بابەتەکەش سروشتی ناوەڕۆک و ڕووخساری ئەو پەیوەندییە دیار و دەستنیشان دەکرێ. [1]