مووچەیێ تە چەندە؟!!
نەوزاد پیرموسا
پسیارێن مایتێکرنێ کارتێکرنێ لسەر مێشکێ مرۆڤان دکەت و ب تایبەتی ژلایێ مایتێکەرانڤە، رۆژانە مرۆڤ توش دبیتن. هندەک مرۆڤ ھەنە ژیان لدەف وان یان ژیانا تە وەک (پسۆلەیا ژمێریاریێ تەماشە دکەن و پسیارێن خوە یێن مایتکرنێ تێدا بکاردئینن: وەکی بوچی تە ھاوسەرگەری نەکریە یان تە بۆ شوی نەکریە؟ بۆچی تۆ ھاتیە بەردان؟ بۆچی سەرێ تە کەچەلە یان پرچاتە وەریایە؟ یان تو یێ بێ خێر بی؟ یان کێشا لەشێ تە زێدەبوویە؟ یان بوچی دەرسۆکێ دپۆشی؟ یان ژیێ تە چەندە؟ یان تو چ لایەنێ سیاسی؟ یان زمانێ تە یێ شل و سەقەتە؟ دیسان یا ژ ھەموویان کرێتر، زانینا چەندیا داھات و مووچێ تە یە!! بێ ی کو ھەستێن تە بەرچاڤبگریت و ب ئاستەک نزم دێ ل ژیانا تە نێریت و بۆ مەرەمێن خوە یێن مایتێکرنێ و بەرچاڤگرتنا بەرژەوەندیا خوە، دا ھەول بدەت بنیاتەکێ بۆ ئاستێ تێکەلیا خوە دگەل تە ئاڤابکەت. لێ د راستێدا ئەڤ دیاردەیە پەیوەندی ب ئاستێ ھوشمەندیا ئەڤان جورە مرۆڤان ڤە ھەیە و ب ئاست نزمترین مرۆڤ د جڤاکیدا، دھێنە لقەلەمدان.
مرۆڤ لسەردەمێ نوکەدا د زانستێ جڤاکناسی و دەرووناسیێدا، لسەر دوو بنەمایان وەک پێکھاتە دھێنە تەماشەکرن (بنەمایێ مادی، بنەمای مەعنەوی)، بنەمایێ مادی داکۆکیێ لسەر پارە و سامانی تە دکەت و بنەمایێ مەعنەوی داکوکیێ لسەر ھەژموون و پلە و پوستێن تە دکەت، ئەڤ ھەردوو بنەمایە وەک پێکھاتە د جڤاکێن مادیدا ب کەسایەتیا مرۆڤانڤە گرێددەن!! وەک نموونە د کەلتورێ کوردیدا پەندەک ھەیە دبێژیت: (ھەیبە کورێ کەری بە!!!)، ئەڤە وەک بنیاتێ مادی ڤێجا تو چ بی!!
یەک ژ بەربەلاڤترین پسیارێن مایتێکرنێ دناڤ جڤاکێمەدا ئەوە، پسیار لسەر داھاتێ تە یە یان مووچەیێ تە چەندە!!
ل ڤێرەدا مرۆڤ دێ چەوا سەرەدەریێ دگەل وان کەسێن مایتێکەر کەت، کو حەزا وان یا سەرەکی زانینا مووچەیێ تەیە، دا ب مایتێکەرانە پسیارێ ئاراستەی تە بکەتن؟
بەری ھەر تشتەکی پێدڤیە تو دەروونێ خوە تێکنەدەی، دیسان ب زانابوون و ب سەرئەفرازی و ب رێزگرتنڤە بەرسڤا ئەوان کەسێن مایتێکەرا بدەی و خوە نەئینیە رێزا وان. ئەگەر ئێکی پسیارا مووچەیێ تە کر و گوت چەندە؟ ئەگەر تە ڤیا بەرسڤ بدەی و ب ھەژمار و ب درست و بێ دوو دلی بەرسڤ بدە. ئەگەر تو ترسیایی ژبەر حەسیدیێ و چاڤان بەرسڤ نەدە! بەلێ ئەگەر تە ڤیا بەرسڤا ڤێ پسیارا شەرمەزار نەدەی، پێدڤی ب بەرسڤەک دبلوماس ھەیە وەک''مووچەیێ من یێ باشە''یان ''شوکر بۆ خودێ یێ باشە'' یان دشیان دایە پسیارەکا ھاوشێوە ئاراستەی وی بکەی، وەک رەڤینەک شارەزا بۆ بەرسڤدانا ڤێ پسیارا مایتێکری!!.
گرنگ ئەوە بۆ ڤی بابەتی کو پێدڤی ب تورەبوون یان ھەلچوونێ ناکەت، بەلێ تو دشێی ژ بابەتی برەڤی یان بابەتی بگوھرە یان بەرسڤا وی بدە ب ھەژمارێن نەراست، بەلکو ب زانابوون یان ب نواندن! بەلێ ب ئەتەکێتێن شارستانی یێن دروست و دشیاندایە بکار بینی وەک ئەوێن ل ژێرین:-
* شوکر بۆ خودێ دگەل گرنژینەک سادە، بێ دەنگبوون بۆ چەند چرکەیێن دومکورت.
* دێ ھەمان پسیار ژتە کەم.
* دێ بابەتی گھورم.
* ھەژمارەک خەیالی بدێ..... ل دەمێ ئەو رک بوو!!
خوە ژ مایتێکرنا مرۆڤان دووربکەن؛ چونکو مرۆڤان جھەک ھەستیار ھەیە..