سکرتێرە 37
گەیشتینەوە لای مارێ، گۆتم : پێشی هێوارێ وەرنەوە دەعوەتی وەزیری ناوخۆینە، گۆتیان : دیسان لاقە مریشکە ؟ گۆتم : دەعوەت بێ لاقە مریشک دەبی، گۆتیان : تەواو ئەمە نانی نیوڕانێ ناخۆین، گۆتم : کەیفی خۆتانە..! هەرکەسەو چۆوە ماری خۆی، نوێژی نیوڕانێم کردو پارە نانەکم خوارد، ویستم بڕەکی پار دەمەوە، داکی ئەحمەدی هات و گۆتی : ئەو هات زن مام عۆڵا، نازانی ئەو سدەوێ ! گۆتم : بابێتە ژۆرێ بزانین چیدەوێ، هاتە ژۆرێ و سەلامی کردو دانیشت، بەگەرمی بەخێراتنم کرد، داکی ئەحمەدی چایەکی لۆ هینا، تێکی داو فڕەکی لێداو گۆتی : وەڵلا مامەستا ئەوی ڕاستی بی لۆ ئیشەکی هاتیمە، عەزم لێیە هاوکاریم بکەی، گۆتم : فەرموو ئەمرکە ! وەڵلا وەختەکی دەستی بەگریان و شین و واوەیلایەکی کرد نەبیتەوە، خۆی نەهێشت هەنکی بگریێ، هەر چاوەکی ئەوەندە لێکرد، گۆتم : ئەرێ خوشکم دەتێم بگەینە بزانم مەسەلە چیەو ئەتوو ئەو شینەی لۆ دەکەی ؟ گۆتی : وەڵلا چت لێبشارمەوە، وەتی عەوڵا وەگە توو کەتیە لەو وەزارەتۆکەی ژنان، ئەخلاقی تێکچووە، هەرچی فعلی قۆڕە دەیکا ! گۆتم : ئەتوو پێت وایە ئەمن ئەخلاقم تێک دابی و فێرە فعلی قۆڕم کردبی ؟ گۆتی : ئەستەغفیرەڵلا مامەستا، مەخسەدم ئەتوو نیە، بەران نازانم کێ لەو وەزارەتەی ئەوهای لەو پیاوەی من کردیە، وەلەو ئەمن شکم لۆ ئەو ژنە قوونەستوورەی دەچی، ئەوی هاتە خەستەخانەیی و گۆتی : پارەی عەمەلیاتی لۆ دەدەم، گۆتم : زێخەی دەرێی ؟ گۆتی : بەرێ بەرێ، شکم لۆوی دەچی ! گۆتم : باشە عەوڵا چدەکا، گۆتی : بڕوات هەبی هەتا بەرەبەری بەیانی نانووی، معەددەل ئەو مۆبایلەی بەبن گێی وەیەو قسەی دەکاو پێدەکەنی، جاری وایە نیوەی شەوێ دەچتە کۆرانێ و بە سێ سعات مۆبایلی بەگێی وەنایەو قسان دەکاو پێدەکەنی، نەئاگای لەمن مایەو نە لە مارو منداری، گۆتم : کێ دەرێ لەگەر برادەرەکانی قسەی ناکا، گۆتی : مامەستا ئەوە قسەیە، پیاو بەس بجولێتەوە ژنی دەزانی چدەکاو چناکا، ئەو پسەپس و عینکە عینکی عەوڵای ئی ئەوەی نیە لەگەر پیاوی قسەی بکا، کوو دەزانم خوا بەهەقە، ئەوها دەزانم لەگە زێخە تیتک بەگووی قسان دەکا..! گۆتم : باشە خەمت نەبی، بەخۆم قسەی لەگەر عەوڵای دەکەم و دەگەمە سەرە گرێیەکی، گۆتی : ئەرێوەڵلا بەقوربانت بم، ئاخر ئەو عومرەی وی ئی ئەو عارەیە، پرتە بۆزی گەمبۆز، کیژو کوڕمان وا کۆزە مندارەکیان هەیە، ئی وەکی وی سولعی بەینی دوو عەشیرەتان دەکا، نەک خەریکی گەمبۆزی بی، گۆتم : هیچ خەمت نەبی، ئەمن چارەی دەکەم.. زۆر مەمنونم بوو، خواحافیزی کردو چووە دەرێ..!
بەرەبەری هێوارێ داهات، خۆم گۆڕی و چوومە دەرێ، دیتم جەعۆو مام عەوڵا ئامادەنە، گۆتم : یاڵلا بابڕۆین، مام عەوڵا دەرکەی پشتەوەی لۆ کردمەوەو گۆتی : فەرموو ئوستاج..! سواری تڕومبێلی بووین و بەڕێکەتین لۆ مەزرەعەی وەزیری ناوخۆی، لەڕێیێ مام عەوڵا هەر خەریکی مۆبایلی بوو، گۆتم : ئەرێ بەس نیە مام عەوڵا دە ئەو مۆبایلەی دانێ، گۆتی : وەڵلا ئوستاج تەماشای فێیز بووکی دەکەم بزانم دەنگ و باس چیە، گۆتم : لۆ ئەتووش فەیس بووکت هەیە ؟ گۆتی : کەس هەیە نەیبی ! گۆتم : باشە کێ لۆی دانای ؟ گۆتی : ست زولەیخا..! گۆتم : بەناوی چیە ؟ گۆتی : شێرەکەی خۆم..! لە قریتەی پێکەنینێم داو گۆتم : بەخۆت ئەو ناوەت دانایە ؟ گۆتی : ناوەڵلا ست زولەیخا گۆتی : عەزم لێیە بەو ناوەی دانێی، ئەمنیش درم نەشکاند ! گۆتم : جەعۆ ئەتووش فەیس بووکت هەیە ؟ گۆتی : تەعبەن (تەبعەن) ئەمن نەمبی کێ هەیتی ! گۆتم : ئی توو بەناوی چیە ؟ گۆتی : کۆترەکانم ڕوع و جەرگمن..! گۆتم : وەڵلا بابە فەیس بووک لۆنگۆ باشە، گۆتم : باشە مام عەوڵا ئەتوو چ لێ دەزانی ؟ گۆتی : وەڵلا ئوستاج تڕە خیندەواریەکم هەیە، وەختی خۆی لە مەعوەل ئووممیەی فێر بوویمە، ئی دی ست زولێخا فێری چات و قسەکردنی کردیمە، گۆتم : دەترسێم هەر لەگەوی خەریکی چات و ماسنجەری بی، لۆیێ ئەوها مەشغول بی، گۆتی : وەڵلا لە غەیبەت کردنی ئەولاو ئەولای باشترە..! گۆتم : ماوەکە دیقەتت دەمێ هەر کووتکە خەوت دێتێ، پێدەچی ئەتوو شەوێ نەنووی ! گۆتی : وەڵلاهی دەنووم و نانووم و ئەوها، گۆتم : بەگێی من دەکەی ئەو فەیس بووکەی دەستڕیەوەو ئاگات لە دەوام و مارو مندارت دەبی، ئەوڕۆ داکی منداران هاتبووە کنە من و گلەیی لێدەکردی، گۆتی : عەوڵا لەبەر زێخەی ئاگای لەمە نەمایە، دەوجە ڕاستم پێبرێ چت لەگە زێخەی هەیە ؟ عەوڵا بڕەک داماو گۆتی : چشتەکی وەها نیە، هەر ئەوەیە برادەرین و پێکەوە باسی ئەو دنیایەی دەکەین ! جەعۆ گۆتی : سەی خۆری باسی دنیای چدەکەی، لۆ زێخە ڕەئیسی ئەمریکایە هەتا باسی دنیایێی لەگەر بکەی، لۆ ڕاست و ڕاست بە گدۆی نارێی چ کەین و بەینەکت لەگەر زێخەی هەیە..!؟
مام عەوڵا گۆتیە جەعۆی : کەین و بەینی چم هەیە لەگەر ست زولێخای هەتیم، خۆت دیتیە دەرێی خەمە گڕوی ! جەعۆ گۆتیە من : ئوستاج لەمنی وەرگرە، وەڵلا وەبیللا ئەو عەوڵایە کەتنەکی لەگە زێخەی کردیە، کورە ئوستاج لە وەزارەتی دایم خوندە خوندیتیان، ئەو تۆڕیە شەوێش هەتا سبەینێ بەمۆبایلی بەزم و ڕەزمیانە، خوایە فلیمی عەوڵاو زێخەی ئاخیری خێربی وەکی فلیمی هیندی ! گۆتم : سبەینێ بچمەوە وەزارەت دوو عقوبەی دەردەکەم، ئێکیان لۆ گوڵاڵەو ئەو ژنانەی شەڕیان لەگەر کرد، ئێکیش لۆ زێخەی و لە وەزارەت نەقری دەکەم، چیدی بەرگەی ئەوەی ناگرم مام عەوڵا لەپەنای خۆمان کراومان لۆ بدوری ! مام عەوڵا وەزعی تێکچوو، ڕووی وەرگێڕاو گۆتی : ئوستاج دەستم دامەنت ئەو ئیشەی نەکەی، ئەمن پەل پەلکە، بەس ست زولێخای نەقر مەکە، گۆتم : تەواو تازە بڕیارم دایەو بڕایەوە، مام عەوڵا خۆی شین و مۆر کردو هەر قسەی دەکردو بە مستان لە دەشبولی تڕومبێلی دەدا، جەعۆ گۆتی : بەسە عەوڵا چیدی لەوچەی مەکەو ببڕێنەوە، وا گەیشتینە پێش دەرکەی مەزرەعەی وەزیری ناوخۆ ! باشبوو مام عەوڵا بێدەنگ بوو، چەکدارەک هاتە پێش و گۆتی : فەرموون ! جەعۆ گۆتی : جەنابی وەزیر مەوعیدی هەیە لەگەر وەزیرینگۆ، ئەویش گۆتی : بەخێربێن سەرچاوم، دەرکەی کردەوەو گۆتی : فەرموون تێپەڕن ! جەعۆ پێی لێناو چووینە ژۆرێ..!
گەیشتینە ڤێلاکەی و تڕومبێلمان ڕاگرت، هاتمە خوارێ و وەزیری ناوخۆ بەپیرم وەهات، چاک و چۆنیمان کردو هوردە هوردە بە پیاسە ڕۆیشتین، مەزرەعەکەی زۆر گەورەو خۆشبوو، لەوانەیە بەهەمووی سی چل دۆنم دەبوو، مەسبەحەکی گەورەی تێدابوو، هەتا چاوت حوکم دەکرد دار هەنارو هەنجیرو هەرمی و پرتەقارو زەیتوونی چاندبوو، ئەنواع و ئەشکال مێوی چاندبوو، لەهەموو ڕەنگەکی ترێیان دابوو، هۆرەکی گەورەی دوورو درێژی کردبوو، گۆتم : ئەوە ئی چێرو مێریە ؟ گۆتی : ناوەڵلا هەرچی حەیوانات و تەیرو تار هەیە تێدایە، تەیری وای تێدا بە دەفتەرەکم کڕیە، دوو زەلامی سووریم گرتیە بەس خزمەتی ئەو تەیرو تارانە دەکەن، مامزی وای تێدایە سەرت سوڕ دەمینێ، گۆتم : پێدەچی مەسرەفەکی زۆرت لەو مەزرەعەی کردبی، گۆتی : ناوەڵلا ئەوە بە دیاری وەرم گرتیە، کابرایەک ئیشەکی بەمن کەتبوو، لەبەرامبەر ئیشەکەی ئەو مەزرەعەی دامێ، گۆتم : دەترسێم داگیرت کردبی ؟ ئاوڕەکی لەمن داوەو گۆتی : ئەوە لەمن دەوەشێتەوە، کوو ئەو قسەی دەکەی ؟ گۆتم : وەڵلا گۆتم نەکوو وەکی عاردە بازرگانیەکەی ناو شاری داگیرت کردبی ! گۆتی : کیهان عارد ؟ فایلەکەم لەگیرفانم دەریناو دامێ، گۆتم : ئەو عاردە ! تەماشای فایلەکەی کردو ڕەنگی تێکچوو، گۆتی : برێ لۆ ئەو ئیشەی هاتی ؟ گۆتم : ئەرێوەڵلا ! گۆتی : جارێ بابچینە ژۆرێ شتەکی بخۆین، ئەوجە قسەکی لێدەکەین..!
چووینە ژۆرێ و دانیشتین، سێ چار کیژی ئەندەنووسی دەهاتن و دەچوون و خزمەتیان دەکرد، مێزیان ڕازاندەوەو هەرچی خواردنی خۆشە لەسەریبوو، فەرمووی لێکردم و دانیشتین ! گۆتم : کاکە ئەمن دوو زەلامم لەگەرە، چشتەکیش بدەنە وان، گۆتی : کورە دەسەیان تێبەردە، چیە ئەوەندە خەمی ئەو حیمایانەتە، با دوایێ بچنەوە لەماری خۆیان شتەکی سندان کەن..! زانیم ئەو پاسەوانانەی دەیانپارێزن و ئاگایان لە ژیان و سەروەت و سامانیانە حسابی سەیەکیشیان لۆ ناکەن و هەر بە بنیادەمیشیان دانانێن، لە بنی درمەوە بریندار بووم، لۆیێ گۆتم : ئەگەر نانی نەدەنە ئەو سایەق و حیمایەی من، ئەمنیش نانی ناخۆم..! کە وەزیری ناوخۆ زانی بەڕاستیمە، گازی ئێکەکی کردو گۆتی : هەندە نان لۆ ئەو دوو زەلامەی دەرێ ببەن، ئەویش سەری لەقاندو گۆتی : بەچاوان..!
نانمان خواردو دەستمان شووشت، گۆتی : با چایەکەی لە دەرێ بخۆینەوە هەوایەکەی زۆر فێنکە، چووینە دەرێ و دانیشتین، هێشتا چایە نەهاتبوو، گۆتی : ساحێبی ئەو عاردەی خزم و ناسیارتن ؟ گۆتم : ناوەڵلا ! گۆتی : ئەدی لۆ بەرگریان لێدەکەی، گۆتم : وەکو دوو هاوڵاتی ئەو وراتەی، دەبینم غەدرت لێکردینە، لۆیێ هاتیمە بەرگریان لێدەکەم، گۆتی : کورە دە وازیان لێبینە، ئەتوو چیشت پێیان دایەو لۆ سەری خۆت بەو چشتانە دێشینی، گۆتم : وەڵلا ئەوانە گوناحن و ئەتوو زولمت لێکردینە، پیاوەکی باشبەو عاردەکەیان بدەوە، گۆتی : ئیشەکە لە دەستە من دەرچووە ! گۆتم : کوو ؟ گۆتی : وەڵلا فرۆشتیتم و پارەکەش نەمایە ! گۆتم : کوو نەمایە ؟ گۆتی : بووە هەرم و فڕیە عاسمانێ ! گۆتم : قاتی لە قووماریت نەدۆڕاندیە ؟ گۆتی : عەلاکووللین ! گۆتم : یەعنی هەر ئەوها، هیچیان لۆ ناکەی ؟ گۆتی : چیان لۆ بکەم، ئەمن دەرێم پارەکە نەمایە ! گۆتم : زۆر بوو ؟ گۆتی : دەوری دە ملیۆن دۆلاری دەبوو ! گۆتم : وەڵلا بەسەرۆک وەزیرانی دەرێم ! گۆتی : کێ دەرێ لەگەرم شەریک نەبووە..!
گۆتم : ئەتوو بەڕاستیتە ؟ گۆتی : ئەرێوەڵلا، گۆتم : پێشینان ڕاستیان گۆتیە : دزو ماخۆ ئێکبن گای لە کولانکەی ئاوا دەکەن ! گۆتی : ئەتوو واز لەوەی بینە، لۆ نایێی چشتەکی بکەین، گۆتم : چشتی کوو ؟ گۆتم : دەوری سەت دۆنم عاردت لۆ وەردەگرم، چی لێ دەچینی بچینە، دەیکەیە دەواجن، مریشک و عەلەشیش و نەعامەی لێ بەخێو دەکەی، چێرو مێری لێ بەخێو دەکەی، لایەکی بکە مەزرەعە و ڤێلایەکی ئەوهای لە ناوبکە، لۆ خۆت فوول دەبی ! گۆتم : ئەو سەت دۆنمە بەرامبەر بە چیە ؟ گۆتی : نوس و نوس ! گۆتم : چ چ !؟ گۆتی : ففتی ففتی، یەعنی نیواو نیوو..! گۆتم : وەڵلاهی ئەمن لۆ کاسبی و تیجارەتی نەبوویمە وەزیر، بەحسابی خۆم لۆیێ بوویمێ بتوانم خزمەتەکی خەرکی بکەم، گۆتی : نازانم نە ئەتوو فەقیر حاری، نە ئەمە لە دنیایەکی دەژین ! گۆتم : وەڵلاهی سەددام و قەززافی و عەلی عەبدووڵلاساڵح و دەیانی دی چەندیان برد، ئەنگۆش هەر ئەوەندە، حەیف و مخابن گەیشتینە ئەو ڕۆژەی، لە ئاقری کەس دانەبوو حوکمی کوردی ئەوهابی، زۆر بەداخەوە..! گۆتی : وەڵلا ئەوهایەو تەواو، ئەوەی ڕازی نیە با ئەو وراتەی بە جێ بێلی، زۆرمان لەکەس نەکردیە..!
ئەمە لەو قسانە دابووین، نامەکم لۆهات، کردمەوە، دیتم ساحێب عاردەکەیە لۆی ناردیمە، نووسیتی : قوربانی ئەو چاوەت دەبم، واز لە عاردەکەی مەبینە، هەر بەخۆمان ساغبین قیڕسی لە عاردەکەی..! هەرکە خیندمەوە زانیم هەردوو ساحێب عاردەکە هەڕەشەیان لێکرایە ئەگەر واز نەینن، خراپیان بەسەدێ..! گۆتمە وەزیری ناوخۆ : ئەمن دەڕۆم، گۆتی : لۆ ؟ گۆتم : ئەمن هێشتا نەڕۆیشتیمە ئەتوو هەڕەشەت لە ساحێب عاردی کردیە، ئەدی ئەگەر بڕۆم چ دەکەی !؟ دەستی ڕاستی لەسەر شانی دانام و گۆتی : بەگێی برای خۆت دەکەی واز لەو هەراو هۆریایەی دەینی و خۆت دروست دەکەی، ژیان بیتاقەیەو لۆت دەردەچی، ئێستا ئەتوو بیتاقەکت لۆ دەرچووە، بەکاری بینە، ئەتوو بللیت لۆ دەرچووە بللی..! گۆتم : ئەمن ئەو بللیەم ناوێ، چونکە ئەوڕۆ بللیم لۆ دەرچی، ڕۆژەک دادێ دەبتە هەپ بەیاس، خوا حافیزیم لێکردو چوومە دەرێ..!
گەیشتمە کن تڕومبێلی، وەزیری ناوخۆ لە دووم هات، گۆتی : دەرێی توڕە بووی ؟ گۆتم : کوو توڕە نابم، زوڵم لەوەی گەورەتر هەیە مورک و سامانی خەرکی داگیرکەی، گۆتی : زوڵم نیەو هەقی خۆمە، وەکی ئەمە دەربەدەر بووین و لەسەرمان هەردەلەرزین، ئەو خەرکە لە ناو لێفی گەرم پرخ و هۆڕی بوو، ئێستاش نۆرەیمەیە ڕاست و چەپ بکەوینە ناوێ..! دەرکەی تڕومبێلم کردەوەو سواربووم، جەعۆ سلفی لێداو بەڕێکەتین، درم دەکوراو تەماشای ئەولاو ئەولای داروباری ناو مەزرەعەکەم دەکرد، مام عەوڵا گۆتی : دارو بارەکی جوانە، وەنیە ئوستاج ؟ گۆتم : وەیە ! گۆتی : دەزانی ئەو دارانە هەر قلی بەچەندی کڕایە ؟ گۆتم : ناوەڵلا نازانم، گۆتی : ئەمن دەزانم ! گۆتم : کوو دەزانی ؟ گۆتی : پاسەوانەک پێی گۆتم، گۆتم : بەچەندی کڕایە ؟ گۆتی : هەر داری بە حەفتا وەرەقەی..! تەماشای دارەکانم کردو بەلای کەمی پێنجسەت دار دەبوو..!
لە مەزرەعەکەی چووینە دەرێ، مام عەوڵا گۆتی : ئەرێ دەرێم قسەکی بکەم ! گۆتم : بیکە، گۆتی : توڕە نابی ! گۆتم : نەخێر، گۆتی : خێرت دەگاتێ ئەو عقوبەی ست زولێخای ڕاگرە..! جەعۆ گۆتی : هیچ چشتەک ئەمنی نەکووشتیە، ئەو ست زولێخایە نەبی، زێخە زێخەیە، ئەو ستە چیە ! قوونە ستوورەکی ئەوهات لەمە کردتە مەی ئەکرەم..! عەوڵا گۆتی : هەونکە دەیبڕێنیەوە، یان قۆنداغە کلاشینکۆفەکت لە ناو دەوی دەم و هەر سی و دوو ددانت بە گۆڕێ وەرکەم..! جەعۆ گۆتی : وەڵلا شەکرت خوارد، سی و دوو نیە و بیست و سێیە، چونکە پێنج شەشەکم بە قوربانی توو بووە..! گۆتم : مام عەوڵا بەس بزانم ئەو هەموو دیفاعە چیە لە زێخەی دەکەی ! گۆتی : ئەوە چشتەکی تایبەتە بەخۆم، لۆیێ ڕجات لێدەکەم عقوبەکەی لۆ من دەرکە نەک لۆوی..! جەعۆ گۆتی : پیرە سە، دەترسێم قەوماندبت ! مام عەوڵا گۆتی : کەس گووی بە کراوی توو نەپیوایە هەتا بە جواب بێی، کوڕم کە پیاو قسەی دەکەن، ئەتوو دەوت تێکنێ..! گۆتم : وەڵلاهی هەتا پێم نەرێی چ کەتنەکت کردیە، ئەو ئیشەت لۆ ناکەم..! گۆتی : کورە ئوستاج وازم لێبینەو تەواو، ماخران ئەتوو دەرێی قەت لێنەدرای، وەرنەگەڕای، عاشقاتیت نەکردیە..! گۆتم : قاتی ئەتوو عاشق نی ؟ گۆتی : وەڵلا وەبیللا مەجنونی گەمبۆز زندی بیتەوە دوو سعاتان لۆ من شینی دەکا، زێخە تەختی کردیمە تەخت..! گۆتم : ئەوە ئەتوو بەڕاستیتە ؟ گۆتی : ئەرێ بەگۆڕی وەلی ! گۆتم : وەلی کێیە ؟ گۆتی : وەلی دێوانە..! جەعۆ گۆتی : هەونکە چیدی درێژەی مەدێ و ڕاست و ڕەوان پێمان برێ چت لەگە زێخەی کردیە ؟ گۆتی : ئەگەر ئوستاج وەعدم بداتێ عقوبەکەی بستڕتەوە، شەرتبی پێتان برێم..! گۆتم : ئەگەر برێی، دەستڕمەوە، گۆتی : بەڕاستی ! گۆتم : بە ماستیش..! گۆتی : دەوەڵلا قەوماندیتم و ئیللەڵلاو بڕایەوە ! گۆتم : کوو قەوماندیت ؟ گۆتی : وەڵلا بە دزی هینایتم و تەواو..!
گۆتم : ئەتوو بەڕاستیتە مام عەوڵا ؟ گۆتی : ئەرێوەڵلا بەڕاستیمەو تەواو، جەعۆ گۆتی : ئەی سەگ ئەرێوەڵلا، ئەو هەموو دۆڵمەو کولیچەو پاقڵاوەی زێخەی ئەوەی لەبن سەری بوو، وەڵلاهی خۆڕی هەر خۆڕیە ! گۆتم : باشە ئەتوو ئەو ئیشەت کوو کردیە، ئێ غێر پرسەکت بەمە دەکرد، ڕایەکی مەت وەردەگرت..! گۆتی : وەڵلا بەنگۆم گۆتبا هەزار شێرو ڕیویتان لۆ دەهینام و ئیشەکەتان لێ تێک دەدام، ئەمن یەک تەبیعاتم هەیە، کە داڵغەم لە چشتەکی دا بیکەم، نەپرس دەکەم و نەبەکەس دەرێم، ناوی خوای لێ دەینم و تەققەی لێوە دەینم، گۆتم : باشە کەنگی ئەو ئیشەت کرد، گۆتی : ئەوڕۆژی ئەتوو سواری تەیارەی بووی لۆ لوبنان، ئەمنیش سواری بەختی خۆم بووم و چوومە شارع عەسەنی..! گۆتم : باشە ئەگەر لێت ئاشکرا بوو ؟ گۆتی : ئەگە ئەنگۆ قسان نەکەن بە ئاسانی ئاشکرا نابی، وەکی ئاشکراش بوو خوا کەریمە ! گۆتم : وەڵلا غەدرت کردیە، نەدەبا ئەو ئیشەی بکەی، ئاخر ئەتوو لەچت کەمبوو ژنت هینا، دوایێ هەمووی چەند ڕۆژەکە زێخەی دەناسی کێڕان خۆت پێ دادا، گۆتی : ئوستاج بە دوو چووان دامەچوو، تازە ئیشەکە هات و تەواو، ئەتوو ڕێیەکم لۆ دانێ ئەگەر ئاشکرابوو چبکەم..! گۆتم : لە هینانێ هەندت پرس پێکردم هەتا لۆ ئاشکرا بوونێ ڕێت لۆ دانێم، وەڵلا ئەمن هیچ هەقم نیە، کوو خۆت هاویشتیتە ناو گۆمێ ئەوهاش خۆ دەرینە ! جەعۆ گۆتی : ئەرێ عەولارۆک زێخە هیچ خوشک و موشکی نیە، دەستی دووش بی ڕازیمە، بزانە لۆم تەرتیب ناکەی ! مام عەوڵا گۆتی : دیارە شێت بوویمە سەیەکی وەکی توو بکەمە ولداش زاوام، کوڕم ئەتوو ئی وەی نی بێیە ماری خەزورم و سەری مەجلیسێ بگری..! گۆتم : لۆ خەزورت مایە ؟ گۆتی : بەرێ مایە قەدیم لە مەیدانی کەران ئیشی دەکرد، گۆتم : چی دەکرد ؟ گۆتی : وەڵلا کەری دەکڕی و دەفرۆشت، بەران وازی لێهیناو ببوە هاندەری تۆپانێ، ئێستاش وەکی لە دیار تۆپانێ دادەنیشی گەمەکە لە ئیسپانیایە ئەو لێرە تەوجیهاتیان دەداتێ و خۆی شین و مۆردەکا..! جەعۆ گۆتی : پێدەچی خەزورت زەلامەکی زۆر کەربی، مام عەوڵا گۆتی : هەر کووی هەبی لەتوو پیاو ترە، کوڕم بمری باشترە، نەکوو چەپرەی لۆ کۆتران لێدەی لەسە بانی، کورە ئەتوو کەنگی دەبیە پیاو هەی خۆڕی..! مام عەوڵاو جەعۆ ئێکدیان نەهێشت، هەتا گەیشتینەوە پێش دەرکەی مارێ جوونیان پێکدا، پێشی دابەزم گۆتمە جەعۆی : ئەو نهێنیەی مام عەوڵای بپارێزە ! گۆتی : خەمت نەبی و ناچتە دەرێ، هاتمە خوارێ و خوا حافیزیم لێکردن و چوومەوە مارێ..
خۆم گۆڕی و لە هۆری دانیشتم، وەختەکی تەلەفۆنەکم لۆ هات، هەرم گرت، گۆتی : جەنابی وەزیر باشی ؟ گۆتم : سوپاست دەکەم بژی، گۆتی : وەڵلا ئەمانەتەکت لۆ هاتیە لە لوبنان، ئەگەر سبەینێ نەفەرەکی بنێری وەریانگری مەمنون دەبم، گۆتم : بەچاوان، ئیشاڵلا سبەینێ دەینێرم، مۆبایلەکەم داخست، بەینەکی دانیشتم و تەماشا تەلەفزیۆنم کرد، پاشان نوێژی عیشایێم کردو پارم داوە..!
نانی بەیانیم خواردو چوومە دەوامێ، چوومە ژۆرەکەی خۆم، گازی مام عەوڵاو جەعۆم کرد، ناونیشانی جێیەکەم دانێ و گۆتم : بڕۆن ئەو ئەمانەتەی بینن و وەسلی پارەکەش لەگەر بینن، جەعۆ گۆتی : ئەمانەتەکە لە کێ هاتیە ؟ گۆتم : لوبنان ! گۆتی : ئوستاج قاتی بەبەغا سوودانیەکان نیە هاتیە ؟ گۆتم : دەبڕۆن بزانن چیە، ئیدی ڕۆیشتن..
عقوبەکم نووسی لۆ کارمەندەکان و گوڵاڵە خانی کەبەشەڕ هاتن لە پێشە من و دامە کارمەندی نووسینگەکەم، گۆتم : چاپی بکەو بینە با ئیمزای کەم و پاشان لۆیان بنێرە، گۆتی : باشە بەچاوان، ڕۆیشت و هەندی دەمێ نووسی و ڕایکێشاو هینای، ئیمزام کردو گۆتم : سادیری بکەو بینێرە، گۆتی : بەچاوان..
دانیشتبووم تەماشا هەندە فایل و شتم دەکرد، پارێزەرەکەم هات، سەلامی کردو بەخێراتنم کرد، گۆتی : چ لەو ڕۆژنامە نووسەی بکەین ؟ گۆتم : بەریدە گوناحە، گۆتی : کوو بەریدەدەی، دەزانی چی بەتوو گۆتبوو، گۆتم : ئێستا ئاقر بووە، بەریدە، خەرکیشی زۆر پێوە نایمە، خۆ ناکرێ ئەمن بە ئاقری وی بجوولێمەوە، گۆتی : زۆر باشە، دوایێ دەچم بەحاکمی دەرێم جەنابی وەزیر لێی خۆشبووە، گۆتم زۆر باشە، گۆتی : ئەرێ جەنابی وەزیر ! گۆتم : بەرێ ! گۆتی : وەڵلا یەک دوو خزمم هەیە حەزدەکەن بتبینن، گۆتم : خێر ؟ گۆتی : وەڵلاهی ئەوانە ئیش و کاری زراعی و ئەو چشتانە دەکەن، ئیشەکیان کەتیتە وەزارەتی کشت و کاڵ و حەزدەکەن لۆیان بکەی، گۆتم : زۆر باشە، ئێستا دەستم بەتارە، با لەبەر خاتری توو بێن، گۆتی : وەڵلا مەمنونم ئێستا تەلەفۆنیان لۆ دەکەم، ئیدی مۆبایلی دەریناو قسەی لەگەر کردن و گۆتیان هەر ئێستا دێین..!
لەگەر پارێزەرەکەم دانیشتبووم، وەختەکی گوڵاڵە خان بە تووندی هاتە ژۆرێ و ئەمری عقوبەی لە دەستی بوو، بێ سەلام و کەلام ڕووی لەمن کردو گۆتی : ئەوەچیە لۆمنت دەرکردیە جەنابی وەزیر ؟ گۆتم : بڕۆوە پرسگەی و دانیشە، وەکی ڕێم دای بێیە ژۆرێ، ئەوجە وەرە ژۆرێ..! بەتووندی چووە دەرێ، گازی سکرتێرەکەم کردو گۆتم : ئەوجارە یەک کەس بێ پرسی من بێتە ژۆرێ عقوبەت دەدەم ! گۆتی : وەڵلا گەورەم هەند بە تووندی هات، هەر پێڕانەگەیشتم برێم ڕاوەستە با ڕوخسەتت لۆ وەرگرم..!
مایتی[1]