سکرتێرە 39

گۆتم : ئەدی کوو بتبینم ؟ گۆتی : بەویزدانت وەختی دیتنێیە، ئەمن وا مێشکم دەتەقی ! گۆتم : ئێ دەتێم بگەینە چبووە، بەشکوو بتانم هاوکاریت بکەم، گۆتی : دەزانی چیە، پاش عەسرێ وەرە مارێ، بەشکوو بتانی چشتەکم لۆ بکەی، گۆتم : دەی جارێ خواحافیز..!
گەڕامەوە مارێ، وەکی دەبینم دایە جووجە خۆی هەر کردیەو بە پەقرەجان ئاوی بەپێش دەرکەی دادەکاو بە فلچەکی دڕ ئەو پێش دەرکەی ڕادەماری، دراوسێیەکم کۆمەرە مریشک و کەرەبابەکی هەبوو، ئەو مریشکە سەگباب خێوانە ئیللاو بیللا دەهاتن لە پێش دەرکەیمە جیقنەیان دەکرد، ئەو چیمەنتۆیەی پێش دەرکەی بەبەردەوام جێی جیقنەی پێوەبوو، فلاش و تەنەرو ئۆمیگای دنیایێ نەما لۆ داکی ئەحمەدی نەینم، ئەو هەر بەجێی جیقنەکانی دادکردو نەدەڕۆیی، دادە جووجە نازانم چی بەکار هینابوو، چونکە بڕوا بکەن ئەوەی جێی جیقنەی بی لەپێش دەرکەی نەیهێشت بوو، سێ چار بلۆک لە پێش دەرکەی بوون، پێش ئەوەی ببمە وەزیر جار جار لەگە جەعۆ و مام عەوڵاو پیرداود بێ ددان و شەمسەدین گەندەبای لەسەری دادەنیشتین، نازانم دایە جووجە بەتەنێ ئەو هەموو بلۆکەی کوو گۆستبۆوەو سەفت کردبوو، بەڕاستی ژنەکی چووست و چالاک و ئازابوو، ماخران دەتگۆ پەلیکە پەلیک..!
هەر چوومە ژۆرێ دایە جووجە بەپیرم وەهات، گۆتی : یاخوا بەخێر بێیەوە گەردەن زەرد، وەڵلا وەزیری هەر لەشان و شەوکەتی خۆت دێ ! گۆتم : کێ بەتووی گۆتیە وەرە مارێمەو ئیشمان لۆ بکەی ؟ گۆتی : ئەیڕۆ گەردەن زەرد لۆ ئەوها خۆت شین و مۆر کردیە، ئەو درە ناسکەی من چما لەخەمان ناتەقی، ئەگەر ئەمن عەفتەی دوو جاران نێم ماری جەنابت خاوین کەمەوە..! دەستم لە بەڕکم ڕاکردو بیست و پێنج هەزاریەکم دایێ و گۆتم : دایە جووجە ئەوە ئەوەل و ئاخیر جارتە دێیە ماریمە و دەوامی خۆت لە کێیە لەوێ دەوام دەکەی، بەران یەکسەر مەڕۆ، دەترسێم برسیت بی، فەرموو پارە نانەکی بخۆ، ئەوجە بە جەعۆی دەرێم بتباتەوە مارێ، گۆتی : هەندەم سووندەو هەندەم قورحانە ئەو پارەی وەرناگرم، گۆتم : چشتی ئەوها نیە ئیللاو بیللا دەبی وەریگری، بەزۆری پارەکەم دایێ، دوو ماچی لێکردو هاویشتە گیرفانی و گۆتی : ئەڵلا لێت بەزیادبی، هەر بەخۆت ڕازقی، عەبدی سەی خۆڕی چیە..! ئەعسابم لەسەری نەماو ویستم هەتا مست بگرم لە قەپۆزی دەم و دەم و چاوی بکەمە خەریتەی عیراق، لەسەر حاری خۆم بەسەو خۆڕیم دادەنێ، دوایێ گۆتم : شەیتان بە لەعنەت بی، با خۆم نەینمە ڕێزە وی..!
چوومە ژۆرێ ئووم حەممودی خەنی ببوو، گۆتی : وەڵلا ئەو دایە زووزە زۆڕ ئازا، ئەو حەمموو ئیش کردی سەریع، لازم حەموو حەفتە ئەو بێ دوو زار ! گۆتم : وەڵلا ئەوە ئەوەل و ئاخیر جاریتی، جارەکی دی چاوت بە دایە زووزەی ناکەوتەوە، پارە نانەکی بدێ بابچتەوە مارێ، گۆتی : ئێ لۆ ئاخر ئەو زن زۆڕ فەقیر ئوو باش، گۆتم : فەقیری چ و حاری چ، ئەوە سەی حەفت گوندانی پێ ڕەویە، هەرچی وەزیری پێشە منە بردیتیە سەر ئاوێ و ئاویشی نەداینە..! زوو نانەکەی بدێ با جەعۆ بیباتەوە.! گۆتی : ئێ دباش باش ئەتوو ئەهوا عەسەبی..! باشبوو ئووم حەممودی بەگێی کردم و پارەنانەکی لۆ دایە جووجەی دانا، دایە جووجە لێ دانیشت و قۆری لێ هەر کردو هەتا هەرمسا خواردی، گۆتیە داکی ئەحمەدی : سۆرە گور تەڕە پیازتان نیە ؟ ئەویش گۆتی : ناوەڵلا ئەو بیاوی من ناخوا ئەو بیاز، دەرێ ئەو بۆن ئیزعاج، دایە جووجە لەبەرەخۆ گۆتی : ئەی کۆربیتەوە ئەو مارە، کوو دەبی مارە وەزیر بی و تەڕە پیازی تێدا نەبی، بەقوڕێم گرت..!
تەلەفۆنەکم لۆ جەعۆی کردو گۆتم : فەوری وەرە، گۆتی : وەکی کۆتری دەفڕم و دێم..! هەندەی نەبرد هات، گۆتی : خێرە جەنابی وەزیر ! گۆتم : دایە جووجەی ببەوە ماری خۆیی و وەرەوە، چونکە دەچین سەردانەکی وەزیری کشت و کاڵی دەکەین، گۆتی : چەوراتیەکەی تێدایە ؟ گۆتم : باوەڕ ناکەم، چونکە تەلەفۆنم لەگە کرد سەرو دری تەواو نەبوو..! جەعۆ گۆتیە دایە جووجەی : هەستەبابڕۆین هەستە پیرەژنی قۆرتڕ، دایە جووجە گۆتی : بە قوربانم بی پیرەسە، دەرێی ئیساقە جووی، داکت پیرەژنی قۆر تڕە ! ئەمن لەسە پشتێ کەتم هەنکی پێبکەنم، جەعۆ گۆتی : دەوەرە مەیدە بەر سەرە پێنان، گۆتم : کورە دە وازی لێبینەو بیبەوە، جەعۆ گۆتیە من : ئەرێ گدۆ، کووە پشت سەیتەرەکی پێ لێدەم !؟ گۆتم : کورە چشتی وانەکەی جەعۆ، وەڵلا حەیاو نامووسمان دەبا لە وەزارەتی..!

دایە جووجە سواری تڕومبێلی بوو، جامی کردەوەو گۆتی : بمینێن بەخێر، گۆتم : بەخێرچی سەرچاوان، گۆتمە جەعۆی : هەر داتنا وەرەوە، نەچیە ئەولاو ئەولا، دەچینە کن وەزیری کشت و کاڵی، گۆتی : خەمت نەبی گەورەم..! جەعۆ پێی لێناو دەرچوو، ئەمنیش چوومەوە ژۆرێ، نوێژم کردو پارە نانەکم خواردو چاوەڕێی جەعۆی بووم بێتەوە، وەختەکی نووکەکی لۆ لێدام، زانیم مەعنای ئەوەیە هاتمەوە، هەستام بچمە دەرێ، داکی ئەحمەدی گۆتی : برێ داک زووزە دوو ڕۆز دی بێ ئێڕە ! گۆتم : بەحەییاتی نایێتەوە، پێویست ناکا ئیستیغلالی کارمەندی وەزارەتی بکەم لۆ ماری خۆم..! سەرەکی باداو ڕۆیی لۆ ناندینی و گۆتی : ئەتوو هەڕ ئەهوا موو زێن..!
چوومە دەرێ دیتم جەعۆو مام عەوڵا پێکەوە ڕاوەستاینە، سەلامم لێکردن و گۆتم : یاڵلا بابڕۆین، ویستم سواری تڕومبێلی بم، دیتم خێزانی مام عەوڵای لۆلای مارێمە هات، گۆتی : ئەرێ داکی ئەعمەدی لەمارێیە ؟ گۆتم : بەرێ، فەرموو تێپەڕە ! جەعۆ ئاوڕی داوەو گۆتی : نەنە خانێ کوی ؟ ئەویش گۆتی : باشم مارمیلۆقی سیلداری، ئەوە لۆ ئەوها ڕوعت گەورە بوو، هەر نایێی سەرەکمان لێدەی، کفر بوو بوویە سایەقی وەزیرەکی قوون بەگوو..! گۆتم : زۆر مەمنون نەنە خانێ، نە گەورەمان بکەو نە لە گووشمان ببە خوارێ ! نەنە خانێ شەپپەکی لە ڕوومەتی داو گۆتی : ئەی چاوی شەیتانی کۆرەبی، توخوا قسوریم عەفووکە مامەستا، قسەک بوو لەدەوم دەرچوو..! جەعۆ وازی لە نەنە خانێی نەهیناو گۆتی : ئەرێ نەنە خانێ، ئاگات لێیە عەوڵارۆک چ بەزمەکی کردیە.!؟ ئەمن لەناو قەدم ڕا پسا، مام عەوڵا ڕەنگی وەکی پەلکە پیازی لێهات، گووللەت لێدابا، خینی لێنەدەهات ! نەنەخانێ گەڕاوەو گۆتی : حەوڵا چیکردیە جەعۆ دەلۆم باس بکە..! جەعۆ گۆتی : وەڵلاهی ئەوەی ڕاستیبی، عەوڵارۆک تەقاندیتیەوە ! نەنە خانێ مشەوەش بوو، گۆتی : چی تەقاندتەوە ؟ ئەمن ڕاست بەجواب هاتم، گۆتم : ئەوە مام عەوڵام ناردە سەر بانی وەزارەتی لەگەر ئێک دوو زەلامان، گۆتم : بڕۆ بزانە ئەو تانکیەی سەبانی چیتی، ئاو لەبەر پەنجەرەی ژۆرەکەی من دێتە خوارێ، ئەویش چووبوو، لەباتی چاکیبا، تەقاندبوویەوە ! جەعۆ لە قریتەی پێکەنینێی داو گۆتی : کورە تانکی و چ عاری چ، گدۆ ئەو سوونارۆیەت (سیناریۆ) کوو دروست کرد ماخران..! مام عەوڵا ڕەق ببوو، جوولەی پێنەدەکرا، قوڕگ و دەوی وەها هیشک ببوو، گۆتم هەونکە لە تێنان دەخنکێ ! خۆم لە جەعۆی توڕە کردو گۆتم : سواری تڕومبێلی بە بابڕۆین، وەختی هەندێیە فشەی خۆت باوێیە سەر نەنە خانێی، ڕووم لە نەنەخانێی کردو گۆتم : بڕۆ ژۆرێ خووشکی خۆم، وەڵلا ئەو سەیە هیچ ئیشی نیە، ئەوجە دەیەوێ سەرو درت بگری..! باشبوو نەنە خانێ چووە ژۆرێ و ئەمەش بەڕێکەتین، هەر لەسەری کۆرانێ ئاوا بووین، مام عەوڵا بە کۆرە مستان وەرگەڕا سەرو گێلاکی جەعۆی، لێدەو بووکتە، دەیگۆ : هەی سەگی سەگبابی کەری کەرباب ! ئەتوو دوژمنداریت لەگە من هەیە، باشە ئەو بەڕە چبوو هاویشتتە مزگەفتێ، جەعۆ شین مۆر ببوو هەنکی پێبکەنی، زۆر ڕجام لە مام عەوڵای کرد وازی لێبینێ، وازی نەدەهینا، گۆتم : کورە دە وازی لێبینە با ئەو تڕومبێلەی لە دەست دەرنەچی ! کاکە لۆ تڕومبێل لە دەست جەعۆی دەرنەچوو، ڕۆیی لۆ ئەو سەری جادە، ژنەک قەمەرەکی قالۆچەی پێبوو، لەوسەری ڕا دەهات و هەموو دەنگی سیدی دابوێ، گۆرانی ساجیدە عوبێدی هاویشتبووە سەرێ، ئەوەی دەرێ خاڵە یەم عەلی، یەم عەلی خاڵە..! سەریشی لەگەر دەهیناو دەبردو خۆی بادەدا، وەختەکی ژنە لەمە نێزیک بۆوەو چاوی بەمەکەت، وا لانگرۆزەرەک لەوسەری دەچتە ئەوسەری، زەندەقی چوو، شێواو نەیزانی کێوە بچی، لەباتی لەبەرەمە هەرێ، یان پێ لە ئیستاپی نێ، ڕاست پێی لە بەنزینی ناو لۆمە هات، هاوارم کرد یا ئەڵلا یا ئەڵلا..! جەعۆ سوکانی تووند باداو بەسە ڕەسیفی کەت و پەڕیەوە ئەوبەری، ژنەش تووند ڕۆیی و ڕمبەی لە دیواری مارەکی وەهینا، بووە قیژو هۆڕو هەرا، جەعۆ تڕومبێلەکەی ڕاگرت و هاتینە خوارێ، بەغاردان لۆلای ژنەکەی چووین، گەیشتینە سەری دیتمان لە خۆچووە ! دەرکەمان کردەوەو هینامانە دەرێ، جەعۆ تڕومبێلی ژنەکەی کوژاندەوە، دنیا لێمان خڕبۆوە، نەمانزانی چبکەین، مام عەوڵا هاواری کرد : هەندە ئاومان لۆبینن ! زوو دۆلکەکیان هینا، گرتی و بە چڕو چاوی ژنەکەی داکرد، ژنەکە ڕاپەڕی و گۆتی : پێنج ! جەعۆ گۆتی : پێنجی چ دایە ! گۆتی : پێنج کیلۆ بڕوشم لۆ بکێشە..! گۆتم : خوشکە ئەتوو سەلامەتی ؟ چاوی برند کردو بڕەک هاتەوە سەرەخۆو گۆتی : لە هەندێ گەڕێ، بەس پێم برێ کێ ئەو کووتکەی لەسەری من دا ؟ گۆتم : وەڵلا کەس کووتکی لێنەدای، بەران ئەتوو خۆت بە دیواری دادا..!
ژنەکە هوردە هوردە هاتەوە سەرەخۆ، گۆتم : بتبەینە خەستەخانەی ؟ گۆتی : ناوەڵلا باشم، بەس با تەلەفۆنەکی لۆ پیاوەکەم بکەم و بێ، مۆبایلەکەی دەریناو قسەی لەگەر پیاوەکەی کرد، کابرا گۆتی : ئەوە دێم، بابزانم چ سەگبابەک خۆی بەتوو دادایە، وەڵلا دەبی کەل و کۆمی کەم..! گۆتم : ئەی قوڕم بەسەری، ئی تێچووبین، ئەوجارەیە..!

مام عەوڵا گۆتی : ئوستاج چبکەین ؟ گۆتم : با چاوەڕێکەین بزانین پیاوەکەی چدەرێ ! جەعۆ گۆتی : دەبینی تووشی چت کردین عەولارۆکی ماری کم، گۆتم : وەختی هەندێ نیە، با خەرکمان لێ خڕنەبتەوە..! لەو قسانە دابووین مێردی ژنەکەی هات، ئێکی سمێر گەورەی پرچ قڕژن بوو، ئاگری لە نیوچەوانی دەباری، هەر لە دووریڕا هاواری کرد : کیهان تڕڕووهات بوو خۆی بەخێزانم دادایە، مام عەوڵا گۆتی : هێواش بابە هێواش، قەزاو قەدەرەو هاتیە، ئەتوو دیارە لۆ شەڕو شیڕەشیڕی هاتی ! کابرا گۆتی : ئەتوو خۆت مەکە تەرەف لەو شەڕەیی و بەر چاوم بەردە بزانم بەدیعە مایە یان نا ؟ گۆتم : مایە ما، لەخوای بەزیادبی سەلامەتە، بەران تڕومبێلەکەی زەرەری پێکەتیە، ئەویش چادەکرێتەوە، مادام سەر ساغبی ماری دنیایێ چنیەو دێتەوە، کابرا هاتە سەر بەدیعەیی و گۆتی : بەدۆ، کچێ بەدۆ، ئەتوو سەلامەتی !؟ باشبوو بەدۆ جوابی داوەو گۆتی : سەلامەتم سەلامەت، مەغدید مەکە هەرا، لەگە پیاوانمان لێ قەومایە..! جەعۆ قۆری مەغدیدی گرت و بردیە دووریمەو خوندە خوندەکی لەگەر کرد، جەعۆ دستی لۆمن درێژ دەکردو قسەی لۆ دەکرد، بڕەکی پێچوو هەر دووک هاتنەوە، کابرا گۆتی : ببورە جەنابی وەزیری نەمناسی، مادام خێزانم سەلامەتە و ئەنگۆش سەلامەتن، ماری دنیایێ هیچ نیەو ئین شاڵلا دێتەوە، سوپاسم کردو گۆتی : ئەنگۆ بڕۆن لۆ ئیشی خۆتان، ئەمن وەزعەکەی تەرتیب دەکەم و دوایێ ئێکدی دەبینین..! ئەمە خواحافیزیمان کردو سواری تڕومبێلی بووین و بەڕێکەتین لۆ کن وەزیری کشت و کاڵی..
لە ڕێیێ لەدرم بووە مەرەق بزانم جەعۆ چی بە مەغدیدی گۆتیەو مەغدید ئەوها بووە مەرحەم، گۆتم : ئەرێ جەعۆ، ئەتوو بەمن برێ چت بە مەغدیدی گۆ ؟ گۆتی : سبەینێ سبەینێ ! گۆتم : چ سبەینێ ؟ گۆتی : سبەینێ مەغدید دێتە وەزارەت و هەموو چشتەکی تێدەگەی ! گۆتم : لۆ دێتە وەزارەت ؟ گۆتی : لۆ ئەتوو بەتەمای مەغە ئەوها بە سووک و سانایی وازت لێبینی ! دوعای بکە بە سەلامەتی ڕزگارمان بی..! مام عەوڵا گۆتی : ئەمن ئەو جەعۆیەی بناسم، خۆی لەهەر ئیشەکی هەربقرتێنی ئیللا گوی تێدەکا..!
گەیشتینە ماری وەزیری کشت و کاڵی، لە تڕومبێلی هاتمە خوارێ و چوومە ژۆرێ، بەرەو پیرم وەهات و چاک و چۆنیمان کرد، زۆر بێتاقەت و خەمبار دیاربوو، دەستی گرتم و گۆتی : فەرموو بابچینە ژۆرێ، لە قاندرمەکان بەسە کەتین و چووینە ژۆرێ، هەر دانیشتین دوو شەربەتیان هینا، قوومەکم لێداو دامناوە، گۆتم : ئەرێ خێرە ئەوها بێتاقەتی چبووە ؟ گۆتی : کورە هەر لێیگەڕێ، تووشی دەردی خۆم بوویمە ! گۆتم : دەقسان بکە بزانم چبووە، بەشکو هاوکاریت بکەم ! گۆتی : بریا ئەو سەفەرەی لوبنانم قەت نەکردبایە ! خۆم لە گێلی داو گۆتم : لۆ ؟ گۆتی : کارەساتەکە لەوێ دەست پێدەکا، ئەو شڕبلە خۆڕیە ئەمەی بردە سەر ئاوێ و ئاوی نەداینێ، بە کورتی و بە کوردی ناوکی هیناینەوە ! گۆتم : کوو، تێناگەم..! گۆتی : توخوا ئەگەر چیدی خۆت خەشیم بکەی، ئەتوو نەزانی کێ دەزانی، یەعنی سیدیەکە بە دەسته توو نەگەییە !؟ گۆتم : وەڵلا چت لێ بشارمەوە، بەرێوەڵلا بەدەستم گەییە ! گۆتی : وەڵلا هەرکی وەزیرە لەسەر چاو کەتیە، بەس ئەتوو نەبی دەنا فلیمی هەر هەمووانی تێدایە، گۆتم : ڕاست دەکەی دیتیتم، بەران ئەنگۆ بەتەمای چنە ؟ گۆتی : جارێ شڕبل بەس فلیمەکەی ناردیەو هیچ نارێ، تەئکیدم پاشی چەند ڕۆژیدی، داوای پارەکی زۆر دەکا، نەشیدەینێ هەڕەشەمان لێدەکاو دەرێ براوی دەکەمەوە، ئێ ئەو وەختی حەیاو نامووسمان دەچی و هەم لەناو میللەتی، هەم لهناو مارو مندارم و خزم وکەسم، ئەو وەختی براو بۆوە سەری خۆم لۆ کێندەرێ هەرگرم..! گۆتم : بەگێی منتان نەکرد، ئەمن دەمزانی چشتەکی ئەوها ڕوودەدا، لۆیێ دمگۆتەنگۆ ئاگاتان لەخۆبی، بەس ئەتوو بەمن برێ، دەبی نوسخەیان لۆ سەرۆک وەزیرانیش نەناردبی ؟ گۆتی : وای لۆ دەچم ناردبیان، کوو نانێرن..! پاشان هەستاوەو باینەکی لەژۆرێ هات و چوو، گۆتی : بەڕای توو چبکەین، چارەمان چیە ؟ گۆتم : جارێ خۆتانی لێ بێدەنگ کەن، هەتا شڕبل دێتە سەر خەت، هەنگی بزانن داوای چدەکا، ئەو وەختی دەبی بەهەر هەمووتان تەکبیرەکی بکەن..!
گۆتی : ئەوە فکرەکی باشە، بەس ئەتوو بەمن برێ چ ئیشت بەمن بوو ؟ ئەمنیش فایلەکەم لە پێش داناو گۆتم : تەماشا ئەو پڕۆژە نازدارەی بکە، ئەو دوو زەلامە دەیانەوێ لەکوردستان بیکەن، بەڕاستی هەقی هاوکاریان هەیە..! وەزیری کشت وکاڵ فایلەکەی هەرگرت و بەینەکی تەماشای کرد، پاشان دایناوەو گۆتی : ئەوانە خزم و ناسیارتن ؟ گوتم : ناوەڵلا، بەران لە ڕێی برادەرەکی هاتنە کنە من و تەکلیفیان لێکردم قسەت لەگەر بکەم، تئکیدیش بە هیچی لۆمن تێدانیە..! گۆتی : دەزانم، ئەتوو ئەو چشتانە ناکەی، بەران بە ڕاست و دروستی پێت برێم، ئەو ئیشە لە دەستە من نیەو پێم ناکرێ ! گوتم : بەتوو نەکرێ بەکێ دەکرێ، ئەدی ئەتوو وەزیری کشت و کاڵ نی ؟ گۆتی : بەرێوەڵلا هەوم، بەران دەرێی ئەتوو نازانی ؟ گۆتم : چ بزانم ؟ گۆتی : ئەو کومپانیایەی شیرو ماست و قەیماغ و کەرەو خامەو هێلکەی دەینیتە کوردستان ئی سەرۆک وەزیرانیەو خۆی سەر پەرشتی دەکا، ئێ موستەحیلە سەرۆک وەزیران بێلی ئەو پڕۆژە بکرێ، چونکە گەورەترین زەڕبە بەخۆی دەکەوی..!

گۆتم : یەعنی هیچ چارە نیە ؟ گۆتی : چارەی چ هەبی، ئەتوو بەخۆت نازانی ئەو وڵاتە هەر هەمووی کۆنترۆل کرایە، وەڵلا سبەینێ بزانن پیستی سەی پارەی دەکا، بەخۆیان دەیهینن و دەیفرۆشنەوە، گۆتم : ئەگەر بەسەرۆک وەزیرانی برێم بە ئاقر چدەرێ ؟ گۆتی : وەڵلا حەوارە بەگەوارەت پێدەکاو دەرێ : وەڵلا ئەوە پڕۆژەکی زۆر باشە و لەگەر وەزارەتی کشت و کاڵی قسەی بکە با ئیشەکەت لۆ بڕوێنن، لەولاش بەمن دەرێ ئیشەکەی ڕاگرەو مەیکە، خۆ ئەگەر بزانی ئیشەکەی خۆی خێری نەمایە، ئەوە ڕێ دەداتە ئەو دوو کەسەی ئیشەکەی بکەن، بەشەرتەکی بیکەنە شەریک، سەتا پەنجاو یەک لۆ خۆیی و سەتا چل و نۆش لۆوان، گۆتم : وەڵلا ئەوەش باشە، بەشکو بەهەردوولای پڕۆژەکەی تەواو دەکەن و خێری دەبی لۆ خەرکی ! گۆتی : هەر دوولا کێنە ؟ گۆتم : ئەو دوو زەلامەو سەرۆک وەزیران ! گۆتی : یەعنی ئەتوو وە تێدەگەی سەرۆک وەزیران پارەی دەدا ؟ گۆتم : تەبعەن، ئەدی کوو دەبتە شەریک ؟ گۆتی : وەڵلا یەک فلسی ناداو هەر ئەوها دەبتە شەریک، سێ چار نەفەری خۆشی لەسەر حساباتی دادەنێ، وەبی بزانی چەندی خێرەو چەندی بەسافی پێ دەبڕێ، سەرە مانگان گێز پارەکەی وەریدەگری..!
بەینەکی بێدەنگ بووم و دامام، وەزیری کشت وکاڵ گۆتی : چیە، لۆ بێدەنگی ؟ گۆتم : وەڵلاهی ئەوەی لەو وراتەی لەگەر ئەو میللەتەی دەکرێ، لە هیچ جێیەکی دنیایێ نەکرایە، وەڵلا وەبیللا دوژمن ئەوەی لەگەر ئەو میللەتەی نەکردیە، گۆتی : تازە دەزانی ! ئەدی ئەمن لۆ دەرێم فرسەتەو لێدە، بیتاقەکت لۆ دەرچووەو بدە بەرێ، ئێرە ئەوهای لێهاتیە، هەرچەند داری تێ وەردەی زیاتر بۆنی دێ..! پاشان جغارەکی دەریناو لۆ منی ڕاگرت، گۆتم : ببورە ناکێشم ! جغارەکەی هاویشتە دەوی و بە چەرخەکی زەردی بریقەدار پێی کرد، قوومەکی دورو درێژی لێداو دووکەرەکەی بە عاسمانێ وەرکرد، ئەوجە ڕووی لەمن کردو گۆتی : زۆرم پێ سەیرە پیاوەکی وەکی جەنابت بوویە وەزیرو بەلاش و حەلاش ئەوها خۆت ماندی دەکەی..! وەرامم نەداوەو هەستام، خوا حافیزیم لێکردو هاتمە دەرێ، گەیشتمە دەرکەی تڕومبێلی و گۆتی : هەر کەسەو خەمەکی لەبەرە، هەونکە خەمی گەورەی من ئەوەیە کوو خۆم لەو ڤیدیۆیەی قورتارکەم..!
سواری تڕومبێلی بووین و گەڕاینەوە، لەڕێیێ گۆتمە جەعۆی : ئەرێ ئەتوو چت لەو بەبەغایانە کرد، خۆ وەکی گەڕایەوە وەزارەتیش پێت نەبوو ! گۆتی : یەکسەر بردمەوە مارێ، دوو حەفتان لەمارێیان دادەنێم و خزمەتیان دەکەم، ئەوجە دەیانفرۆشم، بە قازانجەکی باش، بەران پێم برێ بایی چەندی بوون ؟ گۆتم : نامەم لۆشڕبلی ناردیە، هەر وەرامی داوە پێت دەرێم، وەبی پارەکەی لۆ بنێری، گۆتی : زۆر باشە، گۆتم : دەوجە بادەوە لۆ مارێ پیرداود بێ ددانی، وەبی چایە مۆرینگۆیەکەی بدەینێ ! مام عەوڵا گۆتی : زۆر باشە، بەران ئوستاج لۆ نایێی وەکی پیاوان چاکەکم لەگەر بکەی ! گۆتم : چاکەی چ ؟ گۆتی : بەتەمامە ئەوشۆ بچمە کن ست زولێخای و لەوێ بمینێمەوە، بەخانێش دەرێم : ئەوشۆ لە وەزارەت خەفەرم، ئەگەر دنیابوو خانێ پرسی، ئەشەدەن و بیللایەکم لۆ بکەو برێ خەفەرەو وەسسەلام، وەعدی پیاوان بی دەعوەتەکی دەرەجە ئێکی سەروپێچکت بکەم، گۆتم : مام عەوڵا، دەتەوێ بەخۆت لەگە زێخەی تۆپانێی بکەیی و تۆپەکەش بەمن بینیەوە لە پشت گۆلێ ! گۆتی : ئوستاج خێرە خێرە، ئەتوو لۆ ئەو خێرەی لە دەست خۆت دەدەی ! گۆتم : کورە ئەوە کا خێرە، ئەتوو دەتەوێ درۆیەکەی بەمن بکەی ! گۆتی : ئوستاج درۆی مەسلەعەت خێرە خێر..! گۆتم : ئاخیرت خێربی مام عەوڵا لەو کەین و بەینەی..!
گەیشتینە پێش ماری پیرداود بێ ددانی، مام عەوڵا هاتە خوارێ و دەستی لەسەر جەڕەسی دەرکەی داناو لاینەبرد، جڕو جڕو جڕو جڕ..! گۆتم : دە دەستت لابە ماخران، وەڵلا جەڕەسەکە دەسووتێ، گۆتی : بابسووتێ، پیرداودی سەگسار دەیەوێ بەجەگی قیتی کاتەوە..! جەعۆ گۆتی : ئەی خوا بتگرێ عەولارۆک، دەتبینمەوە دوو مانگی دی کوو زێخە تڕت پێدەکا، مام عەوڵا گۆتی : بێم قڕو قەپۆزت بشکێنم خۆڕی..! وەختەکی پیرداود بێ ددان بەمشەوەشی هاتە دەرێ و هەتا کلکە ماسیحەیە ڕایوەشاندە مام عەوڵای، وەڵلا خۆی لانەدابا ناو ملانی دەشکا..! پیرداو بێ ددان گۆتی : ئۆ، ئەوە ئەتووی عەوڵا، وەڵلا وامزانی منداری کۆرانێنە دیسان پلیان بە جەڕەسی وەنایە، پاشان لۆلایمە هات و گۆتی : یاخوا بەخێر بێی جەنابی وەزیر، دەفەرموو فەرموو با لەخزمەت دابین، گۆتم : زۆرمەمنون، فەرموو بگرە، ئەوە ئەمانەتەکە لە لوبنان لۆم هینای، پیرداود بێ ددان خەنی بوو، وەریگرت و لەخۆشیان فڕی، گۆتی : وەڵلا ئەو ئیشەی توو بە عەجەکی هەیە، خوا خێرت بنووسی، زۆر مەمنونم، خواحافیزیم لێکرد، زۆر ڕجای کرد دانیشین، گۆتمان : مەمنون، دەڕۆین..!
چووینەوە لای مارێ، عەوڵا هاتە خوارێ و گۆتی : وەکی پێم گۆتی ئوستاج ئەمن ئەشۆ خەفەرم، گۆتم : ئەوها بڕوا سەری خۆت بە فەتارەت دەدەی..! ئیدی ئەو ڕۆیی و جەعۆش چۆوە ماری خۆیان و ئەمنیش چوومەوە مارێ..!
پاش عیشایەکی درەنگ لە دەرکەی درا، مندار چوون کردیانەوە، هاتنەوەو گۆتیان : بابە، نەنە خانێ هاتیەو ئیشی پێتە ! گۆتم : قەوما، خوایە بەخێری بگێڕی، هەستام چوومە دەرێ، دەبینم نەنە خانێیەو بە مشەوەشی ڕاوەستایە، گۆتم : بەخێراتی ! یەکسەر گۆتی : عەوڵا لە کێیە ؟ گۆتم : لۆ دەپرسی ؟ گۆتی : بەمەی گۆتیە خەفەرم لە وەزارەتی، جەعۆش تازە هات و گۆتی : کا عەوڵارۆک بچین تەشریفەکی بخۆین، گۆتم : ئەوشۆ خەفەرەو نەهاتتەوە ! جەعۆ گۆتی : هەی هەش بەسەر، خۆ وەزارەتی ژنان خەستەخانەی تەواری نیە، هەتا خەفارەتی هەبی..! گۆتم : ئەی گوو بەگۆڕت بی جەعۆ، دیسان گووت تێکرد..!

نەنە خانێ گۆتی : جەعۆ گووی لە چ کرد ئوزتاج ! گۆتم : ئوستاجی مام عەوڵای بەس نەبوو، نۆبەتی ئوزتاجی تووە..! گۆتی : هەونکە ئەو هەموو شێرو ڕیویەی لۆمن مەینە، دۆغری پێم برێ عەولارۆکی مێردم خەفەرە یان نا ؟ ئەگەر خەفەرە پێم برێ لەکێ خەفەرەو هەونکە دەمبەیە کنی، ئەگەر خەفەریش نیە، پێم برێ لەکێیەو فەوری و سەوری بمبە کنی..! گۆتم : ئەرێ نەنە خانی ئەو هەموو هێن و منهێنە بەکێ دەکرێ، ئەمن هیچ ئیش و کارم نیە بێم بەدوو توو کەوم و لە مێردت بگەڕێی، وەزارەتی پێدەزانی و بڕۆ وێندەرێ بزانە مێردت لە وێیە یان نا..! وەکی ئەمن یەک دوو دایسم تووند کرد، نەنەخانی یەک دوو جەڕەی باداو شلی کردەوە ! ئەوجارە تووندترم کردو گۆتم : ئەگەر سبەینێ جەعۆم نەقری کەور گۆسکی نەکرد ئەمن پیاوەکی خراپم، ئەو کارخانچیە لەمە بوویتە جاسووس و بەس ئەخباران دەین و دەبا..! نەنە خانێ گۆتی : ئەمن ئەوە دەچم عەبای داوێمە سەر شانم و لەگەر بەدرەددینی کوڕم دەچمە وەزارەتی، لەخوام دەوێ عەولارۆک لەوێ نەبی، وەڵلا وەبیللا دەبی پڕی قوونی سماق بکەم..! نەنەخانێ بەپەلە پەڕیوە لای ماری خۆیان و هاواری کرد : بەدە گوو گەورە هەستە پێشم کەوە بابڕۆین..! ئەمن چوومەوە ژۆرێ و فکرم هەر لای ئەو سماقەی بوو کە نەنەخانێ گۆتی لە قوونی عەولای دەکەم، دەمگۆ یا ئیلاهی دەبی عەولا چی بەسەر بێ و کوو دەرپەڕی لۆ کۆرانێ هەندەی دەخۆ هەردا لۆ عاسمانێ..! چونکە مسۆگەرم کردبوو سماقەکەی تێدەکەن..!
سبەینێ نانم خواردو چوومە دەرێ بڕۆم لۆ وەزارەتی، دیتم جەعۆ ڕاوەستایەو خۆی مۆن کردتەوە، سەلامم لێکردو وەرامی داوە، سواری تڕومبێلی بووم و بەڕێکەتین، جەعۆ دەیویست خۆی وا پیشان بدا ئاگای لە هیچ نیە، بڕەک ڕۆیشتین و گۆتی : ئەڵلا هەر ئەتوو، زاتی هەق هەر ئەتوو، بمان پارێزی لە زمانی سەو سواران..! گۆتم : جەعۆ ! گۆتی : بەرێ گەورەم ئەمرکە ! گۆتم : ئەتوو ئەو هەرایە چبوو شەوێ دروستت کرد ؟ گۆتی : هەرای چ جەنابی وەزیر، ئەمن لەکنەتوو ڕۆیشتم و چوومەوە مارێ و لێی نووستم، ئەتووم مری ئاگام لەهیچ نیە ! گۆتم : ئەتووم بتۆپی درۆی دەکەی، کێڕان خۆت گەیاندە نەنە خانێی و ئەو گڵدغەت دروست کرد..! گۆتی : ئا، ههههه، ئەوەی عەوڵای دەرێی ! چشتەکی وەها نەبوو، چوومە دووی بچین تەشریفەکی بخۆین، ئەویش لەمارێ نەبوو..! گۆتم : بابچینە وەزارەت ئەمن عیلاجت دەکەم..! جەعۆ ڕەنگی وەکی پەلکە پیازی لێهات و نەیدەزانی کوو تڕومبێلی باژوا، گۆتم : هەونکە نا هەونکە، خۆ بە تڕومبێلەکی دادەدا، خوا ڕەحمی کرد بەسەلامەتی گەیشتین..!
چوومە ژۆرەکەی خۆم و مام عەوڵا هات، گۆتی : ئوستاج بەخێراتی، ئەعوارت کووە ؟ گۆتم : پێم برێ ئەتوو کووی ؟ گۆتی : وەڵلا ئەو نامەی توو نەبایە کە شەوێ لۆت ناردم، هەونکە پیستم لە دەباغخانەی کەتبوو، باشبوو وەکی خانێ هات گەیشتبوومە وەزارەتی، وەڵلاهی مەمنونی توومە، شەرتبی دەبی دەردەکی بدەمە جەعۆی با بەدەواری شڕی نەکردبی ! گۆتم : ئەتوو لۆمنی لێگەڕێ، بەخۆم دەزانم چی لێدەکەم..!
دانیشتبووم و تەماشا فایل و مایلم دەکرد، لە نووسینگەی سەرۆک وەزیرانی نامەکم لۆ هات و نووسرابوو فەوری بگە ئەنجومەنی وەزیران، کۆبوونەوە هەیە..! گۆتم : تەواو سەرۆک وەزیران بە بەزمەکەی زانیەو هەونکە ئاگری لە نیوچەوانی دەباری..! گۆتمە مام عەوڵای ئەتوو بڕۆوە مارێ چونکە خەفەر بووی، جەعۆ یاڵلا بابڕۆین لۆ ئەنجومەنی وەزیران، چووینە دەرێ و سواری تڕومبێلی بووین و بەڕێکەتین، گەیشتینە ئەنجومەنی وەزیران و دابەزیم، گۆتمە جەعۆی لێرە نەجولێی، نەچیە ئەولاو ئەولا..! لە قاندرمەکان بەسەکەتم و چوومە ژۆرێ، گەیشتمە نووسینگەی سەرۆک وەزیرانی، تەماشام کرد ئەمن یەکەم کەسم گەیشتیمە، سەلامم کردو سەرۆک وەزیران وەرامی دامەوە، چاک و چۆنیمان کردو گۆتی : فەرموو دانیشە، دانیشتم و گۆتی : دەنگ و باسی وەزارەتی کووە ؟ گۆتم : باشە، ڕۆژ لەڕۆژ باشتریش دەبی، بەران خێرە وا بەپەلە ناردتە دوومان ؟ گۆتی : با وەزیرەکانی دی بێن، ئەوجە قسەی لێ دەکەین..!
وەزیرەکان هوردە هوردە بەدەرکەتن، هەر هەموویان ڕەنگیان تێکچووبوو، مشەوەش بوون، نەیان دەزانی کوو تەماشا سەرۆک وەزیرانی بکەن، سەرۆک وەزیرانیش هیچ خۆی تێک نەدابوو، زۆر ئاسایی دەهات و دەچوو و قسەی دەکرد، وەکی هەموو هاتن گۆتی : بابچینە ژۆری دانیشتنی، هەستاوە بەپێش کەت و ئەمەش کەتینە دووی ؟ وەزیری ئاوەدان کردنەوە هاتە تەنیشتە من و گۆتی : چ هەیە چ نیە ؟ گۆتم : نازانم ! گۆتی : جەنابی لە کنە توو هیچی نەگۆ ؟ گۆتم : با..! ڕەنگی پەڕی و گۆتی : چیگۆ ؟ گۆتم : گۆتی : باشە ئەوڕۆ ڕۆژەکی فێنکەو زۆر گەرم نیە..!
مایتی[1]