ماسییەک لە زەلکاودا
چیرۆک
نووسینی: ئەڵوەند تەڵعەت

$جەنگیزخان$
خەریکی کێشانی تابلۆیەکم، بەڵام ڕەنگەکانیم بۆ دەرناکرێت، دەمەوێت ماسییەکە ڕەنگی سەوز بێت و ئاوی ڕووبارەکەش شین، کەچی هەرچی ئەکەم ئاوەکە ڕەش دەردەچێت و ماسییەکەش سوور، دەستەکانم دەلەرزێت و ناتوانم فڵچەکە بۆ ئه و ڕەنگە ببەم کە دەمەوێت، بەردەوام هەوڵدەدەم، بەڵام هەر شکست دەهێنم، وەک ئەوەی شکست بووبێت بە خوێنم و بەناو دەمارەکانمدا هاتوچۆ بکات. لەوکاتەی کە دەمەوێت ڕەنگی شن و زەرد تێکەڵ بکەم بۆئەوی سەوز دەربچێت کەچی پڕتەقاڵی دەردەچێت پیاوێکی سەر و کەللە زلیش بە ژوور دەکەوێت، کڵاوێکی ئاسنینی لەسەرە و جل و بەرگێکی سەربازی چاخە کۆنەکانی لەبەردایە و بەدەستی ڕاستی ڕمێکی بەدەستەوە گرتووە و بەدەستەکەی تریشی بوتڵێکی ئاسنی شەوقدار، بەهێمنی و بەشۆقاوی گەورە ژوورەکەم دەپێوێت، سەری بەره و خوار شۆڕکردۆتەوە و لە ژێر لێوەوە شۆ قاوەکانی دەژمێرێت.
نۆسەد و پەنجاویەک… نۆسەد و پەنجاودوو… نۆسەد و پەنجاو …سێ…
تەواو، ئێرەیە. لە کۆتاییدا واخەریکە ئەرکەکەم بە کۆتا دێت. ئەوە لەبەرخۆیەوە دەڵێت و پاشان سەری بە لای مندا دەسوڕێنێت.
خەندەیەکی سەیر دەکات، بە جۆرێک کە دووچاوە بچوکە بزێوەکانی و ڕەنگە پەمەییەکەی و ڕوومەتە سوتاوەکانی گاڵتەجاڕانەتر لەوەی کە هەیە نیشاندەدات.
ویستم لێی بپرسم کێی! بەڵام ئه و زووتر فریاکەوت. من جەنگیزخانم! پاشای پاشاکان و هەڵبژاردەی خودا و نێردراوی ئاسمان، من ئەمڕۆ دووبارە گەڕاومەتەوە بۆ بەجێگەیاندنی ئەرکێکی مەزن….
سەیری دەکەم و هیچ ناڵێم. نازانم، یان لەوانەیە نەتوانم هیچ بڵێم، ئەوە کێیە خۆی لە من کردووە بە جەنگیزخان؟! ئەی ئەگەر ئەویش بێت چی دەکات لێرە؟ دەبوایە ئێستا ئه و لە باوەشی گەرمی جوانترین ژنەکانی جیهان بووایە و خۆشترین خواردن و باشترین شەرابی لە ڕازاوەترین کۆشک و تەلارەکانی دونیا بنۆشیبایە، نەک لێرە و له و ماڵە وێرانەی من خەریکی پێوانی ژوورەکەم بێت.
پشت لە من دەکات و بە پێیەخشکێ خەریکی پاککردنەوەی بەشێکی بچوکی ناوەڕاستی زەوی ژوورەکەمە، پاشان بەتوندی ڕمەکەی دەچەقێنێت و بۆ دڵنیاییش بە نووکی پێڵاوەکەی چەند شەقێکی لێدەدات، بەڵام زۆر توند دایکوتاوە و بەهیچ شێوەیەک ناجوڵێت.

ئێستا دیسانەوە ڕوو لە من دەکاتەوە و بە تیلەچاو سەر مێزەکەی بەردەمم و ڕەفەکەی تەنیشت جێخەوەکەم دەپشکنێت.
پەرداخی ئاسنییت نییە؟!
له و ساتەوەی کە هاتۆتە ژوورەکەم ئەوە یەکەمین جارە دەمم دادەپچڕم و شتێک دەڵێم. پێموابێت دەڵێم (نەخێر، لەم ژوورە تەنها پەرداخی شوشە دەست دەکەوێت).
سەری بادەدات و ناڕەزایی دەردەبڕێت، نەخێر شوشە نابێت، دەبێت ئاسن بێت، من شوشە بە سوکایەتی دەزانم، چۆن دەکرێت؟ نانا نەخێر نابێت، هەر بیریشی لێ مەکەوە. بە ناو ژوورەکەم چەند پیاسەیەکی کورت دەکات و پەنجەی شایەتمانی لەسەر لێوی دادەنێت، پاشان لەپڕ سەری بەتوندی بەرز دەکاتەوە و بەدەنگی بەرز هاوار دەکات:
بەڵێ، دۆزیمەوە، ڕێگایەکی زۆر باشە، چۆن زووتر بیرم بۆ ئەوە نەچوو.
کڵاوە ئاسنینەکە لەسەری دەهێنێتە خوارەوە و لەسەر مێزەکەی بەردەمم دایدەنێت، پاشان سەری بوتڵەکە دەکاتەوە و شلەیەکی سووری جەرگیی تا نیوەی تێدەکات. بە هەردوو دەست هەڵی دەگرێت و پێشکەشی منی دەکات.
پێی دەڵێم ئەوە چییە؟!
بەخەندەیەکی گاڵتەجاڕانەوە دەڵێت ئەوە شەرابی شکۆمەندییە. ئێستا تۆ پاسەوانی کۆڵەگەی زەویی، بۆ ئەمەش پێویستت بە شکۆمەندییە، هەربۆیە هەرچەندی دەتەوێت دەتوانیت لە شەرابی شکۆمەندی بنۆشیت.
دەمەوێت پێی بڵێم بۆ دەبێت من پاسەوانی کۆڵەگەی زەوی بم، بەڵام ئه و هەڵدەستێت و بەره و لای ڕمەکە هەنگاو دەنێت. چەند جارێک بە دەوری دەخولێتەوە و پاشان دێتە سەرباسکردنی خۆی:

هەڵبەتە ناوی منت لە شوێنێک، یان لە کەسێک هەر بیستوە. من جەنگیزخانم، ڕۆڵەی ئاسمان و بەرجەستەکاری ئیرادەی خوداوەند. من ئەمڕۆ هاتووم بۆ دووبارە گێڕانەوەی زەوی بۆ سەر ڕێڕەوی خۆی. ڕەنگە هیچ کەسێک ئەوە نەزانێت کە گەردوون سوڕێکی خۆی تەواو کردووە و ئەگەر فریای نەکەوین زەوی هاوسەنگی خۆی لە دەست دەدات و گلۆر دەبێتەوە بۆ ناو بۆشایی گەردوون و دواجار لە چاڵە ڕەش و تاریکەکانیدا ون دەبێت. من جارێک و له سەرتای سوڕی گەردوون ئه و ڕمەم لە پشتی زەوی چەقاند، بۆ ڕاگرتنی هاوسەنگییەکەی و خۆلانەوە بە دەوریدا، ئێستاش لە دەستپێکی سوڕی تازەدا دەمەوێت هەمان کار ئەنجام بدەم. جاری پێشوو هەر بۆ خۆشم پاسەوانێتی ڕمەکەم دەکرد و هەر خۆشم له و شەرابەم دەخواردەوە، بەڵام ویستی چارەنووس ئەم جارە تۆی ڕاسپاردووە بۆ ئه و ئەرکە، بۆیە پڕبەدڵ پیرۆزبایی هەڵقوڕاندنی شەرابی شکۆمەندیت لێ دەکەم.
بەدرێژایی قسەکانی کڵاوە شەرابەکەی بە هەردوو دەست بەره و لای من درێژ کردووە، دەمەوێت پێی بڵێم کە من حەز بە خواردنەوەی شەراب ناکەم، بەڵام ئه و دەستی کردووە بە پیاهەڵدانی شەرابەکەی.

ئاگاداربە، ئەوە شەرابێکی ئاسایی نییە، هیچ کە تەمەنی زیاتر لە نۆسەد ساڵە، بگرە پێکهاتەکەشی زۆر سەرنجڕاکێشە، ئەوە تێکەڵەیەکە لە خوێنی لاوی تازە پێگەیشتو و شیری تازەی مەمکی دایکانی تازە مناڵبو و بۆنی جەستەی کچانی شۆخ و فرمێسکی گەرم و تازە هەڵڕشتووی دایکان. ئەوە دیارییەکی کەموێنەیە کە لە لایەن پاشای پاشاکانەوە دروستکراوە و هەر بە دەستی خۆشی پێشکەشت دەکات، ئەوەش لە بەرانبەر ئەرکێکی ئاسان، بەڵام مەزن.
هیچ ناڵێم، تەنها کڵاوی شەڕابەکە وەردەگرم و بەسەر سەری خۆمەوەی دەکەم، تامی سوێرە وەک فرمێسک، کەمێکیش شیرینە لە شیری دایکم ئەکات. بۆنی ناخۆشە، بۆنی خوێن ئەکەم، بۆنی جەستەیەکی خوێناوی دەکەم. لێواری کڵاوەکە لە لێوم دوور دەخەمەوە، سەرم سوڕ دەخوات و هێڵنجی ڕشانەوەم دێت.
ئەوە مەست بوونە، ئەوە ئه و پەڕی چێژە. تۆ ئێستا لەسەرەتای پەیپێبردنی بە نهێنییەکانی ژیان، هەوڵبدە چێژی لێ ببینی، تۆ ئێستا خاوەنی هەموو شتێکیت، خوێنی شکۆمەندی دەمارەکانتی سڕکردووە.
سەرم گێژ دەخوات و بیناییم تەڵخ بووە، قسەکانیم وەک هاژەی تاڤگە دێتە بەر گوێ، ئێستا هەست بە خۆم ناکەم، هەست دەکەم لە قوڵایی چاڵە ڕەشەکانی گەردوونم، گوێم لە قیژەی ماسییەکە، دەیەوێت لە هەناوی خۆی بێتە دەرەوە و ببێت بە هیچ، لە ڕەنگە سوورەکەی بێزارە، تاریکی پێستی ئازاردەدات، تاریکییەکی کوشندە بەتامەزرۆوە ڕەنگە سوورەکەی هەڵدەلوشێ. سەیری کاتژمێرەکەی دەستم دەکەم، کار ناکات. زەمەن وەستاوە و میلی کاتژمێرەکەش نوستووە.
ئەوە ئەوپەڕی مەستییە، ئێستا تۆ لە قوڵایی دەریای چێژ مەلە دەکەیت، هەوڵبدە هەست بە ئاسودەیی بکەیت، بەئارامی مەلە بکە و لە خوێنی لاوان و فرمێسکی چاوێکی ڕەش و تەڕ بخۆوە، لە بۆنی جەستەی کچێکی ناسک و جوان چێژ وەرگرە، گوێ بۆ سەمفۆنیای سێکس بگرە، گۆێ بۆ ئاوازی ناڵە و گریان بگرە، ئه و دەنگانە وات لێ دەکەن بخەویت و خەونی جوان ببینیت، خەون بە گەورەیی ببینیت، لە بەرزترین شوێن دانیشتوویت و مانگ لە لای ڕاست و خۆریش لە لای چەپت وەستاوە و پاسەوانیت لێ دەکەن، ڤینۆسیش لە بەردەمت سەمایەکی ئەفسوناوی دەکات، مرۆڤەکان لە دەمی کڕنوشبردندا سەریان لە زەوییەکە چەقاندووە و ئەوپەڕی کۆیلایەتیت بۆ دەنوێنن. ئەوە جوانترین شتێکە کە شەرابی شکۆمەندی پێت دەبەخشێت، هەوڵبدە چێژی لێوەرگریت و بەتەواوی هەستەکانتەوە تێکەڵی ببە، ببە بە ئەو، یان شکۆمەندی لە ڕێگای یەکە بەیەکە دڵۆپەکانی شەرابەکە لە هەناوت بچەسپێنە و پارێزگاری لێ بکە، چونکە ئێستا تۆ پاسەوانی کۆڵەگەی زەویت و تا سوڕێکی تازەی گەردوون ئەرکی پاراستنی هاوسەنگی خۆلانەوەکەی دەکەوێتە ئەستۆی تۆ، زەوی ئێستا موڵکی تۆیە.
تینی ڕشانەوە تەنگی پێهەڵچنیوم، دەمەوێت بڕشێمەوە، لە ئێستادا ئەوە گەورەترین ئارەزوومە، دەمەوێت یەک پارچە ببم بە ڕشانەوە و ڕۆبچمە ناو قوڵایی درزێکی زەوی، بۆنی شەرابەکە هەناسەی توند کردووم و ماسییەکەش گینگڵ دەدات و هەست بە ئازاری خنکان دەکات و واخەریکە دەبێت بە پەڵەیەکی ڕەشی خوێنی مەیوو. تامێکی سەیر گەرووی وشک کردووم، سوڕانەوەی خوێن دەمارەکانم ئازار دەدات. لە قوڵایی چاڵە ڕەشەکاندا هەست بە هیچ شتێک ناکەم، تەنانەت زەمەنیش وەستاوە و نازانم چەندێکە ئه و ئازارە لە هەناوم پێچ دەدات. ئێستا هەوڵ دەدەم پەنجەی شایەتمانم بدۆزمەوە، بەڵێ، ئەوە فریادڕەسێکە و دەتوانێت لەم بۆشاییە سامناکە دەرم بهێنێت. پەنجەی شایەتمانم بەباشی دەناسمەوە، پەڵەیەکی سووری پێوەنوساوە، ڕەنگە ئەوە خوێنی ماسییەکە بێت، نەخێر ئەوە ڕژان و تێکەڵ بوونی ڕەنگەکانە، لە کاتی تێکەڵبوونیان ڕەنگی سوور زاڵترینیانە و هەموو شتێک دەبێت بە سوور. ئێستا بە تەواوی هێزی خۆمەوە پەنجەم لە گەرووم دەچەقێنم، هەرچەندی زیاتر دەیچەقێنم هێڵنجی ڕشانەوەم توندتر دەبێت، دەترسم تینی ڕشانەوەکەم ئەوەندە بەهێزبێت کە پارچەیەک لە جگەرم، یان تەواوی گەدەم لەگەڵی دەرپەڕێتە دەدەرەوە.
ئێستا شلەیەکی سوور پڕ بە زارم دێتە دەرەوە، ئەگەر به و حاڵە بەردەوام بێت دەترسم زەوی لە خۆیدا نۆقم کات، ڕشانەوەکەم نائاساییە و هەست دەکەم جەنگیزخانیشی توشی شۆک کردووە، چەند هەنگاوێک دەگەڕێتە دواوە و چەند شتێک دەڵێت، بەڵام من گوێم لە هیچ شتێک نییە، هەست دەکەم به و جۆرە زیاتر ئاسودە دەبم، دەهێڵم زیاتر زارم بکرێتەوە و ئه و شلەیە بە خوڕتر بڕژێتە ژوورەکەم، ڕەنگە ئێستا خەمی ڕمەکەی بێت، دەترسێت نوقم بێت و ئیدی نەتوانێت جارێکی تر بیبینێتەوە.
– پێموابێت چەند هەنگاوێک لە حیسابەکەم هەڵە بووم، ئەوە ئه و شوێنە نییە کە بۆی دەگەڕێم، نەخێر، خاکەکەی نەرمە و ڕەنگە بەرگەی قورسایی زەوی نەگرێت و لە ناوەڕاستەوە شەقی بکات.

$پەیکەری شکاو$
ژوورەکەم تاریکە و هیچ شتێک نابینم، بە دەستەکوتێ سویچی گڵۆپەکە دەدۆزمەوە، بەڵام کارەبا نییە. هەست بە بێهێزی دەکەم، وەک ئەوەی جەستەم داڕزا بێت، بۆنێکی ناخۆشم لێدێت، بۆنی ڕشانەوە دەکەم. قوڕگم وشک بووە و دەمەوێت کەمێک ئاو بخۆمەوە و قوڕگمی پێ تەڕ کەم، بوتڵی شەرابەکە دەکەوێتە ژێر دەستم و بەسەر سەری خۆمەوەی دەکەم، بەڵام بەتاڵە و لە گەرووم وشکترە. لە ژێر جێگاکەم دێمە دەرەوە و تا دەرەوەی ژوورەکەم دەڕۆم، لە حەوشەکەوە دابارینی ئەستێرەکان دەبینم، نەخێر، ئەوە بارانە، لەوە ناچێت زۆر دەمێک بێت دەستی پێکردبێت، هێشتا حەوشەکە بە تەواوی تەڕ نەبووە. بایەکی ساردی دێت. هەست بە سەرما دەکەم، چی ڕوویداوە کراسەکەی بەرم تەڕە! ئه و شلەیە چییە بەسەر سنگم ڕژاوە؟ بۆنی دەکەم، بۆنی بارانی لێنایەت، نەخێر، بۆنی باران ترشاو نییە. دەچمە چێشتخانەکە و لە ناو ڕەفەی قاپەکانم چراکە دەدۆزمەوە. باشە، چۆڕێک نەوتی تێدایە، ئەوەتا چەرخەکەش هەر لە تەنیشتیەتی، دوکەڵی چراکە ناهێڵێت بە باشی بۆنی کراسەکەم بکەم، بەڵام بەڕوونی دیارە کە پەڵەیەکی گەورەی مۆری بەسەرەوەیە. کراسەکەم لەبەر دەکەمەوە و هەر لەوێ جێی دەهێڵم. بەشوێن ئاوێکی فێنک دەگەڕێم گەروومی پێ تەڕکەم، چی ڕوویداوە؟! ماڵەکەم بووە بە چەقی بیابان و تەنانەت هەست بە بوونی ئاو ناکەم له و شوێنەدا! بەڵێ ئەوەتانێ ئاو، بەلوعەی دەستشۆرەکە دەکەمەوە لێومی پێوەدەنێم، چوونەخوارەوەی ئاوەکە دەبینم لە گەروومدا، ئه و ئاوە هەموو شتێک ڕادەماڵێت، دەهێڵێت جارێکی تر هەست بە ئاسودەیی بکەم. هەست بە وشکبوونی پێستم دەکەم، وەک ئەوەی لە قۆناغ بە بەردبوون دابم، دەمەوێت بە ڕووتی بچمە بەر بارانەکە و خانەکانی پێستم جارێکی تر پڕبنەوە لە ئاو، بەڵام وادیارە بە دەرگایەکی هەڵە دەچمە دەرەوە، ئەوە دەرگای ژوورەکەمە و ئێستا خۆم لە ناوەڕاستی ژوورەکەم دەبینمەوە. خەوێکی قورسم دێت و دەمەوێت بخەوم، بەڵام دەبینم جێخەوەکەم گیراوە و تارمایی پیاوێکی لەسەر پالأ کەوتووە. سەر له و کارانە دەرناکەم، ئەوە پیاوە بۆ لە شوێنەکەی من پالأ کەوتووە؟ مەگەر شوێنی تر نەمابوو، تەنها شوێنی من نەبێت؟! لێی نزیک دەبمەوە و ڕووناکی چراکە دەخەمە سەری. لەسەر لاتەنیش ڕوو لە دیوارەکە خۆی گرمۆڵە کردووە. ئای کە بێ ئابڕووە، وەک ئەوەی لە ماڵی باوکی بێت وا بە ڕووت و قووتی و بێخەم لێی پالأ کەوتووە، هیچ بڕوو بیانویەک بۆ بوونی ئه و لێرە نییە، بە تایبەتیش به و شێوازە ناشرینەی کە هەیە، تەنانەت ئەگەر زۆریش بە ڕێزەوە دانشتبایە هێشتاش هەر مانای مانەوەی لێرەدا و بەتایبەتیش لە سەر جێخەوەکەم ناگەیەنێت، چونکە له و ماڵەی مندا هیچ مێوانێک پێشوازی لێ ناکرێت و بیریشم نایەت ڕۆژێک لە ڕۆژان پێشوازی مێوانێکم کردبێت، ئەوە تەنیا شتێکە کە دەتوانم خۆمی پێ جیا بکەمەوە لەگەلأ خەڵکانی تر. بە ئەسپایی دەستم ڕەوان دەکەم و بەسەری پەنجەم چەند جارێک بە شانیدا دەکێشم، ئەویش زۆر بە قورسی وەک ئەوەی لە خەوێکی قولأ خەبەرم کردبێتەوە خۆی ڕاستدەکاتەوە و دەکەوێتە سەر پشت. جەستەیەکی تۆکمە و چوارشانەی هەیە، قوڵ و بازووی چەشنی وەرزشوانێکی یاری بۆکسێن ئەستور و بەهێزە، لەش و لاری بەهێزی دڵی هەر پیاوێک دەهێنێتە لەرزە، بیردەکەمەوە پێویستیت بە چەند پیاوی ئاسایی دەبێت بۆئەوەی لە زەوی بدەیت، نەخێر، ئه و جۆرە پاڵەوانانە وا بە ئاسانی نادرێن بە زەویدا و وەستانەوە بەرانبەریشیان گەمژەییەکی گەورەیە، دەست دەکا بە پرخە پرخ، دەنگی پرخەی پڕ بە ژوورەکە دەنگ دەداتەوە، ڕووناکی چراکە دەخەمە سەر ڕووخساری. پێشتر هیچ کەسێکم به و ڕیشە پانە و سمێڵە باریک و تەنکەوە نەدیوە و ناشیناسم، لەوەدەچێت ڕوومەتەکانی لە ژێر تیشکی خۆردا سوتابێت و سوورهەڵگەڕاون، ئەگەرچی پێڵوی چاوەکانی لێکناوە، بەڵام هێشتاش هەست بە بریسکایی و تیژی چاوەکانی دەکەم. لەسەر لاڕوومەتی چەپی ئاسەواری برینێک دەبینم، برینێکی تەڕ، بە درێژایی لێواری برینەکە خوێنێکی گەش کۆبۆتەوە، زیاتر وەک درزی هەنارێکی پێگەیو دەردەکەوێت کە لە قەدی دارێکی پیر کەوتبێتە خوارەوە، قوڕگم وشکە و پێویستم بە شلەیەکە تا قوڕگمی پێ تەڕکەم، حەز بە ئاوی هەنار دەکەم، ئەوە زیارتریش لەبەرئەوەیە کە ڕقم لە سێوە، من سێو بە سەرچاوەی بەدبەختی دەزانم، یەکەمین سێویک کە بینیم کرمی تێدابوو، کرمێکی ڕەش کە زیاتر لە مارێک دەچوو. هەست دەکەم هۆکاری ئه و تەنیایی و سەرگەردانییەم بۆ ئه و ڕووداوە دەگەڕێتەوە، مەبەستم ڕووداوی بینینی سێوەکەیە، چونکە ئەوە تەنها فیڵکێک بوو بۆ تێپەڕبوونی کرمەکە بۆ ناو هەناوی نیوەکەی ترم، ئێستاش ئەوی ڕەشکردووە و ناهێڵێت جارێکی تر بگەڕێتەوە لام.
قوڕگم وشکە، حەز بە خواردنەوەی شلەیەک دەکەم تا قوڕگمی پێ تەڕکەم.

پەنجەی شەهادەم دەدۆزمەوە و دەیخەمە سەر برینەکە و بەتوندی گوشاری دەخەمە سەر و لە قوڵایی برینەکەی دەچەقێنم، پاشان دەریدەهێنم و پەڵەیەکی سووری پێوەیە، دەیخەمە زارم و دەیمژم، ساردییەکەی ناخم فێنک دەکاتەوە، ئەگەرچی کەمێک تاڵە، بەڵام هەستدەکەم ئەوە ناتوانێت توێنێتیم بشکێنێت. بەیەکجار دەمم دەخەمە سەر برینەکە و بەهەموو توانای خۆمەوە دەیمژم. ئێستا کە من تینوێتیم شکا، ئیدی گوێم لە دەنگی پرخەپرخیش نابێت، بە نەمانی دەنگی پیاوەکە بێدەنگییەکی کوشندە هەوای ژوورەکەم دادەگرێت، هەست بە تەنیایەکی سامناک دەکەم، کە هەرگیز لەوەوپێش هەستم پێی نەکردبوو، هەستدەکەم لە کەناری شەپۆلەکانی نەبووندا دانیشتووم و خەریکە لە تەنیایی خۆمدا وەکو کڵۆ شەکرێکی ناو ئاو دەتوێمەوە، دەترسم ژوورەکەم بووبێت بە چەقی چاڵەڕەشەکان و تەنانەت گوێم لە دەنگی میلی کاتژمێرە کەش نییە، ئێستا ترسێکی لەڕادەبەدەر دەمارەکانی سڕکردووم، دەترس ئەوە کۆتایی من بێت، نەخێر، بڕیار نەبوو کۆتاییەکەم بەم شێوەیە بێت. دەمەوێت بچمە دەرەوە، بەڵام چراکەم کوژاوەتەوە و دەترسم ڕێگا وون کەم، ئەوە چ نەهامەتییەکە توشی هاتووم؟! ڕۆیشتن لە ناو تاریکی و بە بێ هیچ ڕێنوێنیکارێک کارێکی مەترسیدارە و لە هەر ئەگەرێکدا بۆی هەیە هەڵە بکەیت و بخزێیتە قوڵایی چاڵە ڕەشەکان و ئیدی هەتاهەتایە نەگەڕێیتەوە. باشترە بخەوم، بەڵێ، ئەوە باشترین هەڵبژاردنە بۆ ئێستا. هێزی خۆم کۆدەکەمەوە و بەتوندی پالأ به و پیاوەی سەر جێخەوەکەم دەنێم، چونکە باوەڕم وایە کە لابردنی جەستەیەکی ئەوها کەتە و چوار شانە پێوێستی بە هێزێکی زۆرە، بەڵام تەواو پێچەوانەی ئەوەی پێشبینیم دەکرد، زۆر ئاسان دەکەوێت و بگرە لەژێر کاریگەری گوشاری دەستەکانم، بەشێکی جەستەی چەشنی پەیکەرێکی لە قوڕدروستکراو دەشکێت و هەڵدەوەرێت. ئێستا ئیتر دەخەوم، نازانم تاکەی، بەڵام دەخەوم.

تەپ و تۆز و بۆنێکی ناخۆشی کەلاکی گەنیو خەریکە دمخنکێنێت و بەزۆر دەتوانم هەناسەبدەم، وەک ئەوەی جەنگیزخان بە هەموو توانای خۆیەوە گوشاری خستبێتە سەر سنگم، بۆری هەناسەم بەیەکەوە نوساون، دەمەوێت پەنجەرەی ژوورەکەم بکەمەوە و کەمێک بۆنی باران بکەم، بەڵام تاریکی هەموو شوێنێکی تەنیوە و ناتوانم هیچ بکەم، ئه و بۆنە ناخۆشە و ئه و تاریکیە کوشندەیە هەراسانیانکردووم و هەرچی ئەکەم ناتوانم بخەوم، بیر لەوە دەکەمەوە لە بری خەوتن خۆم بە شتێکی ترەوە سەرقالأ بکەم، بەڵام هیچم لە دەست نایەت، دەمەوێت بیر لە شتگەلێک بکەمەوە کە لە ڕابردوو بەسەرم هاتبێت، بەڵام هیچ شتێکم لەبیر نییە. لەبری ئەوە هەست بە بوونی هەوایەکی سارد دەکەم لە ژوورەکەم، هەست ڕادەگرم، بەڵام نازانم سەرچاوەکەی کوێیە، هەواکە تا دێت سارتر دەبێت و جەستەی نیوە ڕووتم سڕدەکات. له و دەمانەدا دەرگای ژوورەکەم دەکرێتەوە و تارمایی ژنێک دەردەکەوێت، بەدەستێکی چرایەکی هەڵگرتووە و بەدەستەکەی تریشی کراسێکی ڕەنگ خۆڵەمێشیی، کە پەڵەیەکی سووری گەورەی پێوەیە. ڕووناکی چراکە چاوەکانم ئازار دەدات و بۆماوەیەک ناتوانم پێڵوەکانم بەتەواوی بکەمەوە، بەڵام هەستێک لەناخمەوە فشار دەخەنە سەرچاوەکانم. تا زیاتر لێم نزیک دەبێتەوە، ڕووخساری شۆخی باشتر دەبینم، دووچاوە ڕەشەکانی لە ژێر کاریگەری شەوقی چراکە دەبریسکێنەوە، دووبرۆ کەوانەییەکانی چەشنی ساباتێک دەردەکەون بۆ ڕووخسارە و هێلکەییەکەی، کە خەندەیەکی سیحراوی لە لێوە تەڕ و سوورەکانی وشک بووە. بۆنی گوڵاو ژوورەکەم پڕدەکات، بەجۆرێک خەریکە بۆنی لاشە گەنیوەکە لەبیر دەکەم. لەبەر دەمم دەوەستێت و بە مهیرەبانییەکی زۆرەوە کراسەکە دەداتە دەستم، بێ ئەوەی هیچ شتێک بڵێت. دەمەوێت گوێم لە دەنگی بێت، بەڵام زاتی ئەوە ناکەم بیدوێنم، دەترسم بەرگەی ئه و ئاوازە نەگرم کە لە قوڕگی دێتە دەرەوە و ڕاستەوخۆ ڕووحم بە دەم لەرینەوەکانی به و بایە ساردە دابدات و جەستەم بکات بە پەیکەرێکی لە قوڕدروستکراو. لە گلێنەی چاوەکانی تابلۆیەک دەیبنم، وێنەی دوو لێوی سوور کە دەیەوێت شتێک بڵێت، هەست دەکەم دەیەوێت بڵێت، بخەوە و خەونی خۆش ببینە، نیگایەکی نەرم و پڕ لە پاکی لە کراسەکەی دەستم دەکات و ئارەزوویەکی لەڕادەبەدەرم لا دروست دەکات بۆ لەبەرکردنی، ئێستا هەست دەکەم کراسەکەم چی دی سارد نییە، نەخێر، نیگای گەرمی تا ڕادەی سوتان سوتێنەرە، هەست بە گەرمییەکی خۆش دەکەم، بایە ساردەکە چیتر توانای بێزار کردنی منی نەماوە و لەوە لاوازترە کە بتوانێت بێزارم بکات.

$کرمی ناو سێوەکە$
تیرۆژی خۆرەکە لە نیوان لق و پۆپی دار سێوەکە بەر تاڵە ڕەش و خاوەکانی قژی دەکەوێت و برسیکە دەداتەوە، سوڕی هەناسەی هێواش و ڕێکە، کە نیشانەیەکن بۆ ئارامی دەروونی، بە پەنجە باریک و ناسکەکانی یاری بە قژم دەکات، منیش بە هەموو هێزی خۆمەوە سەرم لە سەر ڕانەکانی گیر کردووە و جوڵەم لە خۆم بڕیوە. بە هەموو توانای خۆم دەکۆشم چێژ له و ساتە گرنگ و ناسکە وەربگرم، لە چۆڵەوانییەکی سەوزدا و بە دەم گوێگرتن لە ئاوازی چۆلەکە و سۆفەقیتەکان، خەریکم ئازادییە ڕەهاکانی خۆم لە باوەشی شۆخێکی میهرەبان ئەزمون دەکەم. هەست بە ئارامییەک دەکەم کە لەوەوپێش هەرگیز هەستم پێی نەکردووە، تیرۆژی خۆر لە نێوان تاڵەکانی قژییەوە بە ڕووخسارم دەکەوێت، تیشکێکی پاک و بێگەردە، وەک ئەوەی خۆر تازە لەدایک بووبێت. گەرمییەکەی ئارامییەکی تایبەتم پێدەبەخشێت. پارچەیەک لە ئاسمانی شین لە نێوان شان و ملی ڕووتی بەدی دەکەم، هەست ناکەم ئەوە ڕاستی بێت، دیمەنی ئەوها هەر دەبێت لەنێو تابلۆ خەیاڵییە هونەرییەکاندا بدۆزرێتەوە، نەک لە واقع، ئاخر کێ پێشتر ئاسمانی وا به و پاک و ساگارییە بینیوە، تا ئەوەی بتوانێت لە مێشکی خۆیدا وێنایەکیان لەهەمبەر بهێڵێتەوە، خۆ ئەگەر ئەوە بەشێک بێت له و وەسفەی کە لە کتێبە پیرۆزەکاندا باسکراوان، هێشتاش بڕوا ناکەم بیرۆکەیەکی ڕوون هەبێت سەبارەت بە خانمێکی شۆخ کە بۆ هەمیشە ڕووحێکی زیندوو دەبەخشێت به و سروشتە. برۆ کەوانەییەکی و دوو چاوە ڕەش و تەڕەکانی و پێستە ئەسمەر و سافەکەی، تەنانەت لە وەسفی چیرۆکە ئەفسانەییەکانیشدا باس نەکراون، بۆیە من دڵنیام لەوەی کە ئەوەی دەیبینم شتێک نییە کە لەوە و پێش بینرابێت. ڕەنگە ئەوە ساتی لەدایکبوونی سروشت بێت، یانیش پاشماوەی یەکەمین چرکەساتی هاتنەبوونی گەردوون بێت. هەست دەکەم ئەوە تابلۆیەکە و دەیەوێت ببێت بە یەکەمین وشەی قەسیدەیەکی درێژ. چاوەکانم بۆ چەند ساتێک لێک دەنێم و وەک وەرزشوانێکی (یۆگا) بە ئارامی و لە قوڵایی سییەکانمەوە هەناسە دەدەم. ئەویش خۆی بەسەر مندا دەچەمێنێتەوە و لێوە ناسکەکانی لە گوێچکەم نزیک دەکاتەوە، بە دەنگێکی ناسک و ئاوازێکی ئارام گۆرانییەک بە گوێمدا دەچرپێنێت:
بە ئارامی باڵەکانت بکەوە و ئەستێرەکان لە پێشوازیت وەستاون،
لە بۆشایی گەردووندا سەما بکە و چێژ لە ئازادی خۆت وەرگرە.
چاوەکانت داخە و بێ ترس ڕێکە
ئەوان ئاگایان لێت دەبێت و
لە تاریکیدا دەستت دەگرن.

تریفەی مانگەشه و هەموو سوچێکی ئه و چۆڵەوانییەی تەنیوە، ئەستێرەکان لەئاسمانەوە کەیفخۆشانە دەگەشێنەوە، وەک ئەوە بیانەوێت بەشداری ئاهەنگی بۆقەکان بکەن، کە بەقیڕەقیڕی خۆیان سەرمەست بوون و لەگەڵ دەنگی باڵندە و جانەوەرەکانی تر سەمفۆنیای سروشت دەچڕن. هەست دەکەم خوناوی سەر گژوگیاکە جلەکانیان تەڕ کردووم، شنەبایەکی فێنک بۆتە سەچاوەی سوکە لەرزێک بۆ جەستەم. سەر هەڵدەبڕم و لە ئاسۆییەکی دوور تارمایی ڕەشی زنجیرە شاخ و تەپۆلکەکان بەدیدەکەم کە چواردەوری دۆڵەکەیان تەنیوە، بەڵام هەست بە بوونی هیچ مرۆڤێک ناکەم لەم ناوەدا و بۆنی تەنیاییەکی ئەبەدی دەکەم، ئەمەش بۆتە سەرچاوەی هەستێکی تۆقێنەر بۆ من، کە واملێدەکات دووبارە واهەست بکەم لە کەناری ئۆقیانوسی نەبووندام، ئەم هەستە ژەهراوییە ڕامدەچڵەکێنێت و ناچارمدەکات بیر لە دۆزینەوەی خۆم بکەمەوە، هانم دەدات کە به و دەشت و دەرە بکەوم و بەدوای مرۆڤەکانی تردا بگەڕێم، بەڵام نازانم بۆچی هەمیشە چارەنوسم تەنیایی بە نسیب کردووم و لەناو تەنیاییشدا بۆشایی زەمەن! پشتم بە دارسێوەکە داداوە و لەخۆڕا و بێ مەبەست چاو له و ووردە بەردانە دەگێرم کە لەژێر گیایەکەوە کەوتونەتە بەر شەوقی مانگ و دەبریسکێنەوە. لەودەمانەدا سێوێکی سوور دەبینم، کە شوێنەواری قەپاڵیێکی بە لاتەنیشتەوەیە، هەڵیدەگرمەوە و بێ موبالاتانە یاری پێدەکەم، هەست بە ڕووحێکی زیندوو دەکەم تێیدا، جیا لە بۆنی سێوەکە هەست بە بۆنی گۆشت و خوێن دەکەم، شوێنەکە تاریکە و هەموو شتێک بە باشی نابینم، لە چاوم نزیکی دەکەمەوە و کەمێک خۆم خوار دەکەمەوە بۆئەوەی بەر شەوقی مانگەکە بکەوێت، کرمێکی برینداری تێدایە کە لە ناوەڕاستەوە بەشێکی زۆری جەستەی خواروە و بەقەد تاڵەموویەکی ماوەتەوە بۆ ئەوەی بپچڕێت و ببێت بە دوو لەت، بە بینیی ئه و دیمەنە کەمێک ورەم دێتەوە بەر، یان لایەنی کەم ئومێدێکم دەبێت بۆ دۆزینەوەی مرۆڤ له و دەوروبەرە! باشترە لە شوێنی خۆم جوڵە بکەم و ئه و ناوە بپشکنم، چونکە ئەگەر وەکو ئەوەی مەزەندەی بۆ دەکەم وابێت، واتا شوێنەواری ئه و قەپاڵە هی مرۆڤ بێت، ئەوا بەدڵنیاییەوە هێشتا نزیکن و ئەگەر کەمێک خۆم بەگەڕان بەدوایان ماندوو بکەم ئەوا دەیاندۆزمەوە، چونکە برینی کرمەکە هێشتا تەڕە و ئەوەش بەڵگەیەکە بۆ نزیکی ئەوان.

هەوڵدەدەم پێیەکانم زۆر بە توندی دانەگرم، چونکە هەندێک لە بەردەکانی ژێر گژوگیایەکە تیژن و ئازار بە پێیەکانم دەگەیەنن، بۆیە تا بۆم دەکرێت بەسوکی و بە شەقاوی گەورە هەنگاو دەنێم، نازانم بەره و چ ئاراستیەک دەڕۆم و چەندێکە دەستم بەم پیادەڕۆییە کردووە، بەڵام لەخۆوە وەک ئەوەی چیرۆکێک بم و پێشتر نوسرابێتمەوە، هەست دەکەم بە ڕێگایەکی دروست هەنگاو دەنێم و دەگەم به و شوێنەی کە مەبەستمە. بەسەر بەردەڵانێکی گەورەدا سەردەکەوم، قاچەکانم دەخلیسکێن، وەکو ئەوە وایە لەسەر قەوزە بڕۆم، بۆیە باشترە سود لە دەستەکانیشم وەرگرم بۆ سەرکەوتن، خۆم کوڕ دەکەمەوە و چەشنی مناڵێک کە هێشتا پێی نەگرتبێت بە گاگۆڵە سەر دەکەومە لوتەکەی بەردەڵانەکە. لە سەری سەرەوەی بەردەڵانەکە دۆڵێکی تەسک و شێوە هێلکەیی دەبینم، سەرم شۆڕ دەکەمەوە و لەوێ لەشکری مرۆڤگەلی سەرقالأ و بێباک دەبینم، چرا و ئاگردان و خێمە قوچەکی و داتەپیوەکان پڕ بە دۆڵەکە پان بوونەتەوە، دوکەڵی ئاگر و بۆنی گۆشتی برژاو تەمێکی شینی لە ئاسمانی دۆڵەکە دروستکردووە، قاقا و پێکەنین و زاق و زیقی ژنان و وەڕینی سەگ و حیللەی ئەسپ لەناو دۆڵەکە دەنگ دەداتەوە و هەرا و زەنایەکی بێتامی ناوەتەوە، لەوە دەچێت هەموو سەرگەرمی ڕابواردن و خواردن و خواردنەوە و ئاهەنگێکی گەرم و گوڕ بن و لە پێکەنینی خۆیاندا مەست بووبن. لێرەدا هەست بە کات دەکەم، بۆنی عارەقی مرۆڤەکان دەکەم، بۆنی گۆشت و خوێن دەکەم، ئەوانە وادەکەن هەستەکانم زیندوو بمێننەوە و هەست بە دڵنیایی بکەم، ئیدی ترسی ئەوەم نییە وونبم و ڕۆبچمە ناو چاڵە ڕەشەکانی گەردوون، چونکە ئێستا ئەوە مەودایەکی زۆر لێم دوور کەوتۆتەوە و چیدی لە تاریکی و لە ئارامییەکی تۆقێنەردا ڕێناکەم، گەرمی ئاگردان ناهێڵن سەرمای بێبەزەیی هەراسانم بکات و ڕووناکییەکەشی دەبێتە سەرچاوەی خۆشییەکی ڕاستەقینە بۆ من. بەهۆی ڕکیی ئه و گرد و تەپۆلکانەی کە چواردەوریان داوە شۆڕبوونەوە بۆ ناو دۆڵەکە کەمێک زەحمەت دێتە پێش چاوم، بەڵام هیچ شتێک من سارد ناکاتەوە بۆ نزیکبوونەوە لێیان، قاچەکانم شۆڕ دەکەمەوە و بە قونەخشکی بەسەر زیخ و دار و بەردی گردەکە بە هێواشی بەرەوە خوارەوە دەچمە پێش، وردە بەرد و زیخەکان ئازارم پێدەگەیەنن و ناو لەپیان بریندار کردووم، بەڵام کەمتر گوێ به و ئازاردە دەدەم و دەمەوێت هیچ چرکەیەک بە فیڕۆ نەدەم و بەردەوام بم لە ڕۆیشتن بەرەوپێشەوە. لەگەلأ پەلەکردن و خێرا هەنگاونان زیاتر دەبوژێمەوە و هەست بە گەرمی لەشم دەکەم، وەک ئەوەی هەنگاوەکانم بزوێنەرێک بن و وزە و گەرمی بە ناو دەمارەکانم پەخش بکەن، بەڵام هێشتاش هەر هەست بە تەنیایی دەکەم! دەبێت شتێکم له و مرۆڤانەی ئێرە کەمتر بێت کە ئاوا لە قوڵایی بۆشاییە تاریک و بێدەنگەکان گیرم خواردووە و توانای ئاوێتەبوونم لەگەلأ ئەوانی تر بووە بە هەڵم و بە بۆشایی گەردووندا بڵاو بۆتەوە. هەموو دیمەنەکان بە چاوی خۆم دەبینم، هەموو بۆنەکان هەست پێدەکەم، بەڵام ناتوانم بیرۆکەیەکی گشتیان لەبارەیەوە دەربڕم، تەنانەت لە مێشکی خۆشمدا ناتوانم لێکدانەوەیەکیان بۆ بکەم و وەک مناڵ هەزاران پرسار بە مێشکمدا دێن و دەچن!

لەناکاو دەستێکی قورس دەکەوێتە سەر شانم و ڕامدەچڵەکێنێت، ئەگەر ئاوڕم نەدابایەوە هەرگیز نەمدەزانی کە ئەوە دەستی مرۆڤێکە و پێکهاتەکەشی گۆشت و خوێنە، ڕەنگە بمگوتبایە ئەوە پارچەی تاوەرێکە و لە سەرووی بەرزاییەکانەوە گلۆر بۆتەوە و بەر شانم کەوتووە، یانیش ئەوە مانگە و بەهەموو قورسایی خۆیەوە کەوتۆتە سەر شانم! ڕووم بەره و دواوە دەسوڕێنم پیاوێکی سەر و کەللە زل لەپێشم قووت دەبێتەوە، کڵاوێکی ئاسنینی لەسەرە و جل و بەرگێکی چاخە کۆنەکانی لەبەردایە، و پێدەچێت ڕوومەتەکانی لە ژێر تیشکی خۆر سوتابێتەوە و سوور هەڵگەڕاون، بوتڵێکی ئاسنینی بەدەستەوەیە و لەژێر کاریگەری شەوقی مانگەکە دەبریسکێتەوە. خەندەیەکی سەیر دەکات، بەجۆرێک دووچاوە بچوک و بزێوەکانی و ڕەنگە پەمەییەکەی و ڕوومەتە سوتاوەکانی گاڵتەجاڕانەتر لەوەی کە هەیە نیشاندەدات. خۆی لێم نزیک دەکاتەوە و بە ڕیتمێکی نەرم پێمدەڵێت: (دەزانم بەدوای چی دا دەگەڕێیت). بە چاو ئاماژەی ئەوەم پێدەدات کە دوای کەوم. بەناو ئاپۆرای مرۆڤەکانی ئەوێ تێدەپەڕین، بەچاو دیارە کە هەموویان مەست و سەرخۆشن، بۆنی ئارەقە و خوێن و گۆشتی برژاو و ئاوی نێرنە و ناڵەی ژن و هاواری پیاوان و قاقای پێکەنین تێکەڵ بە یەکتر بوون و وەکو دەستەیەکی تۆکمە دژی ماتی و بێدەنگی و هەوای سارد و سڕ دەوەستنەوە و ڕووناکی پشکۆی ئاگریش وەکو کێردێک دڵی تاریکی کون کردووە. له و هەرواوهۆریایە دەردەچین و خۆم لەبەردەم خێوەتێکی گەورە و سەرنجڕاکێش دەبینمەوە، میچەکەی بڕۆنزییە و ڕووی پێشەوەشی بە نەخش و نیگار ڕازێنراوەتەوە. هەوا تاریکە و بە باشی ناتوانم ببینم، تەنها شتێک کە دەتوانم لەژێر ڕۆشنایی شەوقی مانگ بیبینم، وێنەی چەند گوڵەبەڕۆژەیەکە لەناو ئینجانەیەک و بەرەوخوار شۆڕبونەتەوە، لەوەش زیاتر دەتوانم هەیکەلی زەبەلاحی خێوەتەکە ببینم، کە لەشێوەی سێبەری شاخێک دێتە بەرچاو و کەوتۆتە سەر ڕمێکی نیکڵ و بریسکە دەداتەوە. بە ڕۆیشتنێکی گاڵتەئامێزانەوە، وەک ئەوەی ئەکتەرێک بێت و لە شانۆیەکی کۆمیدیا ڕۆڵ بگێڕێت، بەره و لای ڕمەکە دەڕوات و چەند جارێک بە دەوری دەخولێتەوە و بوتڵی شەرابەکە بەسەر سەری خۆیەوە دەکات، پاشان کەیفخۆشانە پەردەی دەروازەی خێوەتەکە هەڵدەداتەوە و فەرمووم لێدەکات بۆ ژوورەوە، بەره و پێشەوە هەنگاو دەنێم، بەڵام ئه و پێش من دەچێتە ژوورەوە و منیش بەدوایدا خۆم بە خێوەتەکە دادەکەم. گەرمییەکی خۆش بەر ڕووخسارم دەکەویت و ڕووناکی ڕیزە مەشخەڵەکانی پالأ دیوارەکە شاڵاو بۆ بینایی چاوانم دێنن، مێزێک لە ناوەڕاستی ژوورەکەیە و دۆڵکەیەک و چەند قاپێکی زێڕینی لەسەر دانراوە، جگە لەوەش هەموو کەلوپەلەکانی تر هەر لە زێڕ و بە نەخش و نیگار و ووردەکارییەکی زۆرەوە دروستکراون، لەوپەڕی ژوورەکەش، لەنێوان دوو مۆمدانی گەورەدا تەختەخەوێک دانراوە و دەبینم پەیکەرێکی باریک و ناسکی مرۆڤێکی لەسەر پالأ کەوتووە، تەنها دەتوانم لایەکی جەستەی لەژێر کارگەری ڕووناکی مۆمدانەکە ببینم، لەسەر پشت پاڵکەوتووە، بۆیە نیوجەستەی کچێکی ڕووتم لێدیارە و بەشەکەی تریشی سێبەرێکی تاریکە و لەسەر دیوارەکەی پشتی ڕاکشاوە. لێی نزیک دەکەومەوە و بەباشی لە ڕووخسار و ئەندامەکانی وورد دەبمەوە، چاوەکانی ڕەشن و لە قۆڵایی چاڵە ڕەشەکان تاریکترن و دوو برۆ کەوانەییەکی چەشنی شمشێرێکی تیژ پاسەوانی دەکەن. سەرم نزیکتر دەکەمەوە و باشتر سەرنج دەدەم، نیگاکانم وەک دڵۆپەکانی بارانێکی بەلێزمە هەموو شوێنێکی جەستەی دادەپۆشێت. سەرنجی پەنجە باریک و درێژەکانی دەدەم، حەزێکی لەڕادەبەدەرم لەلا دروست دەکات بۆ یاری کردن لەگەڵیان. هەست دەکەم ئه و پەنجانە سەردەمانێک شوێنی ئارامگرتنیان تەنها ناو پرچی من بووە، ڕەنگی پێستی ئەگەر لە ژێر تریفەی مانگ بوایە جوانتر دەردەکەوت و ئەگەر لە هەوایەکی سارد و وشک بوایە ناسکرت دەردەکەوت. دەمەوێت دەستەکانی تاقی بکەمەوە، دەمەوێت بزانم هەمان ئه و ناسکی و میهرەبانییەی جارانی ماوە، کەچی بەقەد تینی کڵپەیەکی ئاگر گەرمن، گەرمییەکی سوتێنەر شادەمارەکانم دەبڕێت و دەگاتە قوڵایی دڵم. من پێشتر به و جۆرە گەرمییە هەرگیز ئاشنا نەبووم و پێی ڕانەهاتووم، سەرەتا ترسام و دەستەکانم گەڕاندە دواوە، ئێستا دووبارە هەوڵدەدەم، بەڵام دەبینم ئه و خۆی گرمۆڵە دەکات و لەرز دەیگرێت.
ئێستا دەبێ زانیبێتت، کە نییت، تۆ ساردیت و بۆنی مەرگت لێدێت، هەناسەکانت وەک هەوایەکی سارد وایە کە لە دەمی مردوویەک بێتە دەرەوە، جێگای تۆ ئێرە نییە. تۆ لە نێوان ئاژەڵ و مرۆڤەکان ڕەگەزی سێهەمیت، شوێنی تۆ لەنێوان بەرزەخی بوون و نەبووندایە، بگەڕێەوە ئه و شوێنەی کە لێی هاتوویت، ئێستا ئه و موڵکی تۆ نییە و چیدی ناتوانێت لە باوەشی سارد و سڕی تۆدا ئارام بگرێت، نیگاکانت مردوون و ناتوانن هیچ کاریگەرییەکی لەسەر دابنێن، خەندەکانت دڵخۆشی ناکەن، تۆ بێدەنگ پێدەکەنیت و بێدەنگیش پەردەی گوێ ئازاردەدات.
لێی نزیک دەبێتەوە و بە توندی لە باوەشی دەگرێت، ئەویش توند خۆی پێوە دەنوسێنێت و بە چەند جوڵەیەک شوێنی خۆی لەسەر سنگی و لە نێوان قۆڵەکانی خۆش دەکات. مشکێکی سپی کەوتۆتە تەڵەیەکەوە و تەلەکانی توند کەمەریان گرتووە و هیچ دەرفەتێکیان نەهێشتۆتەوە بۆ ڕزگاربوون، ماسییەکە چاوی لێیە، بەڵام ناتوانێت هیچ شتێک بکات، ئاوەکە تاریک و ساردە و چاوەکانی خەریکە دەردەپەڕن، دەیەوێت، بێتە دەرەوە و تەڵەکە بشکێنێت، بەڵام شکاندنی تەڵەیەکی ئەوها پێویستی بە هێزی شکاندن هەیە، بۆ ئەوەش پێویستی بەکاتە، بۆیە ئەگەر لە ئاوەکە بێتە دەرەوە بێ قەید و شەرت دەمرێت.
(دەمەوێت لێی بپرسم بۆچی من مردووم و ناتوانم و ئه و دڵخۆش بکەم)
چونکە تۆ ناتوانیت چێژ له و نازونیعمەتە بکەیت کە خودا بەسەر مرۆڤەکانی داباراندووە، ناتوانیت، هەست بەشکۆمەندی بکەیت، تۆ لە مانای سێکس ناگەیت و لە چێژی سەرکەوتن بێباکیت، بەمەش تۆ بۆ هەتاهەتایە لە چاو وون دەبیت و تەنانەت ناتوانیت بۆ ساتێکی کەمیش کچێکی پەری ئاسا لە باوەشی خۆت بە ئارامی بهێڵیتەوە، منیش ئەوەم کە دەمبینیت، تا هەزاران ساڵی تر هەموو ناوی (جەنگیزخان) دەڵێنەوە و نەبەردییەکانم بە جیهاندا بڵاو دەبێتەوە و دەچمە نێو حیکایەتە مەزنەکان و دەبمە سەرمەشقی هێزە باڵادەستەکانی جیهان. ئەوانەی کە سنگیان بە شمشێرەکەی من شەق دەبێت، کانییەکی خوێنی تێدا درووست دەبێت و تا ئەبەد خوێنی لێ هەڵدەقوڵێت، ئەوانەشی دەبنە شوێنکەوتووی من و سەریان لەبەردەم پێیەکانم دادەنوێنن، بۆ هەتاهەتایە نوقمی خۆشی و چێژ دەبن. تۆش کە هیچیان ناکەیت، بەلای منەوە هەڵوێستێکی تاڕادەیەک نامۆیە، بۆیە پێت سەیر نەبێت کە بە شمشێرێک ملت ناپەڕێنم، ئەوە تەنها لەبەر ئەوەیە کە خۆت هەر لە ئەزەلەوە مردوویت و کوشتنیشت نمایشێکی چێژبەخش نابێت، چونکە تۆ خوێنی گەرم بەناو دەمارەکانت هاتوچۆ ناکەن. لەوانەیە بتکەم بە هاوڕێی خۆم، چونکە لەوانەیە ڕۆژێک لە ڕۆژان پێویستت پێم بێت. ئێستا تەنها بڕۆ و لەبەر چاوم وون بە، تا ئەوکاتەی خۆم دەمەوێت نامەوێت بتبینمەوە، بەڵام ئاگادار بە مەودای نێوان بوون و نەبوون کەمێک مەترسی دارە، بەمەش ڕێگاکەت زەحمەت دەبێت.

$کۆتایی$
پەنجەرەی ژوورەکەم نیوە ئاوەڵایە و تیرۆژی خۆر لەگەلأ بۆنی باران و هەوایەکی پاکی بەیانی خۆی بە ژوورەکەم دا دەکات، ڕەنگی تیشکەکە زۆر جوانە و واهەست دەکەم خۆر تازە لە دایک بووە و بە خوڵق و سەلیقەی زۆرەوە یەکەمین دەستبەکاربوونی لە وەزیفەکەی خۆی ئەنجامدەدات. لەسەر تەختەخەوەکەم ڕاست دەبمەوە و لە بەشی پێشەوەی سەرم هەست بە سوکە ژانێک دەکەم، گەرووم وشکە و هەست بە ماندوو بوون و بێتاقەتییەکی زۆر دەکەم، ماسولکەکانم شەکەت و ماندوون و بەحالأ جوڵەیان پێدەکەم. دەمەوێت بچمە چێشتخانەکە و قاوەیەکی گەرم ئامادەکەم. لەکاتی دانانی پێیەکانم بەسەر زەوییەکە، هەست به و وردە زیخانە دەکەم کە دەچەقنە پێیەکانم، پەڵەی سوور و ڕەش بەشی زۆری زەوی ژوورەکەمی تەنیوە، لە هەندێک شوێن پەڵەی لیتە و قوڕاو دروست بووە. ماڵەکەم وەکو جاران بۆنی بێدەنگی لێنایەت، شەوی ڕابردوو شتگەلی زۆر ڕوویانداوە کە ڕەنگە شوێنەواری هەراو زەنایەکی زۆر بۆ چەند ساڵی ئایندە جێبهێڵیت، حەز به و دۆخە ناکەم و دەمەوێت تەنها لەگەلأ شوێنەواری جوڵەکانی خۆمدا بژیم و لەباوەشی سێبەرەکەم کەڵک وەرگرم و هاوڕێیەتی هیچ کەسێکی تر نەکەم. دوای هەموو ئەوانە کە ڕوویاندا، ئێستا گەیشتومەتە ئه و بڕوایەی کە ماڵەکەم پێویستی بە هەندێک گۆڕانکاری هەیە، دەبێت دیزاین و ڕەنگ و ڕووی بەجۆرێک بێت کە لەگەلأ پێداویستییەکانی ژیانی تازەم بگونجێت. ئه و شتانەی کە زیادن فڕێیان دەدەم و نایانکەمە بارگرانی بەسەر خۆمەوە، بۆ نمونە کاتژمێرەکەم لێ زێدە و بەخۆڕایی خۆی ماندوو دەکات، چرکەکانیشی وادەکەن نەتوانم بخەوم. ئیدی پێویست نییە دەرگای حەوشەکەشم ئەوەندە بکرێتەوە و دابخرێت، چونکە ئەوە ووزەی پێویستی دەوێت و ڕەنگیشە ڕۆژێک لە ڕۆژان خرابێت. تابلۆکەش لێدەگەڕێم، چیدی کاری لەسەر ناکەم، چش کە ماسییەکەم ڕەنگ نەکردووە و ئاوی ڕووبارەکەش هێشتا هەر ڕەشە و لە پاشماوەی زێراب دەچێت. قەڵەم و فڵچەی بۆیەکەش فڕێدەدەم، چونکە ئیدی پێویستم پێیان نییە. ئێستا پێموایە هیچ شتێکی زیاد لە ماڵەکەم نییە و دەتوانم بەئاسودەیی و ڕەحەتییەکی زیاتر جوڵەبکەم. دەچمە دەرەوە بۆئەوەی بۆ دواجار دەرگای حەوشەکە دابخەم، به و نیازەی چیتر نەکرێتەوە، لەناو دەرگاکەوە گوێبیستی غەڵبەغەڵبێک دەبم، دەنگەکان لە قاقایەک دەچن کە لە قوڵایی هەناوەوە سەرچاوەی گرتبێت، باس باسی پیرۆزبایی و یەکتر ماچکردن و ئه و شتانەیە، وابزانم ئه و پیاوەی دراوسێمانە، کە ماڵەکەی ڕێک تەنیا چەند هەنگاوێک لە ماڵەکەی من دوورە، کاندید کراوە بۆ پۆستی سەرۆکی شارەوانی. ئه و دەمێکە چاوی لە دەسەڵات و گەورەییە و پێشتریش خۆی کردبوو بە گەورەی گەڕەکەکەمان. واهەست دەکەم ژوورەکەم گەورەتر لە جاران دەنوێت، تابلۆکە لە ناوەراستی ژوورەکە هەڵدەگرم و شوێنێکی لەلای تەختەخەوەکەم بۆ دەکەمەوە. ماسییەکە لە بێڕەنگی خۆیدا لە تابلۆیەکی تەواونەکراودا لە زەلکاوەکە ڕەش ڕەش دەنوێنێت.[1]