قوماش 32
نووسینی: #ئوسامە جەمیل#

گۆتم: ئێ دە تێمبگەینن لۆ نابی؟ قادرە فەندی گۆتی: کوڕم، وەڵلاهی ئەمن لە شەکریم پێ خۆشترە، برایەکانیشی هەموو پێیان خۆشە، کەس لە مارێمە نیە مانیعی ئەو ئیشەی بی، گۆتم: ئێ قابیلە لە ماریمە هەبی بەو ئیشەی ڕازی نەبی، ئەمەش هەموو ڕازینە، بابم گۆتی: کوڕم ئیشەکە لە دەستەمە و مارێ قادرە فەندی دەرچووە! گۆتم: یەعنی کوو بابە؟ قادرە فەندی گۆتی: وەڵلاهی کوڕم چت لێ بشارمەوە، کابرایەکمان لێ قیت بوویتەوە، دەستی دەڕوا و بە قووەتە و چەکدارە، خەبەری ناردیە، دەرێ هەورینی بدەنە هەر ئێکەکی دەیکوژم، ئەوەی بشیهینی دەیکوژم، کوڕم وەڵلا خەبەری لۆ منیش ناردیە، دەرێ یەکەم کەس ئەتوو دەکوژم، ئێ وەڵلاهی کوڕم ئەمە دەرەقەتی ئەو کابرایەی نایێین! گۆتم: مام قادر ئەو قسانە چیە دەیکەی، قابیلە ئەو وراتە بێ ساحێب و بێ قانون بی، چشتی وا کوو دەبی، ئەنگۆ کوو تەسلیمی پیاوەکی هیچی ئەوها دەبن، دە وەڵلاهی بمکوژی و بمبڕی وازناینم، ئەوجە هەرچی نەیکردیە با بیکا، بابم گۆتی: کوڕم ئەو زەلامە ساحێبی سێسەت چارسەت چەکداریە، موستەشارە موستەشار، هەموو دوو مانگ جارەک دەچتە ئەو ئاقارەی هەر شوانەک گاوانەکی بە دەست بکەوی، دەیکوژی و سەری دەبڕی و دەیباتە دائیرەی ئەمن و دەرێ ئەوانە پێشمەرگەنە سەرم بڕینە، کوڕم ئەو گوند بەگوند و چیا بەچیا لە دوو پێشمەرگەی دەگەڕێ بیکوژی، وەڵلا ئێستا سەدام پێی برێ بابت بکوژە دەیکوژی! کوڕم داومان لەگەر داوی ئەو زەلامەی تێکەر مەکە، وەڵلا سبەینێ چشتەکت لۆ هەردەبەستی و ڕومانەکت داوێتە گیرفانی و تەسلیمی دائیرەی ئەمنت دەکاو ناوت لێ دەنێ موخەڕیب، بابی من ئەو وەختی بە چ لەبن دێیە دەرێ! ئەمن ئەعسابم نەمابوو، چاوم هیچی نەدەدیت، گۆتمە قادرە فەندی: باشە ئەوجە ئەتوو ئامادەی کیژی خۆت بدەیە ئەو سەگبابەی؟ گۆتی: کوڕم وەڵلاهی هێشتا بە هەورینم نەگۆتیە، چشتەکی زانیە، بەس بەو توول و تەفسیلەی نیە، بەخوای دەزانم ئەو مەسەلەی بزانی لەوانەیە لە خەمان خۆی بکوژی، ئای هەورینۆکە، تووشی چبووی کیژی گەورەم!
قادرە فەندی دەوری دوو سعاتان لە ماریمە دانیشت و نەگەیشتینە هیچ، ئەوو و بابم دەیانگۆتە من واز بینە و ئەمن دەمگۆ قەت واز ناینم، پاش بینە و بەردەکەی زۆر قادرە فەندی و بابم وا ڕێککەتن دوو سێ زەلامی بنێرنە کن ئەو موستەشارەیی و قسەی لەگەر بکەن، بزانن قەت وەناکەن پەشیمانی بکەنەوە، قادرە فەندی هەستا و گۆتم: باشە ئەو کابرایە هەورینی لەکێ دیتیە و کێ لۆی دیتتەوە؟ گۆتی: وەڵلا دەستە خوشکەکی هەورینی ناوی فەیرۆزە و خزمی ئەو کابرایەیە، ئەو لۆی هەردایە و ڕەسمی هەورینی لەکن بووە و پیشانی دایە، ئیدی لەو ڕۆژیووە کابرا چوویتە سەر کەری شەیتانی و نایێتە خوارێ!
هەتا نیوەی شەوێ لەگەر بابم و داکم دانیشتین و نەگەیشتینە هیچ، ئەوان دەترسان ئەو پیاوە زەڕبەکی لە من بدا و تووشی کێشەکم بکا، لۆیێ لەبەرە من و ڕوحی من دەیانگۆ کوڕم وازی لێبینە، چ زۆرە ژن زۆرە، وەڵلا کێت دەوێ لۆت دەینین، کوڕم ڕجات لێدەکەین وازبینە، با تووشی کێشەکی نەبی و جەرگمان نەسووتێ، ئەمنیش لێم ببووە عەکسی و دەمگۆ بمبڕن و بمکوژن بەس هەورینم دەوێ!
سبەینێ دەوری سعات دەی هاتمە دەرێ، بەخۆشم نەمدەزانی لۆ هاتیمە دەرێ و کێوە دەچم، خۆ بە ترسەوەش هاتمە دەرێ، چونکە دەترسام ئەو کابرایە دوو سێ جاشی ناردبیتە سەر ڕێم و بمڕفێنن و بن بزرم بکەن، داک و بابیشم هەر ئەو خەمەیان بوو، لۆیێ زۆریان ڕجا کرد نەچمە دەرێ، بەران بەگێم نەکردن، لەسەری کۆرانێ گەیشتمە بازۆی، گۆتم: ئەوە کێوە دەچی؟ گۆتی: وەڵلا دەهاتمە کنەتوو بزانم چت کردەوە، گۆتم: دەبا بچین پیاسەکی بازاڕی بکەین، شۆڕ بووینەوە لۆ بازاڕی هەمووم لۆ بازۆی گێڕاوە، بازۆ زۆر تێکچوو، نەیدەزانی چبرێ، لە خەمی من نە سوحبەتی ماو نە فشقیات، تەماشام کرد هەردوو چاوی پڕی فرمێسک بوون، گۆتم: ئەو فرمێسکانە لۆ منن یان لۆ هەناری؟ گۆتی: بڕوا بکە لۆ تووە، خۆزگە ئیشی توو دەبوو، سندان لە من و لە هەناری دا، گۆتم: بازۆ، یەک پرسیارت لێدەکەم بە ڕاستیم وەرام دەوە! گۆتی: برێ! گۆتم: ئەتوو لە جێی من بی چدەکەی؟ بازۆ بەینەکی داما، بە هەردوو پەنجەی دۆشاو مژەو پەنجە گەورەی فرمێسکەکانی چاوی سڕیەوە و گۆتی: دەزانی چدەکەم؟ گۆتم چ؟ گۆتی: وەڵلا وەبیللا هەری دەگرم!
مایتی.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!