پانۆرامای ژنە کوژراوەکان 02
نوسینی: چیای مامە لەتیف
دەپرسێ..
خوێنی ژن لە چیەوە هاتوە وا بە ئەستوری سمێڵا قوڵپ ئەدا!
خوێنی ژن لە چیەوە دێت وا بە گومانی نێرا
دڵۆپە ئەکا!
خوێنی ژن لە چیەوە بوە وا بە مافی پیاوا
قەبری بۆ ئەدا!
خوێنی ژن لە چیەوە یە وا بە داد و گا-ی پیاوا بێکەس کوژیەکا!
دەیپرسی..
دونیا پێشتر دروستکرا یان گۆڕستانی ژنان؟
زەمەن پێشتر بونیاتنرا یان قەبرستانی ژنان؟
ژیان پێشتر خۆشەویسترا یان کفنی ژنان؟
خودا پێشتر پەرسترا یان سەربڕینی ژنان؟
پرسیاریانکرد..
چۆن دەکرێ ژن دایک بێ و کەچی پیاو بیکوژێ؟
چۆن ئەبێ ژن کچت بێ و کەچی باوک بیکوژێ؟
چۆن بوە ژن خێزانت بێ و کەچی مێرد بیکوژێ؟
چۆن کراوە ژن خوشکبێ و کەچی برا بیکوژێ؟
چۆن و چۆن ژنان لەیلابن و کەچی مەجنونەکانیش قاتڵیان بن؟!
ئەیانپرسیوە..
لێرە گۆڕی کچە بچوکەکان زیاترن بۆ؟!
لێرە تەرمی کچە جوانەکان زۆرترن بۆ؟!
لێرە لاشەی ژنەکان ناسکترن لەخوێنا بۆ؟!
لێرە کفنی کچەکان گرانترن لە مەرگا بۆ؟!
لێرە تابوتی ژنەکان سوکترن لە بێتاوانیدا کەسیش نەپرسێ بۆ؟!
ئەیانوتەوە..
لەسەر شۆرنی ژنە مردوەکان پیاوەکان شەڕیانە!
لەسەر ئەتککردنی کچە کوژراوەکان نێرەکان جەنگیانە!
لەسەر مەمکی ئافرەتە خنکێنراوەکان کوڕەکان ململانێیانە!
لەسەر گۆشتی کچە سوتاوەکان هەوەسی پیاوەکان پێشبڕکێیانە!
لەسەر ناشتنی ژنەکان تەواوی پیاوەکانیش لەخەوایە!
قەڵەمەکانیش ژنیان بۆ تێربون دەوێ و بەگری لێناکەن!
خەیاڵەکانیش ژنیان بۆ ئارەزو دەوێ و دیفاعی لێناکەن!
پێنوسەکانیش ژنیان بۆ ژێر خۆیان دەوێ و حەز بە سەرکەوتنی ناکەن!
پەیمانەکانیش ژنیان بۆ نێچیری دەوێ و
بۆ ڕزگارکردنی نابەن!
خانو بە دەرگا و پەنجەرە حورمەتی هەیە و
کەچی پیاو دەرپێ و لەچکی ژنی ناوێ!
ماڵ بە ڕووناکی و ئارامی ڕێزدارترە و
کەچی پیاو دڵ و هەستی ژنی ناوێ!
بازاڕەکە مافی ژنی تێدا نیە و هی تەماحی پیاوە!
داد-گا حەقی ژنی تێدا نیە و بۆ فرۆشتنی ژن بووە!
یاسا ڕەنگی ژنی تێدا نیە و هی خاوەندارێتی پیاو بووە!
بچیتە لای
هەر دارێ فرمێسکی هەیە بۆ ئەو هەموو ژنکوژیە!
بچیتە لای
هەر بەردێ ئاخ-ی هەیە بۆ ئەو هەموو کچ کوژیە!
بچیتە لای
هەر کانیەک هاواری هەیە بۆ ئەو هەموو ئافرەت کوژیە!
بچیتە لای
هەر منارەیەکیش تەعزێ و پرسەی هەیە بۆ ئەو هەموو ڕەشە کوژی مێینە یە!
کەچی بە تەنیا پیاوە بێشعورە لەم خوێنڕژی دایک کوژیەدا!
کەچی بە تەنیا پیاوە بێئەخلاقترینە لەم قەسابخانەی خوشک کوژیەدا!
کەچی بەتەنیا پیاوە هیچ و پوچترینە لەم سێدارە پەرستیەی نێرسالایەیدا!
کەچی بەتەنیا پیاوە گەدەی وەک تیماسێکە و لەناو ئەو هەمو تەرم و خوێنەیا
ئاگرە بڵێسەی هەوەس و شەهوەتی و
کە پڕترە و
زۆرترە و
زیاترە و
گەرمترە و
بەجۆشترە و
بەتینترە و
بە...........تاد[1]