نېرو مېڵە جە ڕازوانی هۆرامینە یاسان هەم دەمواچەن.
ڕۊشنا پەیما کە زوانی ئەسڵی و خاوەن سەرچەمەی مېژوویی یۊ جە بنەما ئەساسیەکاش جیائەوەکەردەی ڕەگەزیا جە وەختو نویستەی هەم دەمواچیەنە.
زوانی هۆرامیچ پېسە زوانە مەحکەمو زیڼەکا دنیێ خاوەن و ئی تایبەتمەڼڎیێنە.
ئاڎ .... ئاڎە
ئېڎ .... ئېڎە
ئانە .... ئانۍ
کۊڕەکە .... کناچەکۍ
یانی جیائەوەکەردەیۆ ڕەگەزی جە زوانی هۆرامینە پەی ژەن و پیای، کۊڕو کناچەی گۊنجیان چەنی ڕازوانی.
بەڵام جیائەوەکەردەی و دەسنیشانکەردەی چېوەکاتەری و پۊلېن کەردەیشا سەرو نېرو مېڵەیرە چوارچېوێوە ڕازوانیش نیەن. بە مانێوەتەر پۊلېن کەردەی چېوەکاتەری پەی نېرو مېڵەی سەرو بنەماو ڕازوانی نیەن و ڕەنگە دەمواچ زاڵ بیەبۊ ملو ڕازوانیرە.
پەی نمونەی جە زوانی هۆرامینە ( میوە ... دارو درەخت ... کەشو کۊ .... قاپ و قاچاخ .... هتد ) سیفەتو نېرو مېڵەیشا نریان پاڵ ، بەڵام بە هاکەزایی نەک سەرو بنەمێوە زانستی و ڕازوانیۆ.
هەنارەکە ترشا ... هەنار نېرا
هەنگورەکۍ ترشەنه ... هەنگوری مېڵېنە
٭٭٭٭٭
وەزو وەزەکۍ ... وەزی مېڵېنە
وەزو چنارەکەی .... چنار نېرا
٭٭٭٭٭
کەشەکە بەرزا .... کەش نېرا
دۊڵەکۍ نزمەنە ..... دۊڵە مېڵېنە
٭٭٭٭٭
قابلەمەکەی بارە .... قابلەمە نېرا
کتریەکۍ بارە .... کتریە مېڵېنە
٭٭٭٭٭
تەوەرزینەکە تیژا .... تەوەرزین نېرا
کاردەکۍ تیژەنە ..... کاردی مېڵېنە
جیاوازی میانو ( تەوەرزین ) و ( کاردی ) چېشەن؟ هەردوۍ بڕەرېنۍ و ئەشیێ بە پاو کارەکەیشا هەردوۍ سیفەتو نېریشا نریێ پاڵ ، بەڵام کاردی دەمواچەنە سیفەتو مېڵەیی وەرگېرۊ؟
بە هەمان تەرز میوەکۍ گرد بەکارمەیا پەی واردەی، بەڵام بڕێشا بە نېر و بڕێشا بە مېڵۍ دیاری کریا و ئینەیچە یاگۍ پەرساینە ؟؟؟؟.[1]