نامۍ: باقی شەفیعی
نازنام: سەیاڎ
ساڵۊ پېڎابېیەی: 1946
ساڵۊ کوچی دمایی: #04-04-2020#
$ژیواینامە$
شاعېر باقی شەفیعی جە شارو (پاوە)ی ئامان دنیاوە، تەمەن و هەشت ساڵینە تاتەش کۊچی دماییش کەردەن، جە تەمەنو یاڼزە ساڵینە ئەڎایچش کۊچی دماییش کەردەن. مەجبوور لوانەنە چېرو زەحمەت و مەینەتیەکان و ژیوای. سەرەنجام بە مەڵامەتو هەرمانکەردەی و گوزەران کەردەی وازش جە دەرس وانای و وانگای ئاردەن. هەرچن سەیاڎ بۍ بەش بیەن جە لەزەتو وانای و خوڼەواری، بەڵام خوڎای گەورەی بەهرەو زەوقێ شاعېرانە بەخشان پەنە کە تەعویزش پەی کەرۊوە.
سەرەوکوی ستەم ئەی دنیای خاڵی
تەی کەردم یاران هیچ نەبیم حاڵی
ماڼیاو شەکەت کەردم پەلە پەل
مایەم بی زەحمەت نە یاوام وە کەل
ئەی دنیا، پاڵای چن کەس نیاوە
یۊم نەدی واچۊ مانیام سەیاوە.
سەیادی شاعېر زیاتەر جە(6000) شش هەزرار بەیتە شېعرېش تۊمار کەردېنۍ.
سەیاڎ چەنی بەهرەی شاعېرانەیش، سەرەتاو تەمەنیشەنە خڎۍ شمشاڵ(لوولۍ) ژەنەی گېرۊو جوانی و دیمەنە زەریفەکان و هۆرامانی چەنی سەڎاو شمشاڵەکەیش ئامېتە کەرۊن.
سەیاڎی شاعېر ملۊنە خزمەت و مەڵڵا خدری ڕواری و خامەکەیچش بەرۊنە خزمەت و خامەکەیش و پېوەرە ماچان:
چە وەش فەرماوان خدری دانا
کەلامی شیرین ئوستادی زانا
(بۍ یانەی وەشەن تا وە یانەی جەنگ
پای پەتی وەشەن تا وە پاڵای تەنگ)
سەیاڎ پەی چېشی ئاژاوۍ و دېقۍ
یانەی ڕازیاوە چڼە تەبەقۍ
ئا یانە وەشەن بۍ بەرو باڵین
وە بۍ ئاژاوە سەر بنیەی سەرین
ئەر بەینی هامسەر نەبۊ عەلاقە
خاستەرەن پەیشان یەرە تەڵاقە
چەنی هامسەرت وەشی بۊویاری
نەک شەۊو ڕۊت بۊ چوون ژەحرو ماری
سەیاڎ چن وەشەن ڕەفیقی گیانی
لەب وە خەندەوە، شېوە نوورانی
ئەگەر کۊکەن بی، دایېم وە کۊوە
زەردە خەندێوە مانیایت مەسیۊوە.
بەرهەمەکۍ باقی شەفیعی (سەیاڎ):
1. دیوانە شېعرێ پەڕ جوانی و ناسکی و ئاوەزی شاعېرانە.
2. مەرزنارەی موزەخانێوە کەلتووری پەی کەلوپەلە قەڎیمیەکان و هەورامانی، ئامرازۍ ژیوای وەڵینا، وېنە قەڎیمیەکۍ، دیوان و شاعېرا، وەسائیل و هەرمانە دەسیەکا، پۊشاکی کوردی، کە هەرکامشان مېژووێ و ڕازێ پەنهانیەش هۊرگېرتېنە.
3. هۊرگېڵنای دیوان و شېعرەکان و (باباتاهیری هەمەدانی) پەی زوانی هەورامی.
4. بەشداریش جە گلېرکەردەیۆ شېعرەکان و میرزا ئۆلقاڎری پاوەیی.
5. بەشداری جە چاپ و کتېب و(خەزان و هەڵەبجەی).
6. گلېرکەردەیۆ پەندۍ هۆرامیۍ و گەمە قەدیمیەکۍ هۆرامانی دلۍ بەرگێ کتېبی سەنگینینە.
7. شمشاڵ ژەنەی بە بەزمە عیرفانیەکا.
باقی شەفیعی(سەیاڎ) ماچۊ: ( ئاواتم پەڕکەردەی کتېبخانێوەن بە کتېبۍ هۆرامیۍ، وەلێ داخەکېم هەر هەناسۍ هۊرمەکېشوون، چوون سەوادم کەمەن و خامەکەم کولەن).
وینمۍ سەیاڎی شاعېر خاوەنو چن ئاوەزێ فەرهەنگی قووڵ و گەورەین، ئاڎ بارەقەڵڵاو بۍ سەوادیەکەیش هەڵای تەماعەو ئاواتش چن دوورو چن پیرۊزەن!.
ئازیز سەڎ حەیفەن بوانی و نەزانی
دڵسۆز نەبینە پەی هەورامانی
سەیاڎ هەورامی گەزۊی دارانەن
مەولەوی پەسەند شیرین زوانەن.[1]