جانا ژ جەمالا تە موقەددەس قەبەسم ئەز
گەر خووب و پەریزادە نەزەر کی تە بەسم ئەز
مسلی مەهێ نەو گەر تە دڤێتن مە ببینی
مێزە بکە جامێ تو دزانی چ کەسم ئەز
یەغما ژ مە جان کر کو تەجەللایێ ل دل دا
من ڕووحێ د قالب تویی تەنها قەفەسم ئەز
حوببا تەیە من ڕادهەژینی کو بنالم
شەب تا ب سەحەر نالە ژ ڕەنگێ جەرەسم ئەز
من گۆ: مەهێ نەو چاشنییێ ئەبروویێ یاری
گۆ: من چ حەدە شوبهەتی نەعلێ فەرەسم ئەز
ساقی ژ ئەزەل یەک دو قەدەح بادە ب من دا
حەتتا ب ئەبەد مەست و خومار و تەلەسم ئەز
جانا تویی من جان گولییێ خار چ کەرەم پێ
مننەت کو نە وەک بولبولێ محنەت عەبەسم ئەز
سەد جەور و جەفا دی ب مە ناچین ژ دەرێ تە
یەکسەر تو نەباتی وە ل تەبعێ مەگەسم ئەز
گەر وەه! تە دڤێتن ببڕی سەر بکە فەرمان
دا ڤێ سەعەتێ سەر ببڕم خوەش مەقەسم ئەز
سەر تا ب قەدەم ئەر بسوژم شوبهی مەلایی
پەروانە سفەت سوهتم و بێ سەوت و حسم ئەز
#مەلای جزیری# [1]