سیکۆلاریزم و چەند سەرنجێک 12
#شەماڵ بارەوانی#
لە بەشی پێشوودا باسمان لەوەکرد، کە، هەرگیز، لە ناو دەوڵەتی سیوکراتیدا ئازادی عەقیدە و بیروباوەڕ و لائیک بوون و سیکۆلاریزم بوون، جێگایان نابێتەوە و هەموو پێکهاتە و ئایینەکانی تر بە پلەدوو هەژمار دەکرێن و هەمیشە ماف خورا و چەوساوەن.
ئەوە ئەگەر ڕێگەی مانەوەیەکی سەرشۆڕانەیان پێ بدرێت و جینۆساید و قڕ نەکرێن، وەکو ئەوەی دەوڵەتی خەلافەت و داعشی تیرۆرست لەگەڵ کوردانی ئێزدی و، مەسیحیەکان کردی.
ئەوە لە بەرامبەر ئایین و ئایدیا جیاوازەکانی دەرەوەی بازنەی ئیسلام، تەنانەت لە ناو خۆشیاندا، هەموان یەکتری ڕەفز و تەکفیر دەکەن و هەوڵی لە ناو بردن و سڕینەوەی یەکتری دەدەن، بڕۆن لاپەڕەکانی مێژووی ئیسلامی هەڵدەنەوە، بزان هەموو ئەو ئاڕاستانەی کە حوکمیان کرد و ئیسلامی بوون، لە نموونەی ڕاشدی، ئومەوی، عەباسی، سەلجوقی، بوەیهی، فاتمی، ئەیوبی، بوەیهی و عوسمانی و کێ و کێیتر چییان بە ئازادیخوازان و جودا بیران و مەزهەبەجیاوازەکان دەکرد.
تەنها کتێبی(تاريخ التعذيب في الاسلام)ەکەی باقر یاسین بخوێنەوە، کەمن بابەتێکم لە سەر نووسیوەو لە ماڵپەڕی”ئاوێنە”بڵاو بووەتەوە.
بزان چۆن و بەچ شێوازێکی دڕندانە و نامرۆڤانە، ئەشکەنجەی سایکۆلۆجی و فیزیکی مرۆڤ و خەڵکیان داوەو مرۆڤیان هەڵواسیوەو دەست و پێ و سەریان بڕیوەو سەریان بە گاشەبەرد پانکردووەتەوە و داهێنانیان لە شێوازی کوشتن و تیرۆر و تۆقاندن و ئەشکەنجەدان و ئازاردانی خەڵک کردووە، لەو کاتەی تەنها شمشێر زمانی قسەو کۆتا بڕیاربووە و دیکتاتۆریەت و تۆتالیتاریەت فەرمانڕەوایەتی و حوکمی دەکرد و، دەوڵەتی سیوکراتی ڕەها کاریکردووە و شتێک نەبوو بە ناوی سیستەم و لەناو چوارچێوەی ئەوخەلافەتە ئیسلامیانە، بە ناوی دەستاودەستکردنی دەسەڵات و ماف و دیموکراسی و مەدەنیەت و هاووڵاتی بوون و ژن بوون و، شتێک نەبوو لەسای دەسەڵاتی تۆتالیتارانەی ئەو خەلیفانە، بە ناوی مافی مرۆڤ و ئازادی ڕادەبڕین و بۆچوونی جیاواز و ئازاد و ڕەخنەی ئازادانە و پلورالیەتی ئایینی و تۆلەرەنس و دیموکراسیەت و دیالۆک، هەموو شتێک بەزەبری هێز و نوکی شمشێر یەکڵایی دەکرایەوە و، چەندان شاعیر و نووسەر و ڕۆشنبیر و جودابیر و لائیک و دنیایەک جەعدی کوڕی دەرهەم و گەیلانی دیمەشقی لە سەر دەستی هیشامی کوڕی عەبدولمەلیکی ئەمیری ئیمانداران و خەلیفە و ولی و سوڵتانەکان، بە تۆمەتی بێ بڕوایی و لادان لە دۆکترینی ئایینی و قەدەریەت، دەست و پێ و سەربڕرداوەو، چەندین (أم قرفە)و محەمەدی کوڕی عەبادە و مەیسەم ئەلسەمار و ڕەشید ئەلهیجری و عەمارەی ئەلکەلبی و موغەیرەی کوڕی سەعیدی ئەلعەجەلی و بەشاری کوڕی بورد و سالح عەبدلقودوس و عەمری کوڕی ئەلحەمەقە و محەمەدی کوڕی حەسەنی زەنگی و حوسێنی کوڕی زەکەرویەی قەرامیتی و ئیبن ئەبو فەوارسی قەرامیتی و دەیان و سەتان و هەزارانیتر هەڵواسراون و بە شمشێر دەست و پێ و گوێچکە بڕدراون، و زمانیان قرتێندراوە و نینۆکەکانیان دەرهێندراوە و بە ئاگرداخکراون و سوتێندراون و بە زیندوێتی زیندەبەچاڵ و ژێرخاک کروان و، خەسێندراون، چاویان هەڵقەندراوە و دڕکی تێ چەقێندراوە و مەسیح ئاسا لە خاچ دراون و دەست و پایان بزمار ئاژەنکراوە، بە قامیش جەستەیان کون و بریندارکراوە و خەل و خوێ بە برینەکانیاندا کراوەو لە تەندووری گڕگرتووی پڕ ئاگرخراون و سوتێندراون، بە قامچی و دەست و پێڵەقە و مشتەکۆڵە تامردن لێیان دراوە و، لە؟بەرخۆر ڕاگیراون، سەرو ڕیشیان تاشراوە، لە نێوان دوو ئەسپ بەستراونەتەوە و ڕاکێشراون و دووکەرت کراون، لەسایەی دەوڵەتی سیوکراتی و تۆتالیتاری و لە لایان سوفیانی کوڕی موعاویە و یەزیدی کوڕی موعاویە و موعاویەی کوڕی سوفیان و هارونە ڕەشید و موعتەزید و خالیدی کوڕی وەلید و هیشامی کوڕی مەلیک و ئەبو جەعفەری مەنسور و حەجاجی کوڕی یوسفی سەقەفی و حاکم بیئەمرواللە و مەهدی و ڕەشید و واسقی کوڕی محەمەدی عەبدولمەلیک ئەلزیات و مەروانی کوڕی موحەمەد و عەبدولمەلیکی کوڕی مەروان و یەزیدی کوڕی مەزید و یەزیدی کوڕی ئەلمولهەب و موسلیمی کوڕی عوقبە و قوڕەی بن شورەیک و زیادی بن ئەبیە و موعتەمەدی کوڕی عەباد و فەخرولمەلیک و سەفاحەکان و سەیفولدینەکان و سوڵتانولدینەکان و قائیم بیئەمروللاکان و بلانولحەق و فولانولدەولە و حاکم و خەلیفەو والی و وەزیر و ئەمیرەکانی تر هەموو، جگە لە (عومەری کوڕی عەبدولعەزیز کەکەمتر لە سێ ساڵ حوکمی کرد و، یەزیدی ناقیس شەش مانگ، ئەو دووەی لێ فڕێدەینە دەر)، باقیەکەی تر نووسەر وتەنی هەمووی سەرکوتکار و تۆتالییتێر و چەوسێنەر و دیکتاتۆر بوونە و، بەو شێوەیە مرۆڤەکان لە سەر دەستی ئەمان و بە فەرمانی ئەمان و لە سایەی حوکمی ئەمان، دڕندەترین شێوە ئەشکەنجەدراون و لە شێوەی ئاژەڵێک سەر بڕدراون و لە خوێن گەوزێندراون و کوژراون.
چۆن جەعدی کوڕی دەرهەم، لە ڕۆژی جەژنی قوربان و لە شێوەی بەرخێک و لە ژێر منارەی مزگەوت و لە لایان (خالدقەسری) والی عیراق و پێش ئەوێش حیجاز، لەسەردەمی خەلافەتی ئیسلامیەوە سەردەبڕدرێت و براکەی ئەمیش (ئەسەد) کە والی خوراسان دەبێت، هەمان شێوە دەست و پێی هەموو لایانگرانی حارسی کوڕی سەریج دەبڕێت، تەبەری مێژوونووسی ئیسلامی باس لەوە دەکات، چۆن کە، لەسەردەمی عەباسیەکان و تەنها لە سەر دەستی ئەبو موسلیمی خوراسانی 600 هەزار، ژن و پیاو مێردمنداڵ عیدامکراون و بە شمشێرسەربڕردراون.
ئەسفەهانی لەوەدەدوێت کە ئەبو جەعفەری مەنسور لەسەردەمی خەلیفایەتی و دەسەڵاتی خۆیدا بەعزێک لە عەلەویەکانی بە زیندوویی زیندەبەچاڵ کردووە.[1]
⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!